На собраниската Комисија за надворешни работи, денеска, амбасадорот Рикер ги изрази своите надежи дека американската политика кон Македонија нема да се промени, но рече дека уште е рано да се знае како ќе настапи администрацијата на Обама

Американскиот амбасадор во Македонија, Филип Рикер, не сакаше да ги потврди надежите на Македонија дека американската политиката ќе продолжи со поддршката на државава, по доаѓањето на Барак Обама на местото на претседател на САД. Признавањето на Косово од страна на Македонија, според Рикер, е добар потег. Тој порача Македонија да води своја политика во правец на ЕУ и НАТО интеграциите, и да најде заедничко решение со Грција за проблемот со името. Според него, изборот на Афроамериканец за претседател на САД, само ќе ја зацврсти позицијата на лидер во светот на неговата држава. „Најголем број од државните службеници ќе останат на своите работни места за да продолжи континуитетот на работата, со што САД покажува дека ја надмина теснополитичката состојба“, рече Филип Рикер. Тимот на Обама, побарал од сите амбасадори на САД во светот, да испратат допис за состојбите во земјите во кои работат, при што Рикер рече дека ќе направи се што е можно да ги прикаже состојбите во Макеонија реално. Владо Бучковски од СДСМ, изрази сомневање во продолжувањето на позитивната политика на САД кон Македонија. „Не верувам дека Македонија може да биде поддржувана како до сега од САД“, рече Бучковски. Американскиот амбасадор смета дека Македонија има многу пријатели во Конгресот на САД и дека тие ги поддржуваат напорите на Македонија во спорот со името со Грција, но рече дека најважно е двете земји да изнајдат решение со медијаторство на евроамбасадорот Метју Нимиц. Влатко Ѓорчев од ВМРО-ДПМНЕ сакаше преку анегдота да му ги пренесе гледиштата на Македонија во однос на името. Тој раскажа како на трибина во источниот дел на Македонија, некој постар човек рекол дека неговото име, што му го дале мајка му и татко му, е Димитар, за така да го викаат другите, а не сам да се нарекува така. На што, амбасадорот Рикер, рече, “Димитар, во САД би бил Џејмс, а луѓето што го носат тоа име ги нарекуваат Џим, Џими, и тоа се однесува на истата личност. Идентитетот не е сменет. Јас работам со еден Димитар и му се ибраќам со Митко. Познавам многу Митковци“. Амбасадорот Рикер ја поздрави одлуката на Македонија да го признае Косово, со што, како што рече, Македонија добива близок сосед за пријател. Според него, Косово треба да биде мултиетничка држава, а за тоа САД треба да ги реши разликите во ставовите со Србија. Тој направи паралела на изборите кај нас и оние во САД, при што рече дека следните локални и претседателски избори треба да се спроведат без инциденти, како што веќе Македонија ги имаше во 2006 година. „И САД пред осум години имаше лошо спроведени избори кога имавме проблеми во Флорида, но тоа треба да се избегнува“, рече Рикер. Во своето излагање тој посочи дека САД, со изборот на Барак Обама за претседател, направиле голем чекор напред во однос на расните предрасуди и дека им требале 50 години да стигнат на тоа ниво. „Пред педесет години, да се има Афроамериканец за претседател, беше незамисливо. Сега, само имагинацијата ни е граница“, рече Рикер, порачувајќи и на Македонија да се грижи за своите ставови и цели, што вклучуваат интеграции во Европската Унија и НАТО, а не за Грција. Тој повтори дека САД сметаат дека местото на Македонија е во НАТО.