Свет
Студен туш од холандската ИНГ банка
Македонија ја изгуби шансата да се закити со брендот на шестата банкарска сила во светот Шестата банка во светот нема да влезе во Македонија
Македонија ја изгуби шансата да се закити со брендот на шестата банкарска сила во светот
Шестата банка во светот нема да влезе во Македонија
НИНА НИНЕСКА-ФИДАНОСКА
Поразителна вест за Македонија – шестата банка во светот, холандската ИНГ дефинитивно, се откажува од влезот во Македонија. Иако речиси цела година се живееше во надеж дека на нашиот пазар конечно ќе влезе врвен светски банкарски бренд, деновиве директно од холандската ИНГ стигнал "студен туш" до македонските власти. Оваа одлука во четвртокот ја донел Бордот директори на банката со образложение дека Македонија, според нив, не е стратегиско подрачје за влез на нивниот капитал и инвестирање.
Овој потег доаѓа откако менаџментот на ИНГ цели седум месеци преговараше со главните акционери на Поштенска, односно Еуростандард банка, која поседува 66,66 отсто од капиталот, како и со македонската Влада, која преку Пошта во свои раце има 33,33 проценти.
Оваа вест вчера не сакаа да ја потврдат или да ја демантираат ниту во Владата ниту во Народна банка на Македонија. "Утрински" се обиде да ја провери информацијата во седиштето на ИНГ во Амстердам, но не успеа да добие никого, веројатно, затоа што таму е неработен ден поради Велигден.
Според сознанијата, кога во петокот попладнето ја добил непријатната вест од Амстердам, кај целиот владин и монетарен врв настапил вистински шок, па дури и паника. Премиерот Владо Бучковски, гувернерот Петар Гошев и претставници од Еуростандард банка биле затечени од информацијата дека Холанѓаните во "минута до дванаесет" се откажуваат од зделката откако таа беше доведена буквално до самиот крај. Така, се планираше веќе на 25 април продажбата на акциите да помине преку Берза, а купопродажниот договор со голема помпезност да се потпише на 27 април. Дури, велат наши извори, веќе се закупила и сала во хотелот "Александар палас", каде што ќе се одржела свеченоста и со шампањско ќе се прославел влезот на едно вакво популарно име на нашата банкарска сцена.
Во јавноста се коментира дека пропаста на шансата за влез на ИНГ е многу лош сигнал за Македонија. Влезот на еден ваков бренд требаше да ги отвори вратите и за другите големи компании, но сега и тоа останува неизвесно.
Според уште непотврдени информации, работата толку многу се вжештила што од Владата, НБМ и од Еуростандард банка веќе се формирал и специјален тим, кој веќе денес ќе отпатува за Амстердам. На средбата со менаџерите на ИНГ, која е закажана за утре во 10 часот, нашите преговарачи ќе бараат објаснување зошто Бордот се откажува кога за таа зделка менаџментот претходно преговараше долг период, што практично значи дека менаџерите немале мандат од Бордот за вакви разговори. И овие гласови вчера никој од надлежните не ги потврди.
Преговорите со ИНГ беа во напредна фаза, а премиерот Бучковски банката ја посети за време на својот престој во Холандија во октомври минатата година, од каде што се дадоа многу оптимистички сигнали. Од тие причини, вчера проструи дури и веста дека, наводно, Бучковски вчера размислувал да побара средба со холандската амбасадорка во земјава поради новонастанатата ситуација. Но, тоа го демантираа извори блиски до Бучковски.
Додека преговараше со ИНГ, Македонија изгуби многу шанси за влез на други реномирани банкарски имиња во Поштенска. Така, поради Писмото за намери со ИНГ, според кое додека траат преговорите со нив, да не се разговара со други кандидати, нашите власти, наводно, морале да ги одбијат словенечката Нова љубљанска банка, потоа француската Сосиете женерал, грчката Пиреус банка, како и словенечкиот фонд Потеза.
Официјално, премиерот вчера не сакаше ни да ја потврди ни да ја демантира информацијата. "Преговорите се во многу сензибилна фаза во овој момент и затоа не би сакал да давам никакви изјави", рече вчера Бучковски.
Во НБМ вчера само нагласија дека не добиле никакво официјално писмено известување од ИНГ дека се повлекуваат, а за нив валидни биле само официјалните документи. Но, во НБМ сў уште стои барањето од Холанѓаните за добивање согласност за купување на акциите и за лиценци за директорите.
Инаку, според одлуката на Бордот, тие решиле да не инвестираат во Македонија, бидејќи таа, според нив, "не била стратегиско подрачје". Поточно, директорите одлучиле да ја заострат својата политика за инвестирање во, според нив, нестратегиски држави. Сега со право се поставува прашањето од каде ваквата пресвртница кај Холанѓаните само десет дена пред склучување на договорот. Некои кругови сметаат дека нив ги поколебале најавите дека во земјава ќе влезат реномираните австриски банки – Рајфајзен и Хипо банка. За ИНГ тоа било знак дека ако толку моќен играч влезе на малиот македонски мал пазар, тоа би значело силна конкуренција и можност да се изгуби дел од планираниот профит.
Други аналитичари, пак, ја пласираат тезата дека лош сигнал за ИНГ биле предвидувањата што стигнаа од "Економист интелиџенс јунит" дека Македонија ќе влезе во ЕУ дури во 2020 година. Во секој случај, велат изворите, причината никако не е дека наводно ИНГ не можела да постигне договор со нашите акционери. Имено, сў било договорено со нив, од цената до други гаранции од Владата. Меѓу нив биле и дека цели пет години Поштата да не може да работи ниту со една друга банка освен со Поштенска, ИНГ да има приоритет при купувањето на Поштата ако таа се приватизира, па дури и ако банката се пресели во Македонски пошти.
