Македонија
Георгиевски и Џафери нема да присуствуваат на конференцијата во Охрид
Поранешниот премиер Љубчо Георгиевски и почесниот претседател на ДПА, Арбен Џафери, двајца од петтемина потписници на Рамковниот договор, нема да присуствуваат на дводневната конференција во Охрид, бидејќи не се во земјава.
Поранешниот премиер Љубчо Георгиевски и почесниот претседател на ДПА, Арбен Џафери, двајца од петтемина потписници на Рамковниот договор, нема да присуствуваат на дводневната конференција во Охрид, бидејќи не се во земјава.
По повод 10-годишниот јубилеј од потпишувањето на Охридскиот рамковен договор, во петок и во сабота во Охрид ќе се одржи конференција на којашто најавено е присуството на актуелниот државен врв, потписниците на договорот и на меѓународните претставници кои ја имаа улогата на олеснувачи во преговорите со коишто се дојде до Договорот.
Конференцијата е во организација на Секретаријатот за спроведување на Охридскиот рамковен договор.
Организаторите на конференцијата информираа дека со Арбен Џафери разговарале лично и дека тој е надвор од земјава па нема да биде во можност да присуствува во Охрид. На настанот нема да присуствува и Љубчо Георгиевски. Таквата информација била потврдена од неговата ВМРО-Народна партија со образложение дека тој е на подолг одмор и дека ќе се врати наредната недела.
На конференцијата во петок е предвидено да се обратат шефот на државата Ѓорге Иванов, премиерот Никола Груевски, вицепремиерот задолжен за Рамковниот договор, Муса Џафери, досегашниот американски амбасадор во Македонија, Филип Рикер, Џејмс Пердју, олеснувач на Охридскиот договор, Ален Ле Роа, тогашен генерален потсекретар за мировни операции при Обединетите нации, лидерот на ДУИ, Али Ахмети и лидерот на СДСМ, Бранко Црвенковски.
Во сабота на конференцијата треба да говорат Ралф Брет, раководител на ОБСЕ мисијата во земјава, Питер Соренсен, раководител на Европската делегација во земјава, Брајан Агелер, вршител на должност амбасадор на САД во Македонија, Кристофер Ивон, амбасадор на Обединетото Кралство на Велика Британија и Северна Ирска во Македонија, Питер Фејт, Специјален претставник на ЕУ и Меѓународен цивилен претставник за Косово, но неговото присуство сé уште не е потврдено и, Никола Поповски, министер за надворешни работи.
Оваа конференција е дел од одбележувањето на десетгодишнината од потпишувањето на Охридскиот договор.
Охридскиот рамковен договор е спогодба за внатрешното уредување на малцинските права во Република Македонија, потпишан на 13 август 2001 година. меѓу претставниците на тогашните најголеми политички партии, и специјални претставници на ЕУ и САД.
Охридскиот договор е склучен во текот на ескалацијата на насилства меѓу терористите од албанска националност и македонските бранители во конфликтот во 2001-та.
Преговорите се одвиваа во резиденцијата „Вила Билјана“ во Охрид текот на јули и август 2001, каде што е и парафиран договорот на 10 август 2001, па оттаму името Охридски договор.
Преговорите траеја речиси цел месец и во нив учествуваа тогашниот претседател Борис Трајковски, лидерот на ВМРО-ДПМНЕ, Љубчо Георгиевски, лидерот на СДСМ, Бранко Црвенковски, лидерот на ПДП, Имер Имери, лидерот на ДПА, Арбен Џафери потоа претставници на ЕУ, Франсоа Леотар и Хавиер Солана, претставниците на САД, Питер Фејт и Џејмс Пердју, разни советници и експерти.
По завршувањето на преговорите во Охрид, на 13 август во Скопје договорот го потпишаа: Трајковски, Георгиевски, Црвенковски, Џафери, Имери а како гаранти на договорот се потпишаа специјалните претставници Леотар и Пердју./крај/бд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВМРО-ДПМНЕ: Орбан го пукна балонот на СДС, парите за кредитот се европски, а не кинески
Орбан го пукна балонот на СДС, парите за кредитот се европски, а не кинески. СДС со денови и месеци шири лаги дека парите од унгарскиот кредит се кинески, сега сите нивни лаги се распрснаа. Богданка Кузеска велеше: „Парите за унгарскиот кредит се всушност кинески пари”, велат од ВМРО-ДПМНЕ.
