Секторот инспекторат од Општина Карпош во соработка со колективниот постапувач „Греен Роад“, денеска ја започна долго најавуваната акција за отстранување на отпадни (хаварисани) возила на територија на локалната самоуправа, кои воедно претставуваат и опасност по животната околина во која живеат карпошани.

Во таа насока инспекциските служби од Општина Карпош ги мапираа старите (хаварисани) возила, означувајќи ги со налепници на кои беше напишано известување до нивните сопственици, дека во рок од 10 дена се должни да го отстранат отпадното возило. Оттука, доколку тие не го отстранат возилото, инспекторите преку добиени информации од МВР доставуваат записник за идентификација и Решение за опомена со рок од пет дена да се отстрани возилото. Доколку и по тој рок не се реагира, колективниот постапувач го подига возилото.

Акцијата ја поздрави и градоначалникот на Општина Карпош, Стевчо Јакимовски, кој истакна дека оваа иницијатива ја поддржуваат голем дел од граѓаните на локалната самоуправа.

-Општина Карпош ја води акцијата за расчистување на хаварисаните возила на нашата територија за која мораме да спроведеме соодветна постапка. Во оваа пригода апелирам до граѓаните, сите возила кои што не се регистрирани, кои што зафаќаат несоодветно место или да ги регистрираат и да ги возат, или пак истите возила ние ќе мора да ги отстраниме. Постапката е таква да ги однесеме на соодветно место надвор од паркинг просторот каде што се тие, таму да чекаме отприлика 30-тина дена и потоа да видиме дали граѓаните ќе се интересираат за тоа возило или ќе треба да се спроведуваат нови постапки во кое што на крај возилото ќе оди на рециклирање. Не би сакале да имаме никакви немили настани нити пак непријатни разговори со граѓаните, но тие мора да водат сметка дека едно возило кое со години стои на едно место тоа практично ги оневозможува останатите граѓани да можат да го користат тој паркинг простор – објасни Јакимовски

Возилата ќе бидат транспортирани во собирен центар – депо, каде што ќе бидат оставени седум дена, а потоа ќе бидат однесени на рециклирање. Акцијата започна денеска од населбата Карпош 1 и ќе се одвива етапно, односно по отстранување на возилата во една урбана заедница ќе се продолжи во следната.

Инаку, во текот на месец декември и јануари, се мапирани 50 отпадни возила на територија на У.З. Карпош 1 и до денес се отстранети вкупно 35, додека за 11 возила се води инспекциска постапка. По истекот на роковите дадени во Решенијата за опомена ќе бидат подигнати и преостанатите возила, а оваа иницијатива предизвика голем интерес кај сопствениците за самоиницијативно отстранување на отпадните возила. Акцијата ќе трае до конечно отстранување на сите отпадни возила од територијата на Општина Карпош.

Градоначалникот на Општина Центар Горан Герасимовски денеска се сретна со 8 стипендистки од осум основни училишта во Центар по повод одбележување на Меѓународниот ден на жените и девојчињата во науката, 11 февруари.

На средбата, Герасимовски и стипендиските разговараа за постигнувањата во природните науки, за образованието, но и за препораките за некористење на мобилни телефони за време на настава.

„Чест ми е што денеска имав можност да ве запознаам и да поразговарам, со дел од вас се знаеме, добитнички сте на највисоката наградата „Феникс“ на Општината во делот на науката. Вие сте нашите стипендистки, нашата иднина и гордост во државата и ние како локална самоуправа ќе инвестираме во вашето знаење и во што поквалитетни генерации. Огромна благодарност до наставниот кадар за сето она што го работат, за целиот труд и посветеност кон вас учениците, што придонесуваат од овие училишни клупи да излезат што поквалитетни и подобри генерации. Бидете упорни, вложувајте во себе, правете го тоа што го сакате, јас сум сигурен дека ќе успеете во соновите што ги сонувате“, рече Герасимовски.

Наставниот кадар и учениците, ја поздравија мерката за одземање на мобилните телефони за време на наставата. Тие потенцираат дека учениците се пофокусирани и активни на часовите. Општина Центар е првата општина во државата што препорача да не се употребуваат мобилни телефони за време на наставниот процес.

Мобилната апликација, што ја разви Министерството за образование и наука, им овозможува на родителите и старателите на учениците едноставен пристап до електронскиот дневник и со тоа лесно и на дневна основа да го следат образовниот напредок на децата.

За оваа новина денеска информира министерката за образование и наука, Весна Јаневска, која рече дека апликацијата овозможува увид во распоредот и содржината на часовите на учениците, во редовноста на наставата – оправдани и неоправдани изостаноци, зададените домашни задачи, добиените оценки и издадените свидетелства.

„Апликацијата може да се симне на ednevnik.edu.mk или преку банер поставен на веб-страницата на Министерството и да се инсталира на кој било паметен уред, мобилен телефон или таблет, независно од типот на оперативниот систем. Едноставна е за користење и преку најава и автентикација со истото корисничко име и лозинка, кои во моментот ги користат за пристап до електронскиот дневник, над 200 илјади родители и старатели, колку што се регистрирани досега, во секое време може да имаат брз пристап до информации за образовниот процес на нивните деца“, рече Јаневска.

Министерката посочи дека сите податоци што се внесуваат во електронскиот дневник се архивираат и корисникот на апликацијата има увид во податоците од тековната, но и од која било учебна година.

„Веќе ја тестиравме и се уверивме во функционалноста на апликацијата. Сигурна сум дека ќе биде многу користена затоа што нема родител или старател што не е заинтересиран да го следи и да учествува во образованието на своето дете. Одговорноста за едукацијата на младите е заедничка и еднаква и на институциите, и на семејствата, и на учениците“, потенцира таа.

Јаневска рече и дека за каква било корисничка поддршка при најавување, заборавена лозинка или дополнителни појаснувања за примената на новата апликација стручен тим на Министерството за образование и наука е достапен во секое време на електронската адреса [email protected].

Со цел намалување на административната работа на наставниците, Јаневска информира дека податоците од електронскиот дневник ќе ги печатат само еднаш годишно, односно на крајот на учебната година наместо како досега на месечна основа.

Министерството за образование и наука работи на забрзана дигитализација на образовната сфера. Во оваа насока министерката посочи дека набргу почнува пилотирањето на новиот електронски систем за административна работа на училиштата и електронскиот дневник во повеќе училишта пред да бидат официјално применети.

„Подготвуваме неколку електронски регистри, кои ќе се користат за потребите на науката, за признавање странски високообразовни квалификации и за евидентирање стипендирани македонски студенти во странство и нивно поврзување со работодавци. Паралелно продолжуваме со обезбедување квалитетна ИТ-инфраструктурна мрежа во училиштата, нови дигитални алатки во наставата, а ќе продолжи и дигитализацијата на учебниците“, додаде Јаневска.

Изрази задоволство што некои од образовните услуги се целосно дигитализирани. Од оваа учебна, односно академска година, првпат целосно електронски се спроведуваат постапките за аплицирање и стекнување ученички и студентски стипендии, како и за сместување во ученички и студентски домови. Повеќе нема доставување хартиени документи ниту од страна на апликантите ниту хартиени решенија за прифаќање или одбивање од страна на Министерството, нагласи Јаневска.