Свет
Македонски денари се фалсификуваат во бугарски печатници
Можно е фалсификуваните денари, кои често се појавуваат на македонскиот пазар, да се изработуваат во специјализирани печатници во странство, предупредува МВР.
Инвазија на лажни пари
Можно е фалсификуваните денари, кои често се појавуваат на македонскиот пазар, да се изработуваат во специјализирани печатници во странство, предупредува МВР.
Соседна Бугарија, која на Балканот е позната како Мека за фалсификати, се споменува како можно место каде што се “штанцаат” лажните денари. Во бугарското МВР досега нема информации дека во некои од затворените лаборатории за изработка на фалсификати биле пронајдени лажни денари.
Во македонското Министерство за внатрешни работи велат дека поголемиот број лажни пари што се пуштаат во оптек во Македонија доаѓаат од нашиот источен сосед. Полицијата неодамна осомничи државјанин на Србија и Црна Гора, кој заедно со лице од Гевгелија подметнал лажни денари.
Истрагата утврдила дека Србинот Г.М. (36) и М.М. (22) од Гевгелија извршиле тешка кражба во куќа, од каде што украле компјутер. Потоа му го продале на лице од Гевгелија, кое им платило со фалсификувани пет банкноти од по 500 денари и две банкноти од по 200 евра. Истрагата утврдила дека лажните пари биле на П.Т..
Откако ги зел фалсификатите, Г.М. во кафе-бар и киоск пуштил во оптек лажни банкноти од по 500 денари, а при извршен претрес кај него се пронајдени три банкноти од по 500 денари и две банкноти од по 200 евра.
Во полиција бил повикан П.Т., кој доброволно предал уште десет банкноти од по 500 денари, една банкнота од 1.000 денари и осум банкноти од по 100 денари, за кои е утврдено дека се фалсификувани.
Полицијата секој втор ден спречува по едно подметнување фалсификувани пари.
Во МВР апелираат сопствениците на бутици, парфимерии и на дуќани да ги проверуваат парите на детектори за лажни девизи.
Според полициските анализи, македонскиот пазар често е крајна дестинација за фалсификуваните пари печатени во Бугарија. Фалсификатите набавени од Бугарија, која е лидер во регионот по печатењето лажни пари, редовно ги подметнуваат македонски државјани.
Сопствениците на менувачници во Скопје тврдат дека фалсификуваните девизи најчесто се подметнуваат во бутици и во продавниците за мобилни телефони. Главната причина за тоа е отсуството на детектори за откривање фалсификувани банкноти. Најчесто станува збор за лажни банкноти од по 50 евра. Упатените велат дека фалсификаторите применуваат различни трикови за да ги подметнат фалсификатите. Тие најчесто испраќаат атрактивни девојки, кои треба да им го одземат вниманието на продавачите, а се случува и мали деца да купуваат со фалсификувани девизи. Министерството за внатрешни работи апелира до граѓаните да бидат претпазливи ако дојдат во ситуација да земат странски пари.
Во Тетово полицијата открила фалсификувани банкноти од по 100 денари, при што бил уапсено А.А. од тетовското село Селце.
Полицијата сопрела автомобил “голф” со тетовски регистарски ознаки, управуван од А.А.. Полицијата при претрес во автомобилот пронашла поголемо количество муниција во различен калибар и 108 фалсификувани банкноти од по 100 денари.
Приведениот, наводно, фалсификуваните банкноти ги зел од непознато лице. Против А.А. биле поднесени кривични пријави за недозволено држење оружје и за фалсификување пари.
Експертите предупредуваат дека фалсификаторите се почесто изработуваат и пари во пониски апоени, како што се стоденарките. Според нив, парите со пониска номинала често полесно се протураат оти ретко се проверува нивниот квалитет.(А.М.)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
(Видео) Мачна сторија: 98-годишна Украинка пеш, во влечки побегнала од фронтот во Доњецк за да се најде со семејството
Лидија Ломиковска (98) се споила со семејството неколку дена откако избегала од украинскиот фронт, поради што пешачела 10 километри во влечки.
98-годишната жена која побегнала од територијата во Украина окупирана од Русија користејќи стап, само во влечки, и повторно се споила со своето семејство неколку дена откако биле разделени додека бегале на безбедно.
Лидија и нејзиното семејство одлучиле да го напуштат градот Очеретине, во источниот регион на Доњецк, откако руските војници влегле во него минатата недела и борбите се интензивирале.
– Се разбудив опкружен со пукотници, беше толку страшно – изјави Ломиковска во видео интервјуто што го објави полицијата во Доњецк.
Таа беше разделена од синот и снаите, од кои и едната беше повредена од шрапнел неколку дена претходно. Помладите членови на семејството тргнале по споредни патишта, но Лидија сакала да остане на главниот пат.
Со бастун во едната рака и парче дрво во другата, Ломиковска цел ден пешачела без храна и вода за да стигне до украинските линии.
