Европа
Bild: Германија годинава може да прими 1,5 милиони бегалци
Иако уште на почетокот од летото официјално се споменуваше бројката од 400.000 лица, Германија до крајот на 2015 би можела да се соочи со повеќе од 1,5 милиони бегалци, пишува во понеделникот весникот Bild повикувајќи се на извори во германската влада.
„Во последниот квартал од оваа година се очекува пристигнувањето на 920.000 бегалци во Германија. Досега се очекуваше дека во претстојниот зимски период бројот на бегалците ќе падне, но на основа на прогноза од теренот до крајот на годинава се очекува константен силен прилив од бегалци“, пишува Bild цитирајќи ги своите извори во германската влада.
Во документот кој потекнува од неименуван сектор во владата, исто така, се изразува стравувањето дека би можело да дојде до „колапс на системот за снабдување“ на бегалците“. Веќе сега недостасуваат санитарни и капацитети за сместување.
Според последната процена на германските власти, во земјата годинава би требало да пристигна вкупно 800.000 бегалци, а до почетокот на летото се оперираше со бројката од 400.000 лица. Бројката од 1,5 милиони бегалци првпат ја спомена во разговорот за дневниот весник Welt am Sonntag премиерот на сојузната покраина Мекеленбург-Ворпомерен, Лоренц Кафиер.
Германскиот министер за внатрешни работи Томас де Мезиер одбил да даде конкретни процени, појаснувајќи дека засега не е возможни да се зборува за сигурни бројки, бидејќи голем дел од бегалците избегнуваат да бидат регистрирани или, и покрај доделеното место за престој, заминуваат во некој друг дел од Германија.
Изминатиот викенд на истокот од Германија, делот од земјата во кој веќе традиционално владее поголема нетрпеливост кон странците, илјадници граѓани се собраа изминатиот викенд на протестите против доселениците. Во местото Себниц, на германско-чешката граница, и во неделата доцна попладнето се собраа околу 2.500 луѓе кои со овој чин сакаа да подигнат „жива граница“ за да го спречат доаѓањето на новите бегалци. Во градот Шемниц околу 1.000 демонстранти се собраа на „маршот на молкот“ протестирајќи против планираното сместување на бегалци во една населба во која за време на ИСточна Германија биле сместени пионери.
Во меѓувреме претставниците на двете најголеми цркви во Германија, протестантската и Католичката, застанаа во одбрана на политиките на конзервативната канцеларка Ангела Меркел којашто, поради нејзиното отворено благонаклоно однесување кон бегалците, е на жесток удар на критичарите, како од нејзината владејачка Христијанско-демократска унија (CDU/CSU), така и од коалицискиот партнер Социјалдемократската партија на Германија (SPD) .
„За дваесетина години ќе се присетуваме на овие денови“, изјави претседателот на Германската бискупска конференција Рајнхард Маркс во разговорот за весникот Sueddeutsche Zeitung изразувајќи пофалби за хуманитарниот став на Германија и на нејзините граѓани. Маркс, исто како и претседателот на Советот на протестантската црква Хајнрих Бедфорд-Штром, ја брани истрајноста на Меркел да се задржи правото на политички азил во формата во којашто е во моментов дефинирано во германскиот устав.
Истовремено од редовите на германската опозиција пристигнуваат жестоки критики на наводниот планиран договор меѓу Европската унија и Турција за решавање на бегалската криза. Партијата Зелени изрази стравување дека планираниот договор меѓу Брисел и Анкара за задржување и враќање на бегалците во Турција, би можел да оди на штета на човековите права во оваа земја.
„Ердоган ќе прими поголем дел од бегалците, а за возврат ние ќе ги затвориме двете очи кога ќе се кршат човековите права, во прв ред на Курдите, во Турција“, изјави претседателот на пратеничката група на Зелените во Бундестагот, Антон Хофрејтер, во разговорот за јавниот сервис ARD./крај/мф/сн
Извор: Hina
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Грузија сака да донесе закон за „странски агенти“, oфицијален претставник на ЕУ: Неприфатливо
Висок функционер на Европската унија денеска ја предупреди грузиската влада дека предложениот закон за „странски агенти“ е неприфатлив и ќе претставува пречка во напорите на земјата да се приклучи кон ЕУ, доколку биде усвоен во сегашната форма.
Грузискиот парламент вчера го усвои законот во второто читање, за кој опозицијата вели дека е инспириран од Кремљ, додека полицијата употреби солзавец и шок-бомби за да ги растера толпата демонстранти.
