Македонија
Или ќе биде по мое или никако поинаку!
Стевче Јакимовски, градоначалник на Карпош
Советот на Општина Карпош, а сигурно и ниту една друга општина во Република Македонија досега не била сведок на еден ваков настан и едно такво самобендисано и арогантно однесување на еден градоначалник, како што тоа го направи г-динот Јакимовски на последната петта седница на Советот на Општина Карпош одржана на 13.07.2009 година.Имено, после разгледувањето на предлог-дневниот ред составен од 13 точки за расправа за оваа седница, неколку советници дадоа предлози, шест од точките да се тргнат од дневниот ред и нивното разгледување да се одложи за наредна седница на Советот која ќе се одржи после годишните одмори во месец август. Предлозите беа од страна на советниците од коалицијата предводена од ВМРО-ДПМНЕ, а како причини беа наведени: немањето целосни информации и потребата од дополнителни информации за да се расправаат за точките од дневниот ред, како и неодржувањето на седници на соодветните комисиите задолжени претходно да ги разгледаат материјалите и да дадат мислење по истите. После ваквите предлози, на сцена настапи г-динот Јакимовски. Во еден доста агресивен настап, тој ги убедуваше советниците зошто било потребно, токму сега и токму на таа седница, да се разгледуваат и да се одлучува по сите предлог-точки на дневниот ред. Неговиот настап испровоцира серија дискусии помеѓу советниците и градоначалникот и евидентно ја наелектризира атмосферата на самата седница. Притоа, стана јасно дека не само советничката група предводена од ВМРО-ДПМНЕ, туку и групата на независни советници е со став дека на оваа седница не треба да се расправа по однос на дел од спорните точки. По гласањето, пет од тринаесетте точки беа повлечени од дневниот ред за седницата. И кога советниците требаше да гласаат за предложениот дневен ред и да пристапат кон разгледување на преостанатите точки, г-динот Стевче Јакимовски, крајно непотребно и избрзано, излезе на говорница и кажа: “ГИ ПОВЛЕКУВАМ И СИТЕ ОСТАНАТИ ТОЧКИ ОД ДНЕВНИОТ РЕД“. Советничката група на ВМРО-ДПМНЕ побара градоначалникот да не носи таква избрзана одлука и предложи пауза од половина час, после која би продолжила седницата, но Јакимовски категорично одби да ја повлече својата одлука и седницата беше прекината.И ШТО СЕГА Г-ДИНЕ ЈАКИМОВСКИ?ИЛИ ЌЕ БИДЕ ПО МОЕ – ИЛИ НИКАКО ПОИНАКУ! – Тоа ли е пораката која сакате да ја испратите до граѓаните и советниците во Општина Карпош? Дали беше повредена Вашата суета или, пак, имавте само лош ден. Ваквото нервозно и агресивно однесување не доликува на еден градоначалник.Вие мора да разберете дека покрај Вас, во Општината функционира и Совет со советници кои можат да имаат и друго и различно мислење од Вашето.Нашата советничка група не сака и нема да ја подели одговорноста со Вас, за несоодветни и избрзани решенија. Решенија за кои не сме целосно убедени дека се во интерес на граѓаните. Со пораката “Или ќе биде по мое – или никако поинаку!“, не придонесувате за соработка со советниците и ја “ставате под залог“ општината и интересите на граѓаните. Со почит,Советничка група на коалицијата предводена од ВМРО-ДПМНЕво Советот на Општина Карпош
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.