Слаб беше интересот на купувачите на државните акции во „Македонски телекомуникации“ што вчера беа понудени на продажба по парче на Македонската берза.

Слаб беше интересот на купувачите на државните акции во „Македонски телекомуникации“ што вчера беа понудени на продажба по парче на Македонската берза. На јавната берзанска аукција се продадоа 270.504 акции со 240 трансакции за 109 милијарди денари, односно за околу 1,8 милион евра. Ова претставува 5,28 отсто од вкупно понудените 5.295.090 акции или 0,29 отсто од вкупниот капитал на „Македонски телекомуникации“. Тргувањето се одвиваше без наддавање, па акциите се продадоа по понудената цена од 390 денари за една акција. Остатокот од пакетот со 5,52 отсто државни акции што останаа непродадени ќе бидат повторно понудени на Берзата денеска и утре.

Инвеститорите купуваа од една акција за 6,36 евра до 5.295 акции за 33 илјади евра, колку што е максимумот што може да се купи со еден налог на брокер. Бидејќи еден купувач може да достави повеќе налози, точниот број на идните нови акционери во телекомот ќе се знае кога купувачите ќе ги уплатат парите и ќе бидат впишани во Централниот депозитар на хартии од вредност. Рокот за плаќање истекува три дена по денот на трансакцијата.

На вчерашната јавна берзанска аукција, немаше заинтересирани купувачи за пакетот со 9,9 отсто државни акции во телекомот, кој остана непродаден во вторникот и за третиот пакет што вчера беше првпат понуден.

Министерот за економија Фатмир Бесими вели дека овие два пакета со вредност од по 60,3 милиони евра ќе бидат ставени на продажба денеска и во петок.

Берзанските експерти велат дека слабиот интерес за слободните акции во телекомот се должи на претпазливоста на инвеститорите и недоволните информации дали ќе имаат право на дивиденда од минатогодишниот профит.