Премиерот на Република Македонија, Никола Груевски денеска остварил средба со вицепремиерот и министер за надворешни работи на Чешката Република, Јан Кохоут, соопштуваат од кабинетот на премиерот

На средбата двајцата соговорници изразиле задоволство од одличните билатерални односи помеѓу Република Македонија и Чешката Република во низа на сфери од заеднички интерес, за што сведочат бројните остварени средби на високо ниво, како и отворената и континуирана поддршка од Чешката Република во процесот на пристапување на Република Македонија во Европската Унија, стои во соопштението од Владата на Република Македонија.За време на средбата, премиерот Груевски ги презентирал главните непосредни приоритети на Владата во однос на европската интеграција до крајот на годината и тоа добивање препорака од Европската комисија за почеток на пристапните преговори, проследена со соодветна одлука од Европскиот Совет, целосна реализација на процесот на визна либерализација до крајот на оваа година и добивање акредитација за децентрализирано управување со средствата од ИПА програмата за преостанатите компоненти. Од страна на чешкиот министер Кохоут била реафирмирана јасната и недвосмислена поддршка што Чешката Република и ја дава на Република Македонија во процесот на европските и евро-атлантските интеграции.Во соопштението се додава дека на средбата двајцата соговорници размениле мислења и околу искуствата што Владите на двете држави ги имаат во доменот на справувањето со последиците од светската економска криза, при што била искажана и потребата од интензивирање на економската соработка помеѓу компаниите од двете држави, за што постојат добри предуслови.