Сите началници на гинеколошко-акушерските одделенија во болниците и здравствените домови во државата, како и раководните тимови на професори од Клиниката за гинекологија

Сите началници на гинеколошко-акушерските одделенија во болниците и здравствените домови во државата, како и раководните тимови на професори од Клиниката за гинекологија и Специјалната болница за гинекологија – Чаир денеска биле повикани на вонреден состанок со Министерот за здравство, Бујар Османи.

Истовремено течат и инспекциски надзори на Државниот санитарен инспекторат во болниците во Прилеп, Гостивар и Тетово, информираат од Министерството за здравство.

Во болницата во Гостивар денеска бил испратен и стручен тим, на чело со државниот секретар во МЗ, Зоран Стојановски и директорот на Државниот санитарен и здравствен инспекторат, Шемси Муса за да се утврди состојбата во родилиштето и да се испита евентуална одговорност на медицинскиот персонал.

Од здравство информираат и дека, Османи ги разрешил двајцата директори на општата болница во Прилеп, по што ќе биде назначен привремен раководен тим.

„Главна задача на новото привремено раководство на болницата е детално да ја скенира состојбата во прилепската болница и во рок од две недели да достави целокупен извештај до Министерството за здравство за состојбите во болницата, со посебен акцент на третманот на пациентите“ се вели во соопштението на Министерството за здравство.

Министерството покрена обемна истрага за случаите со родилките откако, во рок од три месеци починаа три родилки во болницата во Прилеп и уште две во Тетово и Гостивар. /крај/со/фф