Во четврток во германската престолнина Берлина се одржува конференција посветена на западен Балкан на која ќе учествуваат претседатели на држави и влади и министри на дипломатиите и на економските ресори од шест западнобалкански земји, како и челниците на Европската комисија, Германија и Австрија а ќе биде направен обид за поттикнување нови импулси во продлабочување на меѓусебната соработка на земјите од регионот.

„Откако германската канцеларка Ангела Меркел во јули во Дубровник учествуваше на средбата на шефовите на држави и влади на земјите од западен Балкан во рамките на процесот Брдо-Бриони, сега заеднички со министерот за економија Зигмар Габриел и министерот за надворешни работи Франк-Валтер Штајмнмар ќе биде домаќин на шефовите на владите, министрите за надворешни работи и на министрите за економија на шесте земји од западен Балкан и на Хрватска и Словенија“, се наведува во соопштението на германската влада.

„Притоа, во прв ред станува збор за јакнење и поддршката на меѓусебната соработка на земјите во регионот. Германија стои зад ветувањата во врска со европската перспектива за сите земји од западен Балкан“, се додава уште во соопштението. На конференцијата, исто така, ќе се разговара и за приближувањето на Европа, како политички така и економски, но со особено внимание на прашањата на правната држава. Притоа Берлин го повторни досегашниот свој став дека поддржува приближувањето на сите земји од регионот.

Конференцијата почна претпладнето со состанокот на ресорните министри во министерството за економија на коеј воведен збор има германскиот вицеканцелар и министер за економија Зигмар Габриел, а ќе бидат одржани две расправи на темите „Енергија, технологија и инфраструктура – економската соработка во регионот“ и „Поттикнување на вработувањето, средното претприемништво и инвестициите“ на која Македонија ќе ја претставуваат вицепремиерот Владимир Пешевски и министерот за економија Беким Незири.

Министрите за надворешни работи ќе ги прими шефот на германската дипломатија Франк-Валтер Штајнмаер. Попладне исто така без присуство на медиумите во блокот за надворешната политика ќе се расправа за регионалната соработка, ЕУ и отворените прашања, на кој ќе учествува министерот за надворешни работи Никола Попоски.

Истовремено, во германската влада канцеларката Ангела Меркел ќе ја одржи главната пленарна седница со премиерите на земјите од регионот вклучувајќи ги Словенија и Хрватска, на која ќе учествува премиерот Никола Груевски. И овие разговори се затворени за јавноста, но според германски медиуми, ќе биде дискутирано за политички теми односно ситуацијата и проблемите во регионот.

По пленарката најавена е прес-конференција на Меркел со Баросо и албанскиот премиер Еди Рама, како актуелен претседавач со Процесот за соработка во Југоисточна Европа.

Вечерта на распоредот е работната вечера во присуство на претседателот на Европската комисија Жозе Мануел Баросо и еврокомесарот за проширување Штефан Филе, со што се завршува еднодневната конференција.

Според најавите не се очекуваат големи заклучоци и документи, освен позитивната порака преточена во конкретен ангажман за економски развој на западен Балкан. Се очекува овој своевиден самит да прерасне во годишна конференција за западен Балкан во рамките на Европската унија, чиј организатор следната година би требало да биде Австрија.

Пред конференцијата Баварската радио-телевизија имаше прилог во кој истакна дека оваа конференција се одржува во моментот кога Германците не се расположени за проширување и кога земјите од западниор Балкан главно се споменуваат во негативен контекст поврзан со енормниот раст на бројот баратели на азил од овие земји.

„Надежите на сите земји од Балканот се концентрираа на економски најсилната земја во Европската унија. Ангела Меркел е свесна за тоа дека ветувањето за овие земји за влез во Европската унија избирачите дома ги заплашува. Но ниту Германија не се ангажира без размисли за сопствена полза. Балканските војни не лежат така дамна во минатото, а економски гледано влегувањето на тие земји во ЕУ ја дава можноста за инвестирање и отворање на нови пазари. На крајот, станува збор и за стратешка одлука за создавање конкуренција на влијанието на Русија, Турција и некои арапски земји врз земјите во регионот“, заклучува во прилогот Bayerische Rundfunk. /крај/мф/сн