И по девет години од терористичкиот напад на 11 септември 2001 година на Њујорк и Вашингтон, САД сè уште веруваат дека Ал-Каеда е главна закана по нивната безбедност.

И по девет години од терористичкиот напад на 11 септември 2001 година на Њујорк  и Вашингтон, САД сè уште веруваат дека Ал-Каеда е главна закана по нивната безбедност.

Според најновиот  извештај за состојбата за безбедноста, изнесен на неодамна одржаната панел дискусија на која присуствувале голем број американски експерти, најголемиот дел на извештајот бил посветен на улогата на американските државјани поврзани со Ал-Каеда и со сродните терористички организации во светот.

Во извештајот стои и фактот дека во земјата се наоѓаат сè поголем број на терористи и припадници на милитантните исламистички организации кои не припаѓаат ниту на една етничка или верска заедница и не се вклопуваат во ниту еден познат социјален или економски профил, поради што е тешко да се лоцираат и откријат.

САД  како што наведуваат експертите, се соочени со раширена мрежа на потенцијални терористи способни за сите видови на напади, поставување на автомобилски бомби, симултани напади на бомбаши самоубијци, поединечни пресметки со огнено оружје или кражби на авиони, но нивните методи не се ни приближно софистицирани во споредба со нападот од 2001 година.

Поради тоа и превентивната акција за спречување на таквите напади бара поактивна организација и вклучување на државните органи, но и на локалните единици и поединци.

Извештајот за потенцијална опасност од терористички напади го објави Групата за национална подготвеност, со која претседаваат поранешни високо позиционирани владини претставници Ли Хамилтон и Том Кен, своевремено и членови на комисијата за истражување на нападот од 11 септември.

Тие предупредуваат дека Ал-Каеда и понатаму има потенцијал да убие десетици илјади луѓе со еден напад, а оти масовните жртви на тлото на САД за нив има посебна тежина.

Во истиот извештај се предупредува и како посебна опасност се претставува фактот дека идеологијата и методологијата на работата на Ал-Каеда навлезе во многубројни милитантни исламистички организации во светот, кои го прифаќаат нејзиниот начин на работа.

Поради тоа САД во последниве неколку години доби нови непријатели против кои не е лесно да се бориш, тврдат експертите за сигурност на САД.

Терористичките напади од 11 септември 2001 биле координирани терористички напади на неколку видни цели во САД организирани од Ал-Каеда.Терористичката група се состоела од вкупно 19 учесници од арапските земји, од кои повеќето биле од Саудиска Арабија. Тие, управувајќи четири киднапирани патнички авиони полни со гориво, се урнале во кулите-близначки на Светскиот трговски центар во Њујорк и во зградата на Пентагон близу до Вашингтон.

Како резултат на пожарот што настанал од авионското гориво, дошло до структурни оштетувања на кулите во Њујорк, после што и двете кули се урнале, по нив и две соседни згради, а уште три згради биле тешко оштетени./крај/ин/бд