Поранешниот шеф на израелскиот Совет за национална безбедност (NSC) го повика режимот на воена акција на Синајскиот полуосторв поради растечките тензии со Египет

Узи Дајан за израелската телевизија Channеl 7  изјави дека израелската војска и другите безбедносни сили треба да се подготват за период различен од минатото во справувањето со новата египетска влада. Тој тврди дека ваквиот воен чекор ќе има за цел да ги одврати оние кои претставуваат закана за израелската држава. „Ова е време кога израелската армија треба да ја наметне нејзината контрола на Синај“, вели Дајан. На израелските војници им е забрането присуството на Синајскиот полуостров според мировниот договор со Египет од 1979 година. Тензиите меѓу Каиро и Тел Авив ескалираа откако израелските војници во четвртокот убија неколку египетски војници и припадници на безбедносните сили. Дајан, исто така, откри дека на состанокот кој минатата седмица се одржал во присуство на началникот на израелскиот Генералштаб, Бени Џанст, било разговарано за прашања поврзани со ситуацијата на Синајскиот полуостров, но одбил да изнесе детаљи од разговорите. Нагласувајќи го значењето од зачувување на мировниот договор меѓу Израел и Египет постигнат со посредништво на САД, Дајан изјави дека израелски претставници треба да се заложат за „одржување на безбедноста на своите цивили додека се осигури дека нема ескалации на тензиите меѓу Израел и Египет“. Израелската армија мора да „одговори силно во справувањето со терористите и да ја  информира египетската влада дека воено може да интервенира на Синај“ за да се спречи израелската граница да стане ранлива зона за нападите на милитантите, вели Дајан во разговорот за израелската телевизија. Во саботата, Египет одлучи да го повлече својот амбасадор во Тел Авив откако односите меѓу двете влади станаа многу затегнати.