Централноевропската иницијатива (ЦЕИ) е една од најстарите европски регионални организации, а денес таа здружува 18 држави од кои десет се членки на ЕУ, што секако дава и посебна димензија на она што го викаме регионална соработка, истакна претседателот на Сорбранието, Трајко Вељаноски во четвртокот на отворањето на Седницата на Парламентарното собрание на Парламентарната димензија на ЦЕИ.

„Во мај месец годинава, исто така, се одржа сесија на Парламентарниот комитет, а од тогаш па се до денес во регионот, а и во Европа се случија многу работи кои од една страна се загрижувачки за сите нас, но истовремено уште еднаш го потврдуваат принципот дека само преку регионална соработка на повисоко институционално ниво можеме да ги решаваме проблемите. Секако тука пред се мислам на бегалската криза и сите оние предизвици, проблеми и закани кои доаѓаат или подобро речено веќе се тука меѓу нас“, истакна собранискиот спикер.

Според Вељаноски, за жал трагичните настани во Париз ја потврдуваат реалната опасност од тероризмот кој доаѓа од таканаречената Исламска држава, а кој реално гледано нема никаква поврзаност со исламот како релегија. Должност на секоја држава и секоја влада е да ги заштити своите граѓани, но истовремено преку соработка да придонесе кон глобалната борба против тероризмот, додаде претседателот на македонскиот парламент.

„Во овој период откако започна бегалската криза низ Република Македонија поминати се стотици и стотици илјади луѓе. Сепак, благодарејќи на организираноста и ангажманот на државните институции, но и на невладиниот сектор успеавме на овие несреќни луѓе да им ги обезбедиме оние основни услови за живот, храна, вода, облека, средства за лична хигиена и секако медицинска помош на оние на кои им беше потребна. Односно да обезбедиме колку толку достојно и безбедно поминување низ Македонија на нивниот пат кон Западна Европа. Истовремено, почитувајки ги меѓународните норми и принципи, како и заклучоците на ЕУ, сите овие луѓе се регистрирани односно им се издадени соодветни документи. Секако, ова да биде направено во голема мерка зависи и од соработката на нашите надлежни институции со надлежните институции со државите во регионот“, порача Вељаноски.

Според него, за жал, таа соработка со Грција е далеку од тоа каква треба да биде, иако станува збор за заеднички проблем и предизвици за двете држави.

„Понатаму, морам отворено да истакнам дека од страна на ЕУ имаме добиено многу мала помош и средства за справување со бегалската криза. Патем, и на последниот состанок во Брисел беше истакнато дека на Македонија мора да и се помогне пред се материјално за да продолжи успешно да се носи со бегалската криза.  Затоа, сакам уште еднаш да апелирам до вас, пред се до нашите членки кои истовремено се и членки на ЕУ да не дозволат бегалската криза да се решава парцијално и на товор на одредени држави. Солидарноста е принцип врз кој се темели денешна Европа,  но да незаборавиме дека мирот и безбедноста се неделиви категории. Ако ги почитуваме овие принципи мислам дека секоја членка поединечно, но и на ниво на Европа ќе можеме успешно да се справиме со овие проблеми и предизвици“, заклучи собранискиот спикер.

Вељаноски на крајот додаде дека претседавањето на Македонија со ЦЕИ било особено активно и со конкретни резултати, и порача дека верува оти дека и новиот претседавач Босна и Херцеговина ќе продолжи во тој правец, посакувајќи и на оваа земја успешно претседавање./крај/мф/бс