Ломиковска рече дека два пати паднала и дека понекогаш морала да застане за да се одмори, а во еден момент дури и задремала пред да го продолжи патувањето.
– Еднаш изгубив рамнотежа и паднав во тревата. Заспав малку и продолжив да одам. И тогаш, по втор пат, пак паднав, но потоа станав и помислив, морам да одам, малку по малку – рече Ломиковска.
Павло Дјаченко, портпарол на полицијата, изјави дека украинските војници ја забележале Ломиковска како оди по патот во вечерните часови. Тие ја предале на „Белите ангели“, полициска група која ги евакуира граѓаните кои живеат на линијата на фронтот, кои ја однеле во прифатилиште за евакуирани и контактирале со нејзините роднини.
Ломиковска вели дека ја преживеала Втората светска војна.
– И јас морав да ја поминам оваа војна и на крајот останав без ништо – рече таа и додаде: – Таа војна не беше како оваа. Ниту една куќа не изгоре. Но, сега се гори – му рекла таа на својот спасител.
Извршниот директор на една од најголемите украински банки во вторникот на својот канал Телеграм објави дека банката ќе ѝ купи куќа за Ломиковска.
– Монобанк на Лидија Степанивна ќе и купи куќа и таа безбедно ќе живее во неа додека не заврши војната – изјави Олех Хороховски.
A story of a 98-year old Lydia Stepanivna from #Ocheretyne in Donbas who walked 10 km to escape the hell of occupation.
– I survived WWII, but this war is worse. In WWII not a single house in our village burnt – and now there’s nothing left.#StandWithUkraine pic.twitter.com/20lMAXGWYI
— olexander scherba🇺🇦 (@olex_scherba) April 29, 2024
Свет
Полјачка на миса за Меди МекКан: „Јас сум Меди. Не сум лажга. Направете ДНК тест“
Родителите на Медлин МекКен вчера вечерта не беа на бдеењето одржано по повод 17-годишнината од исчезнувањето на девојчето. Меѓутоа, на богослужбата се појавила една млада Полјачка која тврди дека таа е киднапираната Меди.
Кејт и Гери МекКен испратија порака до присутните, која ја прочита пречесниот Роберт Гладстон: „Жал ни е што не можеме да бидеме со вас вечерва. Ви благодариме што се здруживте. Поминаа 17 години откако беше киднапирана. тешко е да се поверува дека помина толку долго време“.
На бдеењето присуствувала Џулија Вендел (22), која тврди дека таа е ккиднапираната Медлин. Во рацете држела писмо кое имала намера да им го предаде на родителите на киднапираното девојче. „Јас сум Медлин МекКен. Никогаш не престанав да верувам во тоа. Дојдов овде да ги замолам Кејт и Гери да направат ДНК тест”, рекла таа по мисата, а пренесува Дејли Мејл.
„Тие не направија ништо за да докажат дека не сум нивна ќерка. Не, не сум луда. Не сум лажгоа“, додала таа. Во селото Ротли се одржа бдение. Семејството МекКен и понатаму се надева дека нивната ќерка, која сега би имала 20 години, е сè уште жива.
Германската полиција, од друга страна, смета дека Меди е убиена и има намера да го обвини Кристијан Брукнер за злосторството. На осудениот педофил моментално му се суди за пет неповрзани силувања и сексуални престапи.
Во февруари минатата година, Џулија на социјалните мрежи објави под нејзиното корисничко име „@IamMadeleineMcCann“ дека таа е исчезнатото девојче. По ДНК анализата било утврдено дека таа на никаков начин не е поврзана со Медлин. Но, Џулија вчера инсистираше дека таа е Медлин МекКен и дека тоа ќе го докаже.
Свет
Русија распиша потерница по Зеленски, се огласи Украина
Украинското Министерство за надворешни работи соопшти дека издавањето налог за апсење од страна на Русија за претседателот Володимир Зеленски е „доказ за очајот на руската државна машина и пропаганда“, пишува „Украинска правда“.
„Руските извештаи за наводното додавање на украинскиот претседател Володимир Зеленски на потерницата на руското Министерство за внатрешни работи го покажуваат очајот на руската државна машина и пропаганда. Русите не знаат што друго да измислат за да привлечат внимание“, посочија Украинците. надвор.
„Ги потсетуваме сите дека, спротивно на безвредните руски најави, налогот на Меѓународниот кривичен суд за апсење на рускиот диктатор Владимир Путин под обвинение за воени злосторства е реален и спроведлив во 123 земји“, додаваат тие.
Русите не го прецизираа написот врз основа на кој е издаден налогот за апсење на украинскиот лидер. „Володимир Александрович Зеленски, 25 јануари 1978 година. Се бара според членот од Кривичниот законик“, стои во базата на податоци на веб-страницата на руското Министерство за внатрешни работи.
Базата на податоци го наведува и местото на раѓање на бараното лице, градот Кривиј Рих во регионот Дњепропетровск. Објавена е и фотографија од Зеленски, направена пред војната.