Филм
Канската Златна палма 2014-та за ‘Зимски сон' на Нури Билге Џејлан
Златната палма на еден од најпрестижните филмски фестивали во светот кој се одржува во Кан на францускиот Азурен брег за 2014 година ја освои турскиот филм „Зимски сон” на режисерот Нури Билге Џејлан, објавија во саботата навечер актерката Ума Турман и режисерот Квентин Тарантино.
Џејлан, чиј тричасовниот филм победи во конкуренција на 18 филмови во официјалната програма, а го истражува голем раскол меѓу турските моќници и сиромашните, забележа дека наградата пристигнала во време кога се прославуваат стоте години од турската кинематографија и ја посвети на „оние коишто изминатите години ги загубиле животите”, и додаде дека мисли на младите од својата земја.
Канскиот Гран при, што се смета условно како втора награда на фестивалот, ја освои филмот „Чудесија” (Le Meraviglie) на Алис Рорвакер, а за најдобар режисер е прогласен Бенет Милер со филмот „Ловец на лисици”(Foxcatcher).
Награда на жирито добија и „Мама” (Mommy) на Ксавиер Долан, филм за самохрана вдовица која се мачи во одгледувањето на синот и „Збогум на јазикот”(Adieu au language) на Жан-Лук Годар.
Русите Андреј Звјагинцев и Олег Мегин ја добија наградата за сценарио за филмот „Левијатан”.
Тимоти Спол е награден за најдобра главна машка улога во филмот „Господинот Тарнер”(Mr. Turner), британска биографска драма за уметникот Џ.М.В Тарнер. Џулиан Мур, пак, е најдобра актерка за сатиричната драма „Ѕвездена мапа”(Maps to the Stars) на Давид Кроненберг.
Малата Златна палма за најдобар краткометражен филм ја доби „Леиди „(Leidi) на колумбискиот режисер Симон Мес Сото.
Наградата Златна камера им е доделена на тројца француски режисери, Мари Амаѓукел, Клер Бурж и Самуел Теис за филмот „Девојки за забава”(Party Girls). Оваа награда вообичаено се доделува на млад режисер за прва долгометражен уметнички филм.
„Изборот беше извонредно разнолик, од класични филмови до радикални и оние кои проговоруваат за иднината на кинематографијата”, изјави членот на жирито, данскиот режисер Николас Виднинг Рефн.
Филмскиот критичар на американскиот магазин The Hollywood Reporter, Стјуард Кемп испрати текстуална порака дека „наградите не изненадија, отидоа на предвидливите места”.
Во долгата историја на Канскиот филмски фестивал, триумфот на „Зимски сон” е само вториот на некој турски филм кој ја освоил Златната палма. Првпат тоа им успеа во 1982 година на Јулмаз Гунеј и Сериф Гурен со филмот „Yol”.
Претседателката на канското жири, режисерката Џејн Кемпион, изјави дека должината на „Зимскиот сон” од три часа и 16 минути ја обесхрабрила, но и дека „филмот има толку прекрасен ритам што би издржала и некој час подолго”.
Иако е сместен во степите на Анадолија, атмосферата на филмот е речиси клаустрофобична, го прикажува богаташот и поранешниот глумец Ајдин, кого го толкува Халук Билгинер, кој со интелигенцијата и позицијата се служи за да ги малтретира своите потстанар, жената и сестрата.
Џејлан во текот на фестивалот постојано новинарите го прашуваа за рударската несреќа во Сома во која загинаа 301 рудар, како и за безредијата во Турција.
„Турција е земја со многу проблеми. Секој ден испливува некоја нова голема работа. За уметникот не недостигаат теми”, изјави за Reuters минатонеделната премиер на неговиот филм во Кан.
Пред две седмици со филмот „Грејс од Монако” (Grace of Monaco) беше отворен 67-от Кански филмски фестивал, но иако обожавателите го поздравија Никол Кидман и другите ѕвезди на црвениот тепих, критичарите останаа воздржани. Филмот инаку не беше во конкуренцијата за награди на фестивалот на кој годинава се појавија ѕвезди како Шерон Сотн, Ума Турман, Џон Траволта, Ева Лонгорија и Наоми Вотс./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.
