Водена од желбата за заштита на Преспанското Езеро, претседателката Гордана Сиљановска-Давкова, вчера од општината Ресен ја започна серијата на посети на македонските градови и села.

Пред неа и пред градоначаналникот Јован Тозиевски, на дебатата во Отешево, повеќе од 15 претставници на Министерството за животна средина и просторно планирање, УНДП, невладиниот сектор и други државни и локални институции ги образложија причините за алармантното намалување на нивото на водата во Преспанското Езеро. Врз основа на научни анализи и докази, како клучни фактори ги посочија климатските промени, намалените врнежи од дожд и снег, понирањето, како и прекумерното користење на водата за наводнување. Присутните на дебатата нагласија дека повлекувањето на Преспанското Езеро не е само национален, туку е и прекуграничен проблем.

Истакнувајќи дека Преспанскиот регион поседува беспрекорна убавина којашто внесува посебен мир, Сиљановска-Давкова рече дека сите имаме обврска да ја третираме природата како партнер, бидејќи штитејќи ја природата, се штитиме себеси.

„Верувам дека има решенија, само треба да се чујат. Верувам дека во еден инклузивен процес и сите кои одлучуваат мора да ги чујат мислењата и ставовите на овие квалификувани и заинтересирани луѓе коишто живеат овде и веруваат во иднината на овој регион. Сите треба да се впрегнеме за она што е остварливо, навистина да стане реалност, а не само посакувана цел“, додаде претседателката.

Претходно, во Ресен таа го посети Домот на културата ,,Драги Тозија”, познат како ресенскиот сарај. Објектот го градел еден од водачите на младотурската револуција, Ахмед Нијази Бег на почетокот на 20-тиот век и во него се наоѓа спомен собата на Кераца Висулчева во којашто се изложени дел од цртежите и сликите од нејзиното творештво. Претседателката искажа верување дека свое заслужено катче во сарајот ќе добие и ресенчанката Наде Проева, истакната македонска историчарка и професорка.

Таа ја разгледа и спомен-куќата на Татарчеви, во којашто се чуваат предмети од ова познато семејство, како и музејската поставка со восочни фигури и други обележја на голем број историски личности од регионот.

За време на посетата, Сиљановска-Давкова одблизу се запозна со работата на фабриката Свисслион Агроплод и оствари средби со градоначалникот Јован Тозиевски, членовите на Советот на општината и со граѓаните на Ресен.

Истакнувајќи дека за неа е голем предизвик да разговара со млади луѓе, коишто во себе носат уникатна енергија, претседателката ги слушна нивните размислувања и идеи како да се намали иселувањето. На средбата се согласи со ставот на младите и на градоначалникот дека е неопходна државна стратегија за задржување на младите тука, дома.

„Знам дека Ресен има убава иднина, му треба само мала помош. Преку проектот „ЕУ за Преспа“ се вложуваат значителни средства за развој на Ресен, којашто е една од македонските општини со најголем бенефит од европските фондови“, заклучи Сиљановска-Давкова.

Градоначалникот на Град Скопје, Орце Ѓорѓиевски разговарал со претставниците на финансиската полиција во врска со обвинувањата кои ги изнесе за незаконитости во работењето на повеќе јавни претпријатија. Ѓорѓиевски претходно објави дека се отпуштени 500 лица кои со месеци или години не доаѓале на работа, и дека нема да има толеранција за такви случаи.

„Имавме тематска средба со претставници на финансиската полиција. Во интерес на истрагата нема да давам повеќе информации. Од она што досега го изнесов, околку 500 се отстранети од списоците оти земале плата а не оделе на работа, односно го прекршиле Законот за работни односи. Тоа не се лица кои ќе бидат заменети со нови, туку се случува оти вршеле злоупотреба во институциите. Тоа е околу 5 милиони евра оштета на годишно ниво“, рече Ѓорѓиевски во разговор за МРТ.

Ѓорѓиевски порача дека е потребна и командна одговорност, што подразбира да не бидат само отстранети лицата кои не оделе на работа, туку и да имаат одговорност оние којшто потпишувале за тоа да се случува и директорите.

Фондацијата „Роми за Европа“ со седиште во Брисел изрази длабока загриженост по објавено видео од Македонија на кое се гледаат возрасни луѓе кои мачат 8-годишно дете од ромската заедница и му се закануваат. Организацијата го оцени случајот како сериозно прекршување на човековите права и упати повик до институциите за целосна и независна истрага.

„Овој случај не се однесува само на страдањето на едно дете – тој покажува колку длабоко е дозволено расизмот против Ромите да пушта корени,“ изјави претседателот на фондацијата, Желјко Јовановиќ, нагласувајќи дека властите треба решително да дејствуваат за да обезбедат правда и да спречат повторување на вакви случаи.

Од фондацијата потсетуваат дека сторителите се ставени во куќен притвор, но додаваат дека потребна е поширока институционална реакција и системски мерки за превенција и санкционирање на дела од омраза.

Во соопштението се наведува дека според податоците на Агенцијата на Европската Унија за основни права (ФРА), 16 проценти од Ромите во Северна Македонија во изминатата година доживеале вознемирување поради нивното етничко потекло, а неколку пресуди на Европскиот суд за човекови права укажуваат на недоволно ефикасни истраги во случаи на насилство кон Ромите.

Фондацијата потсетува дека Северна Македонија со потпишувањето на Познањската декларација за вклучување на Ромите и Западен Балкан презела обврска за конкретни мерки во борбата против дискриминацијата и омразата.

„Само преку решителна и принципиелна акција може да се обнови довербата и да се покаже вистинската посветеност на Северна Македонија кон европските вредности,“ се наведува во соопштението на фондацијата, која е подготвена да им помогне на институциите во земјата во овој процес.