Регион
Уапсен поранешниот претседател на Србија и Црна Гора, Светозар Маровиќ
Поранешниот претседател на Србија и Црна Гора, Светозар Маровиќ бил уапсен во четвртокот утрото, по налог на специјалниот државен обвинител, пренесуваат црногоските медиуми.
Според неофицијални информации, сегашниот претседател на политичкиот совет на црногорската Демократска партија на социјалистите бил уапсен во зградата на Вектра во Подгорица. Специјалниот државен обвинител Миловоје Катниќ претходно го навестил апсењето на Маровиќ, истакнувајќи дека идентификуван бил шефот на криминалната организирана група во Будва и најавил дека истрагата наскоро ќе биде проширена на повеќе случаи, пренесува црногорскиот портал ЦДМ.
„Обвинителството верува дека собра доволно докази за превземање на овие активности, а тоа е донесување на наредба за проширување на истрагата и во однос на организаторите на оваа криминална група“, рекол Катниќ.
Сите клучни актери во „Будванската афера“ признале дека се виновни за повеќемилионска штета на сметка на општина Будва и државата во повеќе одвоени постапки, наведува порталот. Во притвор веќе се синот на Маровиќ, Милош, потоа братот Драган и стрината Мирјана, а постапка се води и против неговата ќерка Милена Маровиќ Богдановиќ.
Синот на Светозар, Милош Маровиќ на почетокот на месецот беше префрлен во истражен затвор во Подгорицаи му беше одреден притвор од 30 дена поради сомневање дека е вмешан во незаконска продажба на државна земја во Будва, потсетуваат црногорските медиуми./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Србите објавија детали за дочекот на кинескиот претседател во Белград: „Вучиќ ќе му служи српски вина“
Претседателот на Кина, утре пристигнува во дводневна посета на Белград, а во тек се последните подготовки за неговото пристигнување.
Тој ќе биде придружуван од делегација од 400 луѓе, а ќе го обезбедуваат 3.400 полицајци.
„Блиц“ го објави планот за неговиот пречек.
Кси на аеродромот ќе биде пречекан со свечена церемонија и фолклор. Покрај патот во Белград ќе бидат поставени кинеско-српски знамиња, а на надвозниците ќе бидат испишани пораки.
Свечен дочек ќе биде организиран и пред Палатата Србија. Српскиот и кинескиот претседател ќе потпишат триесетина договори.
За време на ручекот ќе се служат српски јадења и вина, а претседателот Вучиќ лично ќе служи Џинпинг со српски вина, од пенливи до десертни вина, од кои повеќето се автохтони српски сорти.
Девојка од Србија ќе ја отпее песната „Татковино и јас“ на кинески, додека хорот „Чаролије“ ќе ја изведе песната „Прекрасен јасмин цвет“, исто така на кинески. .
Програмата ќе заврши со песната „Ова е Србија“, објави српскиот портал.
Регион
(Видео) Вo Шпанија уапсен еден од најбараните наркобосови во Србија
Шпанската полиција разби српска организирана криминална група осомничена дека го нападнала домот на ривалскиот клан од Србија минатиот јануари. Во акцијата беа уапсени 11 лица, меѓу кои и лидерот, по кого Србија распиша потерница уште во 2021 година.
Во провинциите Малага, Мадрид и Барселона се извршени апсења поради вмешаност во криминални дејствија – киднапирање, грабеж со насилство, недозволено поседување оружје, телесни повреди, фалсификување документи, трговија со дрога и членство во криминална организација.
Во акцијата на шпанската полиција одземени се три парчиња огнено оружјо. На некои им беа избришани сериските броеви. Запленети се и сто парчиња муниција, седум лажни лични документи, дрон и 16.000 евра во кеш.
Извршени се и седум претреси, од кои пет во Естепона.
Меѓу уапсените е и водачот на криминална група по која Србија распишала потерница во 2021 година. Тој е еден од најбараните луѓе во Србија.
Регион
300 милиони луѓе го гледале интервјуто на Вучиќ за кинеската телевизија
300 милиони луѓе го гледале интервјуто на српскиот претседател Александар Вучиќ за кинески CCTV.
Вучиќ во интервјуто посочи дека Србија може и треба да научи, како што наведе, „илјада работи од своите кинески пријатели“.
– Правиме големи подготовки за ЕКСПО. Кога управувате со земја имате високи цели. Секогаш мора да ги ставате новите цели на прво место. Ако сакаме да го постигнеме тоа, најдобар можен партнер за тоа отсекогаш била, и секогаш ќе биде, Народна Република Кина. Тука е и претседателот Кси, бидејќи тој секогаш го држи зборот. Го гледам како обичен, скромен човек, кога ќе вети нешто, го исполнува. Не можам да ви кажам дали имаме големи работи во железничкиот сектор, целокупната инфраструктура или индустрискиот сектор, економијата, туризмот, културата, но секако има илјадници работи што можеме и мораме да ги научиме од нашите кинески пријатели – рече Вучиќ во интервјуто за кинеската телевизија.