Македонија
Нема опасност во Косел, апел да не се шират дезинформации
Појавата на чад од сулфатарата Дувало во Косел, остаток од вулкан кој изумрел пред милиони години, е природна појава и нема простор за паника кај населението, затоа што не се регистрирани никакви сеизмички активности во тој регион, смируваат надлежните институции, објави OhridNews.
„Врз основа на добиените информации од терен се работи за природна активност. Овде е расадна линија од каде постојано излегува сулфур водород и јаглероден диоксид. На ова место со години наназад се одлагал смет, а и мештаните тука го фрлаа ѓубрето. Овде има голем слој на градежен шут, кој најверојатно ги затворил природните отвори од каде излегува гасот, а затворена е и главната дупка поради дождовите и најверојатно гасот има направено нови отвори под притисок и затоа излегувал поинтензивно црн чад. Според информациите на Институтот за земјотресно инженерство и сеизмологија во Скопје, не е забележана никаква сеизмолошка активност во ова подрачје, што значи дека се работи за нормална појава на излегување на гас од расадната линија”, објаснува Љупчо Прескакулов од Дирекцијата за заштита и спасување.
Информациите за оваа природна појава беа сензационалистички пренесени во дел од медиумите што предизвика вознемиреност кај населението, но и чудење кај жителите на Косел.
„После долги години прв пат се случи да избијат гасови од вулканот во Косел. Ова мораше да се случи затоа што пред две години кратерот на вулканот беше затрпан при чистење на депонијата од страна на комуналното претпријатие. Поради тоа гасот изби на друго место. Не се направи никаква паника, луѓето се навикнати на вакви појави. Од љубопитност некои дојдоа на ова место кое треба да претставува атракција”, изјави 62-годишниот жител на Косел Мите Мојсоски.
Сулфатарата Дувало денеска ја посети градоначалникот на Охрид Никола Бакрачески, кој исто така упати смирувачки зборови, укажувајќи дека нема причина за загриженост. Тој истакна дека локалната самоуправа веднаш стапила во контакт со надлежните институции, ЦУК, ДЗС, Природноматематичкиот факултет, институтот за хемија и други.
„Нема никаква причина за загриженост, ниту за вознемиреност на населението не само во околината на Косел туку и во градот Охрид. Се работи за природна појава која се случува при промена на временските прилики. Нема никаква опасност ниту по здравјето на луѓето, ниту по околината”, изјави градоначалникот Бакрачески.
Тој додаде дека општината во рамки на програмата за животна средина презема мерки за уредување на просторот, а изработени се и промотивни флаери со цел промоција на овој локалитет во туристички цели.
Бакрачески ги демантираше гласините кои се појавија во одредени медиуми објавени во текот на вчерашниот ден околу некаква сезимичка активност на просторот и упати апел да не се шират дезинформации и паника во јавноста.
Дејан Пановски од Министерството за животна средина и просторно планирање појаснува дека сулфатарата Дувало во Косел е поствулканска појава, која дополнително треба да се истражи и валоризира во туристички цели.
„Ако имате една ваква поствулканска појава во вашиот регион, а не се користи во туристички цели навистина е штета,” рече Пановски.
Вулканот во Косел, односно сулфатарата “Дувало” претставува активна поствулканска појава која се наоѓа во непосредна близина на селото сместено недалеку од Охрид. Има изглед на минијатурен кратер со пречник од 0,5 м и длабочина од 30 см. Од отворот избиваат гасови на јаглен диоксид и сулфур водород заради што оваа појава во исто време е и мофета и сулфатара. Според стручњаците претставува последен знак на изумирање на некогашна вулканска активност. Сулфатарата Дувало во Косел е поствулканска појава една од ретките од ваков вид во овој дел на Европа. Со самиот ваков карактер сулфатарата преставува природен феномен, поради што во 70-тите од страна на Собранието на Општина Охрид добила статус на природна реткост. Во 2010 година Секторот за урбанизам и заштита на животна средина при општина Охрид отпочна активности за заштита и уредување на локалитетот Дувало (сулфатарата во Косел) и негова промоција.крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мециновиќ: На носителите на ЗНАМ, на личните профили им стојат слики со Заев и Пендаровски
– На носителите на ЗНАМ, уште на личните профили им стојат слики за поддршка на Заев и Пендаровски. Тоа се поддршки што јавно им ги дадоа, така што сегашното нивно делување е малку повеќе лицемерно од нивна страна – истакна Носителот на ИЕ2 и портпарол на Левица, Амар Мециновиќ, во дебатата на ,,24 Вести”.
