Македонија
Избрани најдобрите полицаец, пожарникар и крводарител
Градоначалникот на Град Скопје, Коце Трајановски денеска ги додели наградите за најдобар полицаец, пожарникар и крводарител за 2009 година
Димитар Арготов, полицаец во Полициската станица за безбедност во патниот сообраќај, ја доби наградата за најдобар полицаец, на Град Скопје, како заслуга за неговото ефикасно работење. „Да се биде добар полицаец е потребно доста искуство, макотрпно да се работи, да се реагира на секој повик и да се извршуваат задачите до крај. Од 1982 година сум во сообраќајната полиција на Град Скопје и до сега имам извршувано повеќе, каде се имам истакнато, имам добиено повеќе парични награди, а оваа награда е најголемата во мојот живот и мојата служба“ изјави најдобриот полицаец за 2009 година Димитар Арготов. Мифтари Башким, командир на одделението во Бригадата за противпожарна заштита е избран за најдобар пожарникар на Град Скопје. Башким работи како пожарникар од 1994 година. „Да се биде првиот пожарникар во Скопје е голема чест, знаејќи дека противпожарната бригада опфаќа многу поопширна околина. До сега имам учествувано во околу 500 пожари и околу триесетина технички интервенции. “ изјави Башким. Драги Котевски вработен во „Македонски железници“ е избран за најдобар крводарител на Скопје за 2009 година, вкупно со повеќе од 105 дарувања крв. „ Дарувам крв од своите 15 години, а понатаму со самото вработување активно се вклучив во крводарителните акции и четири пати годишно да се дарува крв за мене не претставува проблем. Колку животи сум спасил не знам, и крводарителството за мене претставува хуманост, нешто со што се гордеам“ изјави Котевски. Градот Скопје ги награди најдобрите полицаец, пожарникар и крводарител со парична награда од 10 000 денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Визер“ привремено ги прекинува летовите кон повеќе дестинации на Блискиот Исток
Авиокомпанијата „Визер“ соопшти дека поради неодамнешната ескалација на безбедносната состојба во Иран ги суспендира сите летови кон и од Израел, Дубаи, Абу Даби, Аман и Саудиска Арабија, заклучно со 7 март.
Од компанијата информираат дека континуирано ја следат состојбата и се во постојан контакт со локалните и меѓународните власти, агенциите за безбедност во воздухопловството и други релевантни институции. Во зависност од развојот на ситуацијата, можно е да бидат донесени дополнителни оперативни одлуки и да дојде до измени во распоредот на летови.
„Визер“ наведува дека ќе ги информира патниците за сите очекувани промени што е можно поскоро. Патниците кои направиле резервација преку трети страни треба да се обратат директно до нив за дополнителни информации.
Од компанијата нагласуваат дека безбедноста и сигурноста на патниците, екипажот и авионите останува нивен највисок приоритет. Патниците со засегнати резервации ќе бидат директно контактирани со информации за достапните опции.
Македонија
Општина Илинден објави јавен повик за субвенционирање на велосипеди
Општина Илинден и оваа година објавува Јавен повик за доделување субвенции за набавка на велосипеди, во рамки на Програмата за финансиска поддршка на целни групи граѓани за 2026 година.
Со мерката се предвидува еднократна парична помош за жителите кои имаат постојано место на живеење на територијата на општината, а кои ќе набават нов велосипед во периодот од 02 март до 30 април 2026 година.
Целта на повикот е поттикнување на користењето велосипеди како еколошко превозно средство, како и унапредување на сообраќајната култура и заштитата на животната средина.
Финансиската поддршка изнесува 50 проценти од вредноста на купениот велосипед, но не повеќе од 4.000 денари по лице. Барањата ќе се разгледуваат по принципот „прв дојден – прв услужен“, односно според датумот и времето на нивното пристигнување.
Сите дополнителни информации заинтересираните граѓани можат да ги добијат на официјалната веб страница на Општина Илинден ([email protected]), како и во просториите на Општината.
Македонија
Минималната плата се зголемува за 1.667 денари
Минималната плата се зголемува за 1.667 денари на 26.046 денари нето плата, соопшти министерот за економија, Бесар Дурмиши.
Бруто платата за 2025 година беше 36.037 денари, а за 2026 година е 38.507 денари бруто односно 26.046 денари нето.
Дурмиши кажа дека со ова, платата се зголемува за 2.470 денари бруто односно за 1.667 денари нето.
Дурмиши појасни дека усогласувањето на минималната плата се врши секоја година во март врз јасно утврдена формула, 50 отсто од порастот на просечната нето плата исплатена од минатата година и 50 отсто од порастот на индексот на трошоците за живот според официјалните податоци од Ддржавниот завод за статистика.
Според објавените податоци, просечната исплатена нето плата бележи пораст од 9,6 проценти, додека индексот на трошоците за живот бележи пораст од 4,1 процент.

