Делегација на Собранието на Република Македонија учествува на есенските состаноци на ОБСЕ што се одржуваат од 9 до 11 октомври во Атина. Македонската делегација ја сочинуваат пратениците Андреј Петров (СДСМ) Хисен Џемаили (ДУИ), а шеф на делегацијата е Владимир Ѓорчев (ВМРО-ДПМНЕ)

Во рамките на есенското заседание на ОБСЕ се одржа парламентарна конференција за „Енергетската безбедност и животната средина”. На правата сесија за регионалната соработка во енергетскиот сектор настапи пратеникот Андреј Петров. Тој истакна дека соработката во областа на енергетиката, а особено во се уште ранливите региони каков што е балканскиот, не е само важна, туку јасно и недвосмислено покажува колку е таа нужна претпоставка за развој, интеграција и вклучување на регионот во тековите на ЕУ. Ги повтори заложбите содржани во Договорот за основање на енергетска заедница за регионална соработка, потпишана во Атина во 2005 г. за формирање на интегриран пазар на електрична енергија и природен гас, како и создавање на правна и регулаторна рамка за пазарот на енергија, кој ќе функционира според правилата применливи во ЕУ, а со цел целосно интегрирање на регионот во ЕУ. На конференцијата учествуваат околу 200 парламентарци од 56 држави-учеснички во ОБСЕ. Воведни обраќања на денешната конференција имаа: претседателот на парлаемнтарното собрание ОБСЕ, Жоа Соареш, претседателот на Парламентот на Грција на заминување, Димитриос Сиуфас, како и Спирос Куверис, заменик- министер за надворешни работи во новата грчка влада. Утре се очекува да настапи Треодорос Пангалос, потпретседател на новата владана Грција и претседател на Политичкиот комитет на Собранието на ЗЕУ.