Надворешна политика
Турција смета дека Македонија заслужува веднаш да стане дел од НАТО
Министерот за одбрана Зоран Јолевски, при неговата посета на Турција оствари средби со министерот за национална одбрана на Турција, Исмет Јилмаз, и началникот на турските воени сили, генерал Неџдет Озел, пришто Јолевски изрази благодарност за несебичната поддршка и помош која Македонија ја добива од страна на Турција во напорите за целосна евроатланска интеграција.
Јолевски истакна дека од исклучително значење е поддршката која и овозможи на Македонија по самостојна инерција на делување да прерасне во придонесувач кон глобалниот мир и безбедност и при тоа да се изгради како рамноправен НАТО партнер. Воедно Јолевски ја потенцираше и помошта од Министерството за национална одбрана на Турција во опремувањето и модернизацијата на Армијата на Република Македонија.
На средбата двата министри заклучија дека постои исклучително добра соработка помеѓу Македонија и Турција која се огледува во фактот што постои постојан дијалог на највисоко ниво кој се пренесува во конкретни предлози од двете држави за континуирана понатамошна соработка. Министрите за одбрана се согласија дека соработката меѓу двете држави во областа на одбраната е на значајно високо ниво и истата преставува пример за меѓународни односи кои овозможуваат градење на мир и безбедност во регионот.
Министерот за национална одбрана на Турција потенцираше дека Турција целосно ја поддржува интеграцијата на Македонија во НАТО. Министерот Јилмаз истакна дека за поканата за членство во Алијансата нe треба да се чека надминувањето на разликите околу името со Грција кога Македонија веќе ги исполнува сите услови за членство во НАТО. Според Јилмаз Македонија заслужува во најкраток рок да стане дел од Алијансата.
Јолевски истакна дека заедничкото делување во „Одлучна поддршка“, размената на студенти и професори на Воените академии, редовните билатерални средби и чекорите за економски развој се само неколку од точките на соработка кои треба да продолжат и кои редовно го надминуваат примерот на билатерални односи помеѓу две држави кои се фокусираат на севкупен државен развој.
За време на средбата помеѓу министерот за одбрана, Зоран Јолевски, и началникот на воените сили на Турција, Неџдет Озел, постоеше взаемна согласност дека двете држави имаат одлична соработка на полето на одбраната и безбедноста. Јолевски истакна дека за заедничкото делување во мировната мисија на НАТО „Одлучна поддршка“ каде што офицери од Армијата на Република Македонија се вклучени во Кабул во рамките на Главниот штаб на командата за обука кој е предводен од Воените сили на Турција е пример и доказ за високо развиена меѓуармиска соработка.
Началникот на Воените сили на Турција подвлече дека со Македонија постои исклучителна соработка и дека Турција ќе продолжи со поддршката за Македонија во областа на одбраната и безбедноста.
Министерот за одбрана воедно заклучи дека и покрај високото ниво на соработка помеѓу двете држави постои взаемен интерес да се продолжи со зајакнување на меѓусебното партнерство и продлабочување на соработката.
За време на присуството на меѓународниот саем министерот за одбрана оствари средби и со директор на Национално вооружување, бригаден генерал Шабан Умут, и министерот за одбрана на Монголија, Церендашин Цолмон.
Министерот Јолевски и генералот Умут разменија мислења за можностите за дополнителна модернизација на Армијата на Република Македонија и можностите за обука на турски и македонски пилоти и офицери кои дополнително ќе ја зацврстат соработката помеѓу Македонија и Турција.
При средбата помеѓу министерот Јолевски и министерот Цолмон се разгледаа можностите и опремата за обука на воени пилоти кои ги поседуваат Македонија и Монголија. Министрите заклучија дека постои сериозна определба за идно релативизирање на соработката помеѓу двете држави./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.