Инаку, ИНГ требаше да влезе во Македонија заедно со холандскиот државен фонд ФМО, како и со инвестициониот фонд СЕАФ. Владимир Пешевски, генерален директор на СЕАФ – Македонија, вчера изјави дека "овој фонд е уште заинтересиран за влез во Поштенска банка".
Инаку, кај нашите преговарачи сў уште не е изграден став какви чекори ќе се преземаат натаму и кому би можела да му се понуди Поштенска банка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Детали од пропаднатиот мировен договор меѓу Русија и Украина: „Киев да гарантира трајна неутралност, а Москва да не напаѓа“
Русија и Украина беа блиску до постигнување мировен договор во пролетта 2022 година, според кој Киев бил подготвен да се посвети на неутралност, пренесува „Велт“ повикувајќи се на нацрт-договорот.
Повикувајќи се на документ од 17 страници од 15 април 2022 година, германскиот весник наведува дека Москва и Киев постигнале начелен договор и дека преостанатите разлики ќе бидат „измазнети“ на самитот меѓу претседателите на Русија и Украина, Владимир Путин и Володимир Зеленски.
Според „Велт“, Украина тогаш се обврзала на „постојана неутралност“ без присуство на странско оружје или војници, како и да не „прима, произведува или стекнува“ нуклеарно оружје. Киев, наводно, гарантирал и дека нема да одржува воени вежби со други земји.
За возврат, Русија се обврза да не ја напаѓа Украина, а Киев можеше да добие безбедносни гаранции од САД, Велика Британија, Франција и Кина. Доколку Украина биде нападната, нејзините гаранти ќе го поддржат нејзиното право на самоодбрана во рок од три дена, со ратификација на соодветните договори од секоја држава учесничка, што ќе ги направи правно обврзувачки.
„Велт“ наведува и дека договорот го исклучил рускиот полуостров Крим, како и делови од Донбас од какви било безбедносни гаранции дадени на Украина.
Сепак, не е јасно кои делови на Донбас беа опфатени со клаузулата. Весникот наведува дека иако Русија сакала да се утврдат точните граници на самитот Путин-Зеленски, Киев одбил, инсистирајќи дека тие се засновани на украинско толкување.
Во исто време, Москва наводно сигнализирала дека е подготвена да ги повлече своите војници од украинска територија, но не и од Крим и Донбас. И тоа требаше да разговараат Путин и Зеленски.
Двете страни, исто така, наводно имале големи несогласувања околу големината на украинската војска, бидејќи Киев сакал да задржи многу повеќе војници отколку што Москва била подготвена да дозволи.
„Велт“ објави дека Москва бара рускиот да стане втор официјален јазик во Украина. Русија, наводно, побарала укинување на сите меѓусебни санкции и отфрлање на тужбите, истовремено повикувајќи го Киев да го забрани нацизмот и „агресивниот национализам“. Украина ги одби тие барања, пишува весникот.
Коментирајќи го сега пропаднатиот договор, еден украински преговарач за „Велт“ изјави: „Тоа беше најдобриот договор што можевме да го постигнеме“. Преговарачот исто така изјави дека Киев бил во посилна преговарачка позиција во 2022 година отколку сега.
Руските власти претходно потврдија дека Украина и Русија се блиску до мировен договор, но тврдеа дека напредокот е закочен од тогашниот британски премиер Борис Џонсон, кој наводно го советувал Киев да продолжи со борбите. Џонсон ги отфрли обвинувањата.
Свет
„Смрт за Америка и Израел“: Хутите тврдат дека собориле американски борбен дрон
Јеменската милитантна група Хути соопшти дека соборила американско борбено беспилотно летало MQ-9 Reaper и објави видео на кои се прикажани делови од дронот.
Хутите тврдат дека го собориле дронот со проектил земја-воздух, дел од новата серија напади на бунтовниците оваа недела, по релативно затишје во војната меѓу Израел и Хамас во Појасот Газа.
Пентагон, Централната команда на САД и американските воздухопловни сили не ја коментираа изјавата на милитантите, но Си-Би-Ес Њуз цитираше неименуван американски функционер кој потврдил дека дронот се урнал во Јемен.
Видеото објавено од Хутите вклучува ракета која е лансирана кон беспилотно летало, а во позадина се слуша како човек го рецитира слоганот на групата по ударот на авионот: „Господ е најголем, смрт за Америка, смрт за Израел, проклетство на Евреи, победа на исламот“.
На видеото се прикажани и неколку главни делови од дронот, вклучувајќи го и логото на General Atomics, која го произведува авионот, како и серискиот број.
Свет
Апокалипса во Кина: силно торнадо руши се’ пред себе, 5 загинати и многу повредени
Најмалку пет лица загинаа, а 33 се повредени во силно торнадо што денеска го погоди јужниот кинески град Гуангжу, јави кинескиот јавен сервис CGTN.
Сеизмолошкиот институт соопшти дека торнадото било на ниво 3, што е две нивоа под највисокото, а увидот за материјалната штета е во тек, објави државната новинска агенција Ксинхуа.
Метеоролошката станица во селото Лијангтиан во округот Бајин, на околу три километри од местото каде што потекнува торнадото, попладнево забележа максимален удар на ветер од 20,6 метри во секунда.
Претходно во текот на денот, градските власти издадоа предупредувања за можна појава на грмотевици, дожд, град и торнада во многу окрузи.
Ова доаѓа додека провинцијата Гуангдонг се бори со рекордни поплави предизвикани од обилните дождови, кои однесоа најмалку четири животи и раселени десетици илјади луѓе низ неколку градови.
Најмалку 10 лица се водат како исчезнати.