Работата е константата што го одбележале работењето на владата во последните четири години, рече премиерот Никола Груевски во подолгото излагање за четиригодишниот период од владењето на ВМРО-ДПМНЕ, в кое детално по области го образложи сработеното

„За четири години, работите на сите полиња се мрднаа од мртва точка. Имаше грешки и ќе ги има во иднина, бидејќи ќе продолжиме да брзаме да го надокнадиме пропуштеното време и пропуштените шанси од минатото. Од грешките никој не бега и ќе сториме се за да ги поправиме. Но работите не стојат како порано. Во Македонија има промени и подобрување, луѓето се раздвижени, очекувањата се зголемени“, рече Груевски.Премиерот смета дека двата најголеми проблеми со кои се соочила владата под негово водство се светската економска криза и проблемот за името со Грција.Груевски овој период го подели на два дела: периодот од 2006-та до 2008-ма година пред светската економската криза и периодот од 2008-ма до денес, откако е започната кризата.Според него, кризата не придонела за запирање на веќе започнатите проекти.„Светската економска криза допринесе до намалување на приходите во буџетот и тоа малку ги оддолжи спроведувањето на проектите. Меѓутоа, како што знаете, ние донесовме одлука која што има и свои последици, како што се одредени доцнења на плаќањата. Донесовме одлука да не запреме безмалку ниту еден од проектите, но дел од нив да ги забавиме, односно исполнувањето да биде, на пример, наместо до 2010-та до 2011-та и така натаму. Така што, јас сум убеден дека планот кој што е направен ќе биде добро реализиран и дека средствата обезбедени од буџетот ќе ја завршат својата работа и ќе бидат доволни“, рече Груевски.Тој изрази незадоволство од спорот за името со Грција. Уште еднаш ја потврди позицијата дека за евентуалното решение ќе се изјаснат граѓаните.„Јас сум задоволен од она што владата го направи во однос на тоа што сите земји претходно го направија. Тоа е да ги направи сите модернизации, реформи, сите потребни проекти што се бараа од НАТО и се бараа од ЕУ за да земјата стане членка во НАТО, односно да ги започне финалните преговорите за полноправно членство. И тоа се потврди во 2008-мата на самитот во Букурешт и тоа се потврди минатата година, со давањето на позитивен извештај од страна на Европската Комисија и препорака до Советот на Македонија да и се отвори преговарачкиот процес. Задоволен сум што и тие реформи придонесоа да дојдеме и до визна либерализација и денес граѓаните веќе не чекаат за визи пред амбасадите, веќе не се малтретираат со цела неизвесност, така да со нашиот македонски пасош патуваат слободно. Меѓутоа, не сум задоволен со онаа што ни се случува од нашиот јужен сосед, односно од блокадата. На тоа посветено се работи за да се најде одредено решение“, рече Груевски.Како најголема од своето четири-годишно владеење, Груевски го посочи менувањето на „концептот на работа, управување и владеење“.„Сменети се критериумите по кои што се оценува една влада, сменети се вредносните критериуми и тоа нема да може нико понатаму да го промени. Секоја идна влада ќе мора да се мери најмалку со овие резултати што се прават, со овој начин на работење, со оваа динамика и со оваа темпо. Нема да им биде репер некој од деведесеттите години, ќе им биде репер оваа динамика на работа и од неа ќе треба да бидат подобри, што не велам дека не можат. Покачено е скалилото на мерење на работата на една влада и вредносните критериуми. Мислам дека тоа е најголемата придобивка, според моето длабоко убедување.“, рече Груевски.Премиерот најави дека отчетот за работата на владата во последните четири години наскоро во печатена верзија ќе биде достапен пред граѓаните.