Филм
Утре се отвора четвртиот Фестивал на грчки филм
Утре, на 7 април 2024 година, во 20 часот, во Кинотеката на Северна Македонија (Никола Русински 1, Скопје 1000) ќе биде отворено четвртото издание на Фестивалот на грчки филм. На отворањето ќе биде прикажан кусометражниот филм „Тишината на рибата кога умира“ на Василис Кекатос (2019, 19′), а потоа долгометражниот филм „Не би сакал да сум непристоен, но треба сериозно да разговараме“ на Јоргос Георгопулос (2019, 99′).
Ова се две црни комедии во кои што идејата за смртта се прикажува со доза на хумор. Филмот „Тишината на рибата кога умира“ учествуваше на некои од најважните фестивали како Sundance, а Василис Кекатос е еден од најважните претставници на кусометражните филмови со многу награди, вклучително и Златна палма во Кан.
Фестивалот е во ко-организација на Амбасадата на Грција во Скопје и Меѓународниот филмски фестивал Киненова спонзориран од фирмите Armos Balkan и Mermeren.
Влезот е бесплатен.
Култура
Во февруари 50-годишен јубилеј на Кинотека: Старите вредности во нови контексти
Пред 5 децении е формирана македонската кинотека. Честитки за сето она што досега го направила оваа значајна културна установа. Една од основните дејности на филмскава институција е да го прикаже сето она што го има, и ново и старо; ова второто во нови контексти и изданија. Тоа ќе биде карактеристика на програмата на најкусиот месев во годината – февруари. Календарски, ќе трае 29 дена. Ете можност да се види сето она што кинотеката го подготвила за февруарските денови.
Ќе се стартува со премиерна проекција. Со филм кој има наслов СЛОБОДА. Тоа е краткометражен филм во омнибус формат, чијшто автор е филмскиот критичар Златко Ѓелески. Веднаш потоа враќање децении наназад. Ќе бидат проектирани неколку архивски филмски записи од 1912 до 1952. Тоа се дел од новопримените кино-материјали што кинотеката ги прибра во текот на изминатата година.
Кинотека се решила, враќајќи се децении наназад, да потсети на филмовите создадени во 40-тите, 50-тите, 60-тите, 80-тите, 90-тите и 2000-тите. Режисерите се од различни земји – Италија, Франција, Германија, Шведска, САД. Ставени се во различни контексти, во нови програми. Всушност, станува збор за циклуси на Великаните на фестивалот на филмската камера БРАЌА МАНАКИ и пократок цилкус филмови на францускиот режисер на т.н. француски нов бран Луј Мал.
Во исклучително богатата кинотечна понуда се и неколку филмови на чехословачкиот режисер, оскаровецот Јан Кадар.
Она што е многу интересно, многу потребно за да се знае и запамети, се петте документарни македонски филмови со етнолошка содржина. Во нив е забележана традицијата, обработени се народни и религиозни обичаи од средината на 20-тиот век. Во четири од нив Вера Кличкова, пионерот на етнолошкиот филм кај нас, е сценарист, режисер или консултант.
Филмофилите ќе бидат почестени да го видат сигурно еден од најозборуваните лански филмови – НАПОЛЕОН на Ридли Скот. Во различните оценки за филмот доминираат, што е сосема разбирливо, Англичаните и Французите. Едните го фалат, другите го кудат. Критиките за најновата продукција на Скот се поделени, но не смее да се изостави фактот дека, и покрај одредени пропусти, станува збор за прецизно сработен биопик. Дело кое функционира на неколку нивоа – како биографска сторија, историска рекреација, но и омаж кон еден од омилените филмови на Ридли Скот – Бари Линдон од 1975, по сценарио и режија на Стенли Кјубрик.
Уште една филмска творба којашто предизвика интерес и претежно позитивни рецензии – УБИЈЦИ НА ЦВЕТНАТА МЕСЕЧИНА на Мартин Скорсезе– ќе биде проектирана во кино салата на Кинотека месецов.
Во финалето на месецов, ќе погледнеме два филма со музичка содржина. Познатиот ТОМИ, рок операта на Кен Расел, ќе биде прикажана на оригинална 35 милиметарска лента. Новитетот е музичкиот документарец за екс ју панк легендите Панкрти. Специјален гостин на кинотеката тие денови ќе биде фронтменот на групата, Перо Ловшин.
Февруари е можеби календарски пократок месец , но затоа ќе биде исполнет со исклучително богата кино-програма.