Владата смета дека законот е неопходен за да се гарантира транспарентно странско финансирање на невладините организации.
Секоја вечер, речиси еден месец, се поголем број демонстранти излегуваат на улиците. Вчера десет илјади демонстранти го блокираа центарот на Тбилиси на најголемиот антивладин митинг организиран досега.
Герт Јан Купман, директор на Управата за проширување на Европската комисија, за новинарите во главниот град на Грузија изјави дека Брисел ја следи ситуацијата и е загрижен за тоа што се случува.
„Гледаме загрижувачки случувања кога станува збор за законодавството. Законот за транспарентност, кој беше усвоен во второ читање, е неприфатлив во сегашната форма и ќе создаде сериозни пречки на патот кон пристапување во ЕУ“, рече Купман.
„Но, има уште време. Во септември ќе излеземе со препораки дали да ги започнеме пристапните преговори со Грузија и да објавиме извештај во октомври и ноември, така што има уште време. Но, сега топката кај владата“, додаде тој.
Грузискиот парламент се очекува да го разгледа законот во третото читање за околу две недели.
Европа
Русија: Не ја гледаме поентата на мировната конференција во Швајцарија
Русија објави дека не ја гледа поентата на конференцијата за прекин на огнот во Украина што Швајцарија ја планира за средината на јуни и на која Москва не беше поканета. Швајцарската влада соопшти дека Русија „во овој момент“ не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Портпаролот на Кремљ, Дмитриј Песков, нагласи дека Москва не ја смета за веродостојна иницијатива.
„Не разбираме каква пресвртница би била таа мировна конференција“, им рече тој на новинарите. „За каква конференција зборуваме, за каква сериозна конференција со сериозни очекувања дека ќе има некакви резултати, без учество на Русија?
„Тоа е целосно невозможно и јасно е дека тоа е некаква иницијатива која не е фокусирана на резултати“, заклучи тој.
Швајцарската влада соопшти дека „мировниот процес не е можен без Русија. Украина, од друга страна, ги доведува во прашање придобивките од руското учество на состанокот што ќе се одржи во близина на градот Луцерн.
„Знаеме дека нема смисла да ја имаме Русија на маса ако не можете да се осигурате дека таа ќе дејствува со добра волја“, рече шефот на украинската дипломатија Дмитро Кулеба минатата недела во интервју за магазинот „Форин полиси“.
Кулеба смета дека создавањето дополнителен притисок врз Русија на бојното поле и обединувањето на земјите „кои ги делат принципите“ ќе помогнат Русија да биде подготвена да учествува во дијалогот.
Европа
Макрон не ја исклучува можноста за испраќање војници во Украина доколку Русија „ја пробие линијата на фронтот“
Францускиот претседател Емануел Макрон во интервју за Економист изјави дека не ја исклучува можноста за испраќање војници во Украина доколку Русија „ја пробие линијата на фронтот“ и ако Киев тоа го побара од Париз, пренесува BFMTV.
„Доколку Русите ги пробија првите линии на фронтот и ако има украинско барање – што не е случај денес – би било легитимно да се постави тоа прашање“, рече Макрон.
Веќе во февруари, Макрон ја покрена можноста за испраќање западни трупи на украинска територија, потсетува БФМ.
„Како што кажав, не исклучувам ништо бидејќи има некој од другата страна кој не исклучува ништо. Без сомнение, бевме премногу сомнителни кога ги дефиниравме границите на нашата акција”, рече францускиот претседател.
Макрон рече дека „априори отфрлањето“ на можноста за испраќање војници би значело дека „не се научени лекциите од последните две години“, бидејќи во летото 2022 година биле против испраќање тенкови, ракети со долг дострел и авиони. и сега сето ова го испорачуваат во Украина.
„Имам јасна стратешка задача: Русија не смее да победи во Украина. Ако Русија победи во Украина, нема да има безбедност во Европа“, додаде тој.
„Кој може да тврди дека Русија ќе застане таму? Каква безбедност има за другите соседни земји, Молдавија, Романија, Полска, Литванија и толку многу други? И тогаш, каков кредибилитет има за Европејците кои би потрошиле милијарди, велејќи дека тоа е опстанокот на континентот и не би обезбедиле средства за запирање на Русија. Така да, не треба ништо да исклучуваме“, истакна Макрон.