Станко Суботиќ-Цане, еден од најпознатите српски транзициски богаташи, е

првоосомничен во акцијата за уништување на шверцот со цигари на српската

полиција, позната како „Мрежа“, а профитот бил перен преку македонски, кипарски

и црногорски фирми, потврдија од Министерството за внатрешни работи на

северниот сосед.

СПОРЕД АКЦИЈА НА СРПСКАТА

ПОЛИЦИЈА

Станко Суботиќ-Цане, еден од најпознатите српски транзициски богаташи, е

првоосомничен во акцијата за уништување на шверцот со цигари на српската

полиција, позната како „Мрежа“, а профитот бил перен преку македонски, кипарски

и црногорски фирми, потврдија од Министерството за внатрешни работи на

северниот сосед.

Неофицијално во Белград потврдуваат дека операцијата била водена со помош на

македонската полиција и со Дирекцијата за спречување перење пари.

– Деталите не ги знам, односно тоа што ме прашувате како биле перени парите

преку Македонија, но можам да кажам дека засега откривме дека околу 40 милиони

евра се испрани од шверц на цигари. Сигурни сме дека кога ќе заврши акцијата

таа сума ќе биде многу поголема – вели Драгана Кајганиќ, портпаролка на

српското МВР.

Во македонското МВР без конкретен одговор.

– Во принцип, ние соработуваме со сите полиции – изјави Иво Котевски,

портпаролот на МВР, на прашањето дали нашите инспектори работеле заедно со

нивните српски колеги.

Ване Цветанов, директорот на Дирекцијата за спречување перење пари, е добро

запознаен со операцијата „Мрежа“.

– Информациите што ги барате од мене се тајна. Не можам ништо да ви кажам –

кратко одговори Цветанов.

Според соопштението на српското МВР, уапсени се Миодраг Завишиќ, поранешен

началник на Центарот за безбедност во Нови Сад, Милан Попивода и Ивана Олујиќ,

кои учествувале во нелегалната дистрибуција на цигарите. Приведени се и

двајцата цариници Небојша Николиќ и Драге Додески, Македонец со српски пасош,

кој останал да работи во Србија по распадот на СФРЈ. Бил отпуштен од работа

поради злоупотреби. Уапсен бил и Мирослав Пешиќ, вработен во претпријатието

„МИА“ од Уб, сопственост на Суботиќ, и Милан Милановиќ Мргуд, поранешен државен

функционер.

На сите им е одреден притвор во траење од 48 часа. Во секој момент се очекува и

апсењето на шефот Суботиќ. Полицијата не можела да го најде во семејната куќа

во градот Уб.

Шверцот се однесува на периодот од 1995 до 1997 година. Суботиќ во тој период

го почнал бизнисот со отворање фришопови на граничните премини со Македонија и

Бугарија, кои работеле во рамките на неговата фирма „МИА“. Суботиќ на српската

јавност и е познат по тоа што се фалел дека знае оти ќе биде уапсен ама не се

плашел.

А.Б.

ВАЦ

критикувани оти работат со Суботиќ

Германскиот медиумски конзорциум ВАЦ, кој поседува неколку дневни весници

во Србија и во Црна Гора, долго време бил на удар на јавноста, но и на свои

вработени, затоа што со Суботиќ ја формирале заедничката фирма „Футура плус“.

Суботиќ бил сопственик на многу киосци во Србија преку кои се продавале

изданијата на ВАЦ. Тој веќе бил на лош глас во Србија поради ова, а се обидувал

фирмата „Футура плус“ да ја прошири и во Црна Гора, но не успеал.

На создавањето на заедничката фирма најмногу се бунтувале вработени во

црногорскиот весник „Вијести“, кој исто така е дел од ВАЦ.

„Време“ вчера се обидуваше да добие коментар од Вернер Хериќ, директор на ВАЦ

за Србија и Црна Гора и воедно прв човек на дневниот весник „Политика“.

Неговата секретарка ни објасни дека тој е на состаноци и дека ќе ја искористи

првата пауза да ни се јави. До затворањето на весникот тоа не се случи.