Руската ветеринарна служба ќе забрани увоз на сите видови американска храна, како и овошје и зеленчук од земјите од Европската унија, а бидејќи Русија е голем увозник на американска и европска храна, оваа забрана е знак дека се продлабочува судирот кој веќе руско-западните односи ги доведен на нивото од Студената војна.

Агенцијата Reuters извести дека по најавите за одлуката на рускиот претседател Владимир Путин да го донесе указот „За примена на одредени специјални економски мерки во насока на безбедноста на Руската Федерација“, со кој за период од една година се забранува или ограничува во Русија да се увезат земјоделски производи, суровини и храна од државите кои се придружија на санкциите против земјата, не успеала да добие коментар од руските ветеринарни власти, ниту од претставниците на Европската комисија во Брисел.Руската агенција РИА Новости, пак, јавува дека од надлежните служби ѝ било потврдено дека со декретот на претседателот под целосна забрана се опфатени овошјето и зеленчукот од земјите членки на Европската унија. Истиот извор потврдил и дека Русија ќе го забрани увозот на земјоделски производи од САД, вклучително и месото и преработките од живина. Се известува, исто така, дека веќе започнале консултациите за составување на листата веднаш по објавувањето на декретот. Агенцијата наведува и дека „руските трговци ќе ги заменат увозните производи со домашни, поради привремената рестрикција на увозот на храна“.Со декретот на претседателот Путин „се забранува или ограничува тргувањето со странство поради увоз во Руската Федерација на одредени видови земјоделски производи кои потекнуваат од земјите кои се одлучиле да воведат економски санкции за правни и/или физички лица или оние коишто им се придружиле на тие мерки“. Русија е најголемиот увозник на овошје и зеленчук од Европската унија. На пример, во 2011 година откупила 21,5 отсто од извозот на зеленчук на ЕУ и 28 проценти од целото овошје што ЕУ го извезувала. Русија увезува и многу американско пилешко месо, така минатата 2013 година откупила 276 илјади тони, што е 8 отсто од американскиот извоз, објави американското министерство за земјоделие. Единствено соседното Мексико увезува повеќе американско пилешко месо.Веднаш откако Кремљ го објави декретот на претседателот Владимир Путин, руската служба за фитосанитарна контрола јави дека во четврток со амбасадорите на Еквадор, Бразил, Чиле и Аргентина ќе разговара за можноста да увезува од овие земји. Претседателот на бразилското здружение на преработувачи во живинарската индустрија Франциско Тура веднаш во Сао Паоло најави дека оваа земја во Русија може да испрати дополнителни 150 илјади тони пилешко.Руската централна банка објави дека забраната за увоз на евтини производи го отежнува контролирањето на инфлацијата којашто во јули падна на 7,5 отсто на годишно ниво, но и натаму е значително повисока од 6,5 отсто колку што беше минатата година. Западните банки, пак, и покрај економските секторски насочени санкции против Русија, најавуваат големи профити на рускиот пазар.Поради падот на продажбата во вториот квартал од годинава, американскиот гигант „Coca Cola“ објави во средата дека ќе престане да се рекламира на руските телевизии./крај/мф/сн

Извор: Макфакс