За првите шест месеци од годинава во земјава се влезени 3 милиони литри млеко од БиХ

За првите шест месеци од годинава во земјава се влезени 3 милиони литри млеко од БиХ

Во скопските маркети може да се набави „алпско млеко“ на „Љубљанске млекарне“ кое, според приложената производствена декларација, е произведено во Босна и Херцеговина, поточно во Тузла, од страна на тамошниот производител „Продхо“, акционерско друштво за преработка и промет со млеко. Исто така, се наведува дека земја на потекло е БиХ. Македонските власти испитуваат дали зад ваквите и слични пратки кои во земјата влегуваат со повластен третман, всушност, се увезува млеко од Словенија, која како членка на Европската унија во трговската размена со Македонија ги нема привилегиите што важат за Босна и Херцеговина. Како што е познато, денеска треба да биде објавено дали Македонија ќе ја спушти рампата за слободниот увоз на босанско млеко. Одлуката ќе биде донесена врз основа на потврдување на сомневањата дека босанското млеко што влегува без царина, всушност, е словенечко млеко, со што се прекршува еден од основните принципи на Договорот за слободна трговија, поврзан со потеклото на производот. Премиерот Владо Бучковски за денеска најави дека треба да стигнат доказите дали се манипулира со увозот на словенечкото млеко, препакувано во Босна.

Според Царината, за првите шест месеци од годинава во земјава се влезени 3 милиони литри млеко од БиХ. Преработувачите на млеко одамна укажуваа на овој проблем и неконтролираниот увоз на босанско млеко, што ја намалува нивната конкурентност на пазарот, но до скоро никој не реагираше.

„Во земјава секој ден влегуваат по 30-40 тони млеко од Босна. Тоа е двојно субвенционирано и при производство и при извоз, што н` става во позиција да се бориме со нелојална конкуренција и полека ја губиме битката“, велат претставниците на млекарите.

За да се докаже потеклото на стоката, постојат неколку начини.

„Проверката на потеклото на млекото може да се направи преку испраќање експертски тим во Босна кој ќе провери колку се произведува млеко таму, колку се увезува, а колку се извезува, па врз основа на тие статистички споредбени резултати, може да се согледа колку од она што се извезува е домашно или увезено млеко. Во секој случај, станува збор за примена на меѓународни стандарди за испитување на потеклото, кои не се косат со никои принципи, а право на секоја држава е да го провери потеклото на стоката и да преземе мерки за забрана доколку се сомнева и потврди дека принципите се прекршени“, вели заменик-министерот за земјоделство, Санде Џамбазовски.

Според податоците на Царинската управа, за три и пол месеци од минатата година увозот од Босна бил зголемен дури за 32 проценти во однос на претходниот период, а трендот на раст на увозот продолжува и оваа година. Според с` уште непотврдени информации, станува збор за увоз на словенечко млеко пакувано во Босна и Херцеговина, кое во Македонија влегува со нула царина. И додека од другите земји од нашето опкружување и ЕУ, имаме дури 30 проценти увозни давачки, само со Босна увозот на млеко не се царини, што е и предвидено со Договорот за слободна трговија. Поради ова, Словенија го пресели делот за полнење, при што своето млеко го полни во босанска амбалажа и го извезува во Македонија без царина. На тој начин, Словенија се ослободува од вишокот млеко без царински давачки, а Македонија се полни со босанско млеко, односно со словенечко, додека кај нас се јавува вишок млеко кое земјава го увезува од Босна.

Според Царината, со ваквата трансакција се доведува во прашање точноста на ЕУР, со оглед на тоа дека правилото за потекло предвидува алпското млеко увезено од Босна да потекнува од алпски крави, кои во Босна ги нема. Царината веќе реагирала и побарала одговор од босанската страна, која, пак, ја потврдила автентичноста на ЕУР-сертификатот.