Македонија
Тешко прооден пат до новиот граничен премин
Министрите за внатрешни работи на Македонија и Србија, Гордана Јанкулоска и Ивица Дачиќ денеска отворија нов граничен премин на македонско-српската граница, Голема Црцорија – Голеш.
Министрите за внатрешни работи на Македонија и Србија, Гордана Јанкулоска и Ивица Дачиќ денеска отворија нов граничен премин на македонско-српската граница, Голема Црцорија – Голеш.
Граничниот премин е оддалечен од Крива Паланка околу 20-тина километри, но околу 3,4 километри кои водат до него не се асвалтирани, таму се оди само со џип.
Граничниот премин ќе се користи само шест месеци во годината од пролет до есен. Засега преминот ќе биде отворен само за мештаните од Голема Црцорија и селото Голеш, општина Босилеград.
„Задоволство ми е што го отвораме овој граничен премин кој ќе го користат граѓаните кои живеат од едната и од другата страна на границата. Долги години овде не постоела граница, луѓето живееле без бариери. Од едната и од другата страна има доста луѓе коишто имаат имоти од спротивната страна, работат или нивните деца одат на училиште во другата држава. Многу од нив треба да изминат многу километри за да дојдат од другата страна на државната граница. Со ова сега се олеснува комуникацијата меѓу граѓаните од двете страни“, изјави Дачиќ.
И двајцата министри најавија дека ќе работат на решавање на проблемот со патната инфраструктура од двете страни. На ова ќе работат и локалните и централните власти од двете држави.
„Токму овој премин е отворена можност за премин на границата на граѓаните кои имаат најчеста потреба да ја преминуваат границата. Тоа е локалното население кое што живее во пограничниот појас. Секако дека не е доволно само овие граѓани да имаат ваква можност. Затоа на иницијатива на колегата Дачиќ, нашите тимови пристапија кон усогласување на текст на договор за премин на границата само со лична карта. Очекувам овој договор да го ратификува новиот парламентарен состав“ изјави Јанкулоска.
Градоначалникот на Крива Паланка, Арсенчо Алексовски вели дека со овој нов граничен премин жителите од Босилеград, нема да мораат да кружат околу 300 километри за да стигнат до другата страна на границата. /крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Маричиќ-Стевановиќ: На Собранието му требаат современи патриоти и борци за еднаквост, права и слободи
Во заедничката изјава за медиумите, Милена Стевановиќ и Бојан Маричиќ од листата на кандидати за пратеници во Изборната единица 1, порачуваат дека „реформите ни носат системски промени и европски фондови“, но и „демократски вредности со кои се пробиваат границите за еднакви можности за жените како докажана заложба на СДСМ.
Милена Стевановиќ во својот дел на изјавата истакнува дека „СДСМ, Ковачевски, Пендаровски, Маричиќ и другарите социјадемократи се оние кои со знаење и капацитет можат да ја придвижат земјата напред“.
„Нам ни требаат луѓе како Бојан. Со исклучително познавање на институциите на ЕУ, со чиста и прогресивна мисла, вистински современи патриоти кои додека ја внесуваат земјата во ЕУ го штитат и промовираат македонскиот идентитет“, истакнува Стевановиќ.
Tаа ги повикува сите македонски демократи „во среда на 8 мај сите кои се за подобра, современа и демократска Македонија да го заокружат бројот 1 за европска Македонија“.
Бојан Маричиќ ја посочува Милена Стевановиќ како „претставник на прогресивното женско движење“.
Маричиќ порачува дека со Стевановиќ, Македонија и македонското општество ќе имаат „напредок на полето на јавното здравје, на полето на женското здравје и машкото здравје“.
„На Собранието и треба Милена Стевановиќ, врвен професионалец кој го предводеше целиот тим на инфективната криза за време на пандемијата од ковид и која во исто време се докажа како храбар и непоколеблив борец за постојано унапредување на правата на жените“, истакнува Маричиќ.
Порачува дека е важен гласот на жените, девојките, демократи и демократки.
„Вашиот глас за СДСМ и за Милена Стевановиќ на овие избори е глас за жените како еднаква силна движечка сила на општеството“, нагласува Маричиќ во заедничката изјава со Милена Стевановиќ, како кандидати за пратеници на СДСМ и на Коалицијата за европска иднина во изборната единица 1.
Македонија
Сообраќајка на патот Радовиш – Штип, сообраќајот во прекин
Од 18:05 ч. сообраќајот на магистралниот пат Радовиш – Штип, во близина на „Алкопласт“, е во прекин поради сообраќајна незгода, соопшти АМСМ.
Сообраќајот на државните патишта се одвива непречено, по претежно суви коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Владата ќе ја одбележи 121 годишнината од смртта на Гоце Делчев
Владата на Република Северна Македонија, на 04.05.2024 година (сабота), ќе ја одбележи 121 годишнината од смртта на Гоце Делчев со положување свежо цвеќе на неговото вечно почивалиште, во црквата „Св.Спас“,Скопје.
По тој повод, во 10:30 часот, свежо цвеќе ќе положи претседателот на Република Северна Македонија, Стево Пендаровски, владина делегација предводена од Славјанка Петровска, министерка за одбрана во Владата на Република Северна Македонија, Каја Шукова, министерка за животна средина и просторно планирање во Владата на Република Северна Македонија.