Македонија
Советот на честа реагира за неточната вест за смрт на сопственик на портал
Советот на честа при Здружението на новинарите на Македонија (ЗНМ) смета дека веста на порталот mkdnews.com на кој беше објавена информација дека сопственикот на порталот komunikacija.mk наводно загинал во сообраќајна несреќа, претставува грубо кршење на професионалните норми и стандарди во новинарството.
„Претставува врв на непрофесионализам! Зарем упатена порака (по мобилен телефон најверојатно) може да биде валиден извор на информација? Зарем Советот на честа треба да укажува како, каде и кај колку извори треба да се провери една информација (без разлика на нејзината чувствителност) пред да се објави? Со објавувањето на таквата непроверена информација, порталот ги повредил сите одредби од Кодексот на новинарите. Повредени се чувствата на роднините и пријателите на сопственикот на komunikacija.mk, вознемирено е неговото семејство. Јавноста е тотално дезинформирана“, се вели во реакцијата на Советот на честа.
Од Советот на честа при ЗНМ предупредуваат дека пласирањето дезинформации во јавноста е сé позачестена појава, особено кај порталите и повикува на поголема одговорност и почитување на професионалните стандарди.
„Однесување слично на порталот кој ја објавил информацијата за наводното загинување во сообраќајна несреќа на сопственик на друг портал, само ја девалвира новинарската професија и води во насока да се губи авторитетот на новинарите. Ја девалвира новинарската фела до степен да не и’ се верува“ се вели во реакцијата.
Порталот mkdnews.com, повикувајќи се на смс порака која ја испратиле до нивната редакција, објави вест дека сопственикот на порталот komunikacija.mk, поранешен bez.pardon загинал во сообраќајка на магистралниот пат Ниш-Белград./крај/мф/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пендаровски по повод Светскиот ден на слобода на медиумите: Да имаме доблест да ја прифатиме критиката и да ја поддржиме слободата на изразувањето
Претседателот Стево Пендаровски упати порака по повод 3 Мај − Светскиот ден на слобода на медиумите.
„Слободата на медиумите е еден од темелите на демократските вредности и е од суштинско значење за демократскиот развој на македонското општество.
Квалитетните, професионални и независни новинари, коишто ја сфаќаат сериозноста и тежината на креирање на јавното мислење, можат да претставуваат силен глас на јавноста.
Затоа мора да продолжиме да вложуваме во воспоставувањето стандарди со кои медиумите ќе можат слободно и независно да работат и да се развиваат. Да градиме атмосфера во која медиумските работници ќе се чувствуваат безбедно и заштитено. Да имаме доблест да ја прифатиме критиката и да ја поддржиме слободата на изразувањето. Само така ќе имаме моќни и силни медиуми и новинари коишто ќе бидат објективни во известувањето и ќе ѝ служат на јавноста, а не на политичките елити и на изворите на финансирање. На сите медиумски работници им го честитам Светскиот ден на слобода на медиумите“, порача претседателот Пендаровски.
Македонија
„ДКСК да покрене постапка против Битиќи, бара од фирмите на кои им исплаќал државна помош да гласаат за него“, вели ВМРО-ДПМНЕ
„ДКСК да покрене постапка против Битиќи, бара од фирмите на кои им исплаќал државна помош да гласаат за него, им сугерира и број на гласачко ливче. По објавениот документ од кој се гледа како Битиќи бара од компании да го поддржат затоа што им исплаќал државна помош тој требаше да се повлече од политиката“, велат од ВМРО-ДПМНЕ.
„Фактот што Битиќи не само што не се повлече, туку и не се извини, говори како СДС и ДУИ ја заробија државата и како 100тина функционери управуваат со државата како да е нивен личен имот.
ДКСК не смее да чека, да отвори случај и да се отвори постапка и пред другите институции.
Злоупотребите на институциите мора да запрат. По 8ми мај ќе се стави крај ма ваквите практики, а таквите како Битиќи ќе се соочат со одговорност“, соопшти ВМРО-ДПМНЕ.
Македонија
Променливо облачно и нестабилно со пороен дожд и грмежи
Времето денеска ќе биде променливо облачно и нестабилно со пороен дожд и грмежи, особено во источните делови. Локално процесите ќе бидат во форма на краткотрајно невреме со засилен ветер и услови за изолирана појава на град. Минималната температура ќе биде во интервал од 7 до 12, а максималната ќе достигне од 14 до 22 степени.
Во Скопје променливо облачно и нестабилно со пороен дожд и грмежи. Во делови од котлината ќе има услови за краткотрајно невреме со засилен ветер и изолирана појава на град. Минималната температура ќе се спушти до 10, а максималната ќе достигне до 21 степен.
Продолжува периодот на променливо облачно време со повремени локални врнежи од дожд, освен во недела кога ќе биде претежно стабилно и потопло. Во сабота ќе дува засилен северен ветер.