Истрагата за упадот во дикотеката „Процес“ и по три месеци е во ќор-сокак. Судот и Обвинителството бараат проширување на листата на осомничени за упадот во дискотеката „Процес“ со нови 18 припадници на Единицата за брзо распоредување.

ЉУБИША СТАНКОВИЌ

Истрагата за упадот во дикотеката „Процес“ и по три месеци е во ќор-сокак. Судот и Обвинителството бараат проширување на листата на осомничени за упадот во дискотеката „Процес“ со нови 18 припадници на Единицата за брзо распоредување. Според МВР, пак, случајот е затворен со тоа што се поднесени кривични пријави против 20 специјалци. „Постапката во случајот ’Процес’, од полициски аспект, е завршена“, изјави завчера министерката за внатрешни работи, Гордана Јанкуловска.

Насилничкиот упад на бројна група маскирани припадници на Единицата за брзо распоредување во дискотеката „Процес“, што се случи на 16 декември минатата година, резултираше со отворање кривична постапка која и по цели три месеци не е окончана во фаза на кривична истрага. Овој процес е отежнат поради фактот што во Основниот суд Скопје 1 чекаат на дел од доказите кои им се навестени, но никако да дојдат до судијата кој раководи со овој предмет. Како што сега стојат работите, со кривичната истрага и натаму се опфатени само 20 припадници на Единицата за брзо распоредување (ЕБР) кои доброволно се пријавија како сторители на насилнички напад во „Процес“ и тие според Обвинителство се товарат за насилство.

Портпаролот на Основниот суд Скопје 1 и раководител на Истражното одделение, судијата Седат Реџепагиќ, потврдува дека сите доброволно се пријавени распитани и дека од следната недела ќе треба да започне распитот на оштетените. Станува збор за седум-осум лица кои во оваа постапка се пријавени како оштетени.

Но, од судот потврдуваат дека во скоро време треба да се очекува проширување на кривичната истрага за нови 18 лица, што ги потврдува сомневањата дека бројот на лицата кои насилно влегле во дискотеката е поголем од оние дваесетмина за кои се поднесени кривични пријави. И од скопското Основно јавно обвинителство доаѓа неформална потврда дека бројот на осомничените треба да биде многу поголем од оној што го најави Министерството за внатрешни работи.

Обвинителството и натаму инсистира на барањето што е проследено до МВР, а во кое се бара препознавање на преостанатите учесници во инцидентот. По прегледувањето на снимките направени од камерите на дискотеката, но и оние што како доказ беа обезбедени од Градскиот трговски центар, Обвинителство побара од МВР да изврши препознавање на сите лица што се снимени на камерите, но барем засега нема нова повратна информација. Засега, барањето за дополнителни проверки останува како и пред повеќе од еден месец, кога беше соопштено дека е тешко да се идентификуваат сите оние кои се гледаат на снимките и дека, најверојатно, бројот на осомничени нема да се менува. Така како осомничени, според полицијата, се водат само оние припадници на ЕБР кои доброволно се јавија пред судско-обвинителните органи.

Случајот „Процес“ се смета за затворен од страна на полицијата, зашто потврда дојде и од страна на министерката за внатрешни работи, Гордана Јанкуловска. Таа завчера во Битола изјави дека „постапката во случајот ’Процес’, од полициски аспект, е завршена“. Јанкуловска смета дека сите „сторители се идентификувани и за нив се поднесени 20 кривични пријави за сторено кривично дело насилство“ и дека сега случајот е во рацете на Обвинителството. Случајот „Процес“ не само што е завршен за министерката Јанкуловска, туку таа очекува во скоро време почнување судска постапка, а на претстојното судење ќе треба да одговараат сите 20 досега пријавени.