Политика
Движење БЕСА: Сочувство за семејствата и одговорност за институциите
Ги повикуваме сите граѓани на Република Македонија да ја сочуваат ладнокрвноста и трпението и да не потпаѓаат во замката на тие што сакаат политичката криза да ја претворат во меѓуетничка криза. Ние и понатаму ќе треба да живееме заедно и во добро и во зло, независно кој ќе биде утре на власт, се вели во соопштението од движењето БЕСА.
Од движењето БЕСА побараа одговор од министерката за внатрешни работи Гордана Јанкулоска, да каже кои се тие вооружени групи, кој стои зад нив, кој ги порачал, која е нивната агенда и како тие се најдоа сред Куманово?
Од БЕСА уште прашуваат зошто МВР не ги превземал потребните чекори за да се спречи овој инцидент, а се интересираат и за состојбата со цивилите во Дивата Населба во Куманово, односно дали има и меѓу нив жртви.
„Поаѓајќи од ова, но и од сите други објавени информации поврзани за министерката Јанкулоска, бараме нејзина оставка како министерка која се покажа како недостојна за оваа позиција и без капацитет да го гарантира и обезбеди животот на граѓаните на Македонија“, порачаа од БЕСА.
Тие прашаа и каде е двоецот Ахмети-Џафери и зошто не одат во Куманово и не се произнесат по овие настани.
„Повторно ја повикуваме меѓународната заедница, особено ОБСЕ да интервенира во функција на решавање и привршување на кризата, додека го повикуваме и Црвениот Крст да ги третира рамноправно сите жртви на овој инцидент во Куманово. Црвениот Крст треба да се грижи потполно за убиените, повредени или приведени цивили и да не дозволи оваа политичка и воена криза да стане и хуманитарна криза“, се вели во соопштението, во кое уште се бара „оние што го нарачале ова сценарио, да понесат одговорност“. /крај/мф/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мојсоска: Усеини уништува антифашистичко наследство додека СДС и ДПМНЕ молчат
Од локацијата кај познатата Бела куќа на ул. ,,Димитар Влахов” бр. 9 во Охрид, од каде бескруполозно беше тргната плочата од НОБ, Носителот на ИЕ5 и Генерален секретар на Левица, Јована Мојсоска истакна:
,,Овој културен објект беше уништен од страна на локалниот шериф, Нефи Усеини. Плочата на АСНОМ каде пишува за осудените антифашисти од страна на бугарскиот окупатор, беше тргната пред месец дена. Од градоначалникот Пецаков нема никаква реакција додека се уништува антифашистичкото наследство од страна на поранешниот функционер на ДУИ”.
Мојсоска се наврати кон 2019 година кога беа силни обвинувањата на ВМРО – ДПМНЕ кон Усеини. Според Мојсоска, наспроти тоа, се испоставува дека коалицијата ДПМНЕ – ДУИ сега е уште посилна, благодарение на заедничките бизнис – интереси.
,,Ќе потсетам дека во 2019 година, токму ВМРО-ДПМНЕ обвинуваше дека Усеини го тероризира Охрид. За жал, Охрид го губи својот автентичен изглед, иако за овој објект има Решение за уривање. Институциите молчат, молчи и Министерството за култура кое е раководено од социјал-демократите”, додава Мојсоска за криминалот на поединците и молкот на институциите.
Јована Мојсоска како Носителот на ИЕ5 и Генерален секретар на Левица, порачува:
,,Затоа на 8 мај, да заокружиме број 5, за да ставиме ред во безредието и закон во беззаконието!”
Македонија
ВМРО-ДПМНЕ: ДУИ се обидува да поткупува гласачи дури и во верски објекти, залудни сценарија, секако ќе одат во опозиција
ДУИ се обидува да поткупува гласачи дури и во верски објекти, залудни сценарија, секако ќе одат во опозиција, велат ВМРО-ДПМНЕ преку соопштение.
– Функционери на ДУИ се забележани дури и во места како Виница, Кочани, Берово, Делчево каде во верски објекти со полицајци се обидуваат да поткупуваат гласачи. Со ова се обидуваат да освојат голем резултат, мислејќи дека така ВМРО-ДПМНЕ ќе мора да седне со нив, но се лажат. ДУИ оди во опозиција и со тоа треба да се помират. Залудно е и полнењето кутии. Примерите кои се нотирани во Липково, не им помогнаа во првиот круг, нема ниту сега во вториот. Времето кога го купуваа гласот на народот завршува. Време е Македонија да ја вратиме на народот. Македонија повторно твоја, – додаваат од партијата.
Македонија
СДСМ: Глас ЗА СДСМ на 8 мај е глас за слобода, демократија и европска држава
Гласот ЗА СДСМ на 8 мај е глас за слобода, демократија и европска држава, за чување на темелите на државноста, демократските вредности, внатрешната кохезија, стабилни етнички односи, безбедна и европска иднина на Македонија, велат од СДСМ преку соопштение.
– СДСМ ја врати слободата, ја врати државата на вистинскиот пат. Директна потврда дека со СДСМ се почитуваат демократските и европските вредности е последниот извештај на „Репортери без граници“, според кој Македонија е на 36-тото место и најдобро позиционирана во регионот, по слободата на медиумите. Во 2016 година бевме на дното, рангирани на 118-то место. Тогаш слободно кажаниот збор се казнуваше, медиумите беа цензурирани, граѓаните беа манипулирани. Враќање на режимот на ДПМНЕ во најава, би значела сигурна блокада на Македонија и внатрешни етнички тензии, што би и нанело огромна штета на иднината на државата. Преголема моќ за десничарска партија како ДПМНЕ која воопшто не е променета, ќе претставува сериозна закана од враќање на заробена држава, поделби, уцени и закани. Затоа е важно граѓаните да излезат на 8 ми мај масовно и да гласаат, заедно со СДСМ да не дозволат враќање назад, – додаваат од партијата.