Бучковски:Овде нема случај, ниту тој ќе прерасне во криза во Владата. Ниту некој ќе нуди ниту некој ќе бара оставка

Владата в понеделник повторно ќе разговара за начинот на наплата на долгот од Русија

Бучковски:Овде нема случај, ниту тој ќе прерасне во криза во Владата. Ниту некој ќе нуди ниту некој ќе бара оставка

“Овде нема случај, ниту ќе прерасне во каква било криза во Владата. Ќе нема реконструкции или нудење и барање оставка. Целата работа ќе излезе: се тресеше гората – се роди глушец. Топката е спуштена меѓу министерот Никола Поповски и вицепремиерот Минчо Јорданов, меѓу кои се обидов да наметнам дух на разбирање. Но, в понеделник случајот со наплатата на рускиот долг повторно ќе се разгледува. Сите ќе го кажеме она што имаме да го кажеме и ќе се сослушаме”. Вака премиерот Владо Бучковски вчера коментираше за последната кавга во владиниот кабинет.

“Во овој момент е договорено в понеделник на седница на Влада да ја прегледаме уште еднаш точката за затворањето на клириншкиот долг од Руската Федерација, на овие принципи кои се сў уште генерална политика на Владата, а тоа е со стоки и услуги да го затвориме долгот. Но, од друга страна, треба да се почитува формализмот што ќе биде неопходен во таа процедура. Така што, топката е спуштена и мислам дека целата работа ќе ја решат токму заедно Поповски и Јордановви, изјави Бучковски.

Тој не гледа пречки долгот да се наплати преку гасен прстен, но не ја исклучува и можноста идејата да не се оствари. “Многу пати досега со Русите потпишувавме меморандуми, парафиравме договори и потоа немавме реализација. Така беше со опремата за РЕК ,,Битолааи, транспортниот авион, локацијата за амбасадата. Дали и гасниот прстен ќе се реализира, ќе покаже времето. Ако потпишеме договор за изградба, тоа ќе треба да го регулираме со ребалансот, каде што ќе биде главен зборот на парламентот. Ќе мора да биде известен и ММФ, како што и досега се правеше”, рече премиерот, повторувајќи дека министрите не требало предвреме да се препукуваат.

Бучковски разговарал за проблемот и со поранешната вицегувернерка во НБМ, Душанка Христова, која три години била вклучена во преговорите со Русите, за што има материјал на 70 страници, кој сега се препрочитува. “На маса биле ставени сите варијанти и искуства како другите држави го затворале клириншкиот долг со поранешниот СССР. Ние долго ги разгледувавме, па затоа и одлуката е донесена во октомври 2003. Имаше и опција која во една изјава ја врати Поповски, долгот да се сервисира во период од 15 години и да биде затворен до 2021, но тоа беше отфрлено. Отфрлена беше и понудата веднаш да ни платат со дисконт, бидејќи наместо 60 милиони долари ќе требаше да земеме само 20 милиони. Би требало во духот на судирот на прагматизмот и формализмот да се реши проблемот”, смета премиерот.

Но, за него би било многу лошо доколку работите ги враќаме во почеток и да бараме наплата во пари, наместо стока. “Ќе треба повторно да ја разгледуваме почетната платформа. Дали тоа ќе биде направено, не верувам, затоа што искуствата покажуваат дека вака најлесно ќе го затвориме долгот”, дециден е првиот министер.