Франција очекува целосно спроведување на препораките од договорот во Пржино со кој беше ставен крај на повеќемесечната политичка криза во Македонија, вклучително и онаа за назначувањето на специјален јавен обвинител до 15-ти септември, порача во средата францускиот министер за европски односи, Арлем Дезир по средбата со неговиот домаќин, вицепремиерот за евроинтеграции Фатмир Бесими.

Според Дезир, договорот од 15-ти јули може да отвори нова етапа во историјата на земјата, но за тоа треба да се спроведат сите обврски од политичките партии.

„Обврски кои се мошне јасни, посебно за назначување специјален јавен обвинител којшто ќе биде независен во однос на аферата со прислушувањето назначен од страна на Собранието, со усвојување на закон треба да се случи до 15-ти септември и треба тој рок и да се почитува, како и подготовката и организирањето на изборите на 24-ти април. Но, исто така, и назначување транзициска влада до одржување на изборите е нешто што е од суштинско значење, како и продолжувањето на реформите и усвојувањето на приоритетните реформи како што постојано се бара во извештаите од Европската комисија и во извештајот на Прибе. Сиве овие обврски треба да се почитуваат во точно утврдените рокови, тоа е најважно“, изјави Дезир.

Додаде дека Владата треба да ги преземе сите неопходни мерки за да одговори на голем број недостатоци коишто, како што рече, беа констатирани посебно со прислушувањето, како и на бројните препораки коишто ќе гарантираат правна држава, почитување на фундаменталните слободи, поделба на различните власти во земјата, особено независност на судскиот систем.

Дезир се осврна и на мигрантската криза, потенцирајќи дека Македонија како земја кандидат за влез во ЕУ, ќе треба да смета на поддршката, но и на солидарноста од своите европски партнери.

За вицепремиерот Бесими, пак, имплементацијата на договореното во моментов е од највисок приоритет, со што Македонја би дала јасен сигнал дека е сериозна земја, заинтересирана за членство во ЕУ.

„Во однос на договорот од 2-ри јуни, јасно е тоа што треба да се направи, а тоа е имплементација на договореното. Во однос на реформите што се очекуваат од Македонија, треба и целосна имплементација на препораките и на договорот, со што Македонија би дала јасен сигнал дека е сериозна земја, заинтересирана за членство во ЕУ. Во однос на билатералната соработка и целиот процес на реформите би сакал да ја истакнал улогата и поддршката од страна на Франција, преку амбасадата во Скопје но и директните пораки од Париз за политичкиот дијалог и договорот. Важно е договорот да се имплементира и да и се даде шанса на европската перспектива на Македонија. Се согласивме дека вчера беше значаен ден за Македонија, пред се поради враќањето на најголемата опозициска партија во Собранието“, изјави Бесими.

Вицепремиерот, исто така, додаде дека и во иднина очекува плодна соработка со Франција, која досега ја поддржа Македонија во неколку реформски зафати преку ИПА фондовите и во реформите кои беа направени во јавната администрација, образованието и омбудсманот./крај/мф/бс