„Вчера премиерот на Унгарија, господин Виктор Орбан јасно кажа: ” Она што се однесува до заемот, кинески заем не можеме да даваме, кинески пари не можеме да даваме. Бидејќи ние со Кина имаме договор сите пари кои доаѓаат од Кина одат на конкретни проекти за развој во Унгарија. Значи кинески пари не можеме да даваме, европски пари можеме и тие ќе ви ги даваме.” Условите од кредитот се исклучително поволни за Македонија. Со каматна стапка од 3.2%, ги добиваме најдобрите услови на пазарот моментално. Дополнително рокот за отплата е 15 години, од кои 3 години се грејс период. Стопанството ќе добие 250 милиони евра од тие пари по истите услови по кои и зема државата. Општините ќе ги добијат остатокот од 250 милиони евра, кои ќе бидат наменети за капитални проекти. СДС се противи на развојот, СДС сака Македонија да стагнира, затоа се против Унгарскиот кредит, а во истовреме се и лицемерни, затоа што нивните градоначалници први поитаа да конкурираат за парите кои ќе ги дава владата. СДС се прочитана книга. Македонија економски ќе се трансформира и тоа СДС не може да го запре“, велат од партијата.
Македонија
Министерот за јавна администрација, Горан Минчев, оствари средба со ЕУ Амбасадорот Рокас
Министерот за јавна администрација, Горан Минчев, одржа средба со новиот ЕУ Аамбасадор, Н.Е. Михалис Рокас. На овој состанок се разгледаа тековните и планираните иницијативи на Министерството, со акцент на реформите во јавниот сектор.
Двајцата соговорници истакнаа значајната улога на Европската Унија како клучен партнер во напорите за подобрување на јавната администрација. Министерот Минчев посочи дека оваа средба е значаен чекор кон создавање на професионална и квалитетна јавна администрација, која ќе служи на граѓаните.
Амбасадорот Рокас потврди дека ЕУ е подготвена да обезбеди поддршка и ресурси за реформите, кои ќе имаат позитивен ефект не само на вработените во јавниот сектор, туку и на целото општество. Тој нагласи важноста на редовниот дијалог за поддршка на реформите, со цел подобрување на јавната администрација.
Министерот Минчев нагласи дека владата чекори по европскиот пат и дека нема друга алтернатива. Соработката со ЕУ е клучна за креирање квалитетни закони, кои ќе бидат ефективно имплементирани во иднина.
На крајот, Министерот Минчев го запозна Амбасадорот Рокас со активностите на Министерството за јавна администрација во изминатите 90 дена. Амбасадорот ги поздрави напорите на Министерството за јавна администрација и целата Влада за почетокот на реформската агенда , како и планот и роковникот за истата.
Македонија
Склучен Меморандум за соработка помеѓу Државниот завод за статистика и Царинската управа
Државниот завод за статистика електронски ќе ги презема податоците за надворешна трговија од Царинската управа. Ова е утврдено со Меморандумот за соработка, што беше потпишан од страна на директорот на Државниот завод за статистика, Дејан Станков и директорот на Царинската управа, Бобан Николовски.
„Преземањето на податоците од Царинската управа преку веб-сервиси е особено важно за обезбедување навременост и заштита на податоците како и понатамошно хармонизирање, модернизирање и унапредување на системите“ истакна Станков.
Директорот Станков, на денешното потпишување на Меморандумот, потенцираше дека институцијата вложува напори за дигитализација на процесите и зголемено користење на административните извори при продукција на официјалните статистички податоци.
Меморандумот е во насока на унапредување на меѓуинституционалната соработка преку размена на податоци и повисок степен на дигитализација.
„Царинската управа е посветена на процесот на унапредување на меѓуинституционалната соработка, што крајно треба да ни овозможи креирање одржлив економски раст. Ваквиот чекор е само дел од нашите заложби за заедничко делување во насока на подобрување на условите за водење бизнис. Сетовите на податоци што ги обезбедуваме во делот на надворешно трговската размена овозможуваат компаниите да направат истражување на пазарот и дефинирање на нивните стратегии, за економски студии, но и за унапредување на трговските политики на државно ниво“, истакна директорот на Царинската управа, Бобан Николовски.
И двете страни ја искажаа својата заложба за натамошно продлабочување на соработката, а потпишувањето на Меморандумот ги зајакнува и унапредува веќе воспоставените практики на размена на информации и податоци.