Постојаниот претставник на Украина во ОН, Серхиј Кишлица денеска изјави дека земјата е посветена на завршување на војната со Русија и воспоставување праведен мир, но дека нема да го прифати концептот „мир по секоја цена“.

„Украина, повеќе од кој било друг, сака мир, но ние нема да прифатиме мир по секоја цена, бидејќи тоа нема да донесе вистински и траен мир“, изјави украински дипломат за време на состанокот на Советот за безбедност на ОН, додавајќи дека таквиот пристап само би ја охрабрил Русија да продолжи со „кршење на меѓународното право“, а не само во Украина, пренесе украинската агенција РБЦ. Кишлица потсети дека руските геополитички амбиции ги надминуваат границите на Украина.

Тој нагласи дека, ако целта е да се живее во безбеден свет, меѓународната заедница мора да вложи максимални напори за да се спротивстави на „руските империјалистички политики“.

Според него, дипломатскиот пат до тој мир води преку имплементација на „Формулата за мир“, иницирана од украинскиот претседател Володимир Зеленски. „Ние сме, исто така, подготвени да ги разгледаме мировните идеи на другите нации, кои ја земаат предвид потребата за обновување на територијалниот интегритет на Украина и се засноваат на принципот „ништо за Украина без Украина“, посочи тој.

Советот за безбедност на ОН вчера одржа состанок на барање на Словенија и САД, кои претходно ја консултираа украинската делегација, пренесува Танјуг.

Претходниот ден претседателот Зеленски изјави дека Украина нема да преговара со Русија додека не добие безбедносни гаранции. Зеленски напомена и дека во моментов има четири земји кои од различни причини не сакаат да ја видат Украина во НАТО – САД, Германија, Унгарија и Словачка.

Националниот воздушен простор на Романија е нарушен за време на ноќниот руски напад врз Украина, а зоната на веројатен влез на беспилотни летала е одредена во близина на границата, во југоисточниот округ Тулча, соопшти денеска Министерството за одбрана во Букурешт.

Романија, која е членка на НАТО, подигна два борбени авиони за да го следат нападот од воздух, пренесува Ројтерс.

Паѓањето на делови од беспилотни летала и нарушувањето на воздушниот простор на Романија се редовна појава во последните година и пол, откако Русија ја нападна украинската пристанишна инфраструктура на реката Дунав, наведува агенцијата, пренесува Танјуг.

Потрагата по детето кое исчезна во Сава во Загреб продолжува и денеска. Во четвртокот, спасувачките служби го напуштија местото на настанот во вечерните часови бидејќи поради високиот водостој и слабата видливост повеќе не можеше да се пребара просторот околу реката.

Полициската управа во Загреб во четвртокот соопшти дека не се пронајдени траги. Спасувачките екипи со чамци, беспилотни летала и подводни скенери ја пребарале областа по целото течение на реката во Загреб и загрепската жупанија, пренесува Index.hr.

Потрагата започнала по повик на мајката (34) во средата околу 16.10 часот. Според сигурни извори, таа не кажала експлицитно дека го убила детето, но она што го кажала веднаш ја навело полицијата да се посомнева дека сторила кривично дело.

Таа меѓу изјавите навела дека во Сава влегла со детето во раце, а сето она што го кажала дополнително го потврдило сомнежот дека се работи за убиство на сопственото дете.

Според написите, изгледала дезориентирана, па била предадена на лекарската помош.

Полицијата врз основа на изјавите на мајката и состојбата ја исклучила можноста дека се случила несреќа во која детето паднало во реката. Облеката на мајката била мокра, што го потврдило нејзиниот престој во Сава, но исклучена е и можноста за обид за самоубиство со детето во раце.

Во еден момент, откако влегла во Сава со детето, таа очигледно го испуштила низ реката. Се уште не е јасно дали детето се удавило или веќе било убиено. Точната причина ќе ја утврди истрагата, но телото на детето се уште не е пронајдено.

Мајката беше официјално уапсена вчера и осомничена за тешко убиство. По притворот таа повторно ќе биде сослушана, овојпат пред обвинител. Семејството ангажирало адвокат кој подоцна објавил дека нема да ја застапува мајката, па таа ќе добие адвокат по службена должност.

Полицијата го испрашала и сопругот, како и неколку лица кои би можеле да помогнат во истрагата.

Брачната двојка има уште едно петгодишно дете. Мотивот на мајката што го фрлила помалото дете во реката Сава се уште не е јасен, но достапните информации укажуваат дека таа претходно била лекувана од психички проблеми, пишува медиумот.

„Вчера, 15 јануари, околу 16.10 часот, полицијата одговорила на повик од жена (34) која пријавила дека со дете во раце влегла во Сава кај мостот Јанкомир. По укажаната лекарска помош, жената е уапсена и приведена во полициските простории поради сомнение за тешко убиство на блиско лице“, соопшти загрепската полиција.

Од Хрватскиот завод за социјална работа потврдија дека семејството не било под надзор или третман на надлежен центар, ниту пак биле преземени мерки за семејно-правна заштита.