Во моментот не постојат никакви објективни причини и оправданост за прекинување на доверениот четиригодишен мандат од страна на граѓаните за остварување на ветените проекти во програмата. Ваква одлука ноќеска донесе Извршниот Комитет на ВМРО-ДПМНЕ по долгата седницата, на која по темелната дискусија и анализа е донесен став да не се распишат предвремени избори.Иако највисокото партиско раководство оценило дека доколку сега бидат распишани предвремени избори ВМРО-ДПМНЕ би имал двојна предност пред СДСМ, сепак било оценето дека нема причина за распишување на избори.„За ВМРО-ДПМНЕ е неприфатливо само поради едно блефирање и покерашкиот пристап во политиката на Бранко Црвенковски целосно да ја дефокусираме енергијата насочена кон спроведувањето на ветената четиригодишна програма, борбата против криминалот и корупцијата, справувањето со последиците од светската економска криза, напорите за реализација на евроатланските аспирации и напорите за остварувањето на сите останати државни и национални интереси“, стои во партиското соопштение. Притоа се наведува дека во партијата се свесни СДСМ и Бранко Црвенковски ќе се обидат оваа одлука да ја злоупотребат за сопствено политичко поентирање.„Им порачуваме дека ќе бидат разочарани на следните избори кога ќе се соочат со реалноста“, се наведува во соопштението, во кое се додава дека доколку сега се распишат избори предноста на ВМРО-ДПМНЕ и коалицијата за подобра Македонија ќе овозможи најмалку двојно повеќе пратеници и нов четири годишен мандат. .Воедно се појаснува дека во 2008 година ВМРО-ДПМНЕ прифати предвремени  избори со цел деблокирање на собранието и продолжување на реформите. /крај/ап/