Според Мециновиќ, СДСМ ако ја примеа пораката, немаше Оливер Спасовски да биде носител во ИЕ2, после скандалите со пасошите за белосветски криминалци, за голготата за македонските граѓани со пасошите и за бегството на Груевски:
– Од друга страна, за СДС имам конкретна порака, но СДС не ја прима пораката! Пораката не е примена, затоа што нивниот носител во Двојка имаше страшни резултати. Имаше: од бегството на Груевски до оваа голгота што им се случи со пасошите на граѓаните и во меѓувреме – издавањето на пасоши за белосветски криминалци.
Говорејќи за Францускиот предлог и за ненаситноста кон бизнис – интересите од страна на СДСМ, Мециновиќ рече:
– Исто така, не ја примија ни пораката кога народот го отфрли Францускиот предлог. Не ја примија ни пораката кога Заев го изгуби легитимитетот, така што на сила се одржаа на власт до 2024 год. Практично, за да ги задржат нивните бизнис – интереси.
Мециновиќ постојано става акцент и на неоспорниот факт дека челниците од ЗНАМ го избришаа АСНОМ од Уставот:
,,ЗНАМ го избришаа АСНОМ од Уставот кога го носеа Преспанскиот, со оглед на фактот дека тогаш беа дел од раководството на тогашното СДС. Затоа, целата нивна сегашна реторика е лицемерна”.
Левица е единствена искрена, чесна, неподмитлива опција, која се бори за нулта – корупција, радикални промени во системот и нуди решенија за сите целни групи граѓани во Македонија:
,,На 8 мај, заокружете го број 5! Искористете го своето право на глас и гласајте за Левица! Со повеќе пратеници во Парламентот, борбата ќе биде посилна!”
Македонија
Аваја: Треба да се искористи потенцијалот на ромската заедница
Ромската заедница има најмлада популација во државата и тој потенцијал треба да се искористи, порача Ќемал Сулејманов, носител на листа во Изборна единица 3 на средба со жителите на Криволак.
„Нашата заедница е најмладата популација во државата. И нашите млади бегаат надвор од државата, барајќи решенија, а ние увезуваме работници од азиските држави. Мора да најдеме решение како нашите млади да останат во државата. Заеднички да ги направиме промените иво нашите инситтуции да имаме наши луѓе. Ветуваме дека промените почнуваат со Аваја. Вашиот глас го давате за подобра иднина и соединети да покажеме дека сме тука“ порача Сулејманов.
Според него, доволно е ромската заедница да биде третирана само како чистачи и амалџии „Драги браќа и сестри, ги знам вашите проблеми со кои се соочувате, тие се мои проблеми и мора да засукаме ракави по избори и заедно да ги решаваме. Мора да се сооединиме и да почнеме со промени. Мора да имаме наши луѓе во сите институции и тоа на раководни позиции. Доста не гледаа само како чистачи и нивни амалџии“, рече Сулејманов.
Претседателот на Аваја, Акиф Кариман, рече дека одлучил да ја жртвува индивидуалната кариера за да придонесе кон напредокот на народот. Тој говореше за тоа како другите политичари ги гледаат и вреднуваат Ромите.
„Зошто? Затоа што секогаш не потценуваат. Велат ние знаеме лесно да се справиме со вас. Малку ќе ве преплашиме и вие ќе се повлечете. Ќе ви дадеме под рака и вие ќе бидете на наша страна. Или ако тоа не функционира, ќе почнат со притисоци. И тоа досега функционираше. Но, сега ја имаме Аваја, формирана да биде рамо до рамо со сите нас. Ние сме тука да направиме голема промена и да го предизвикаме статус квото“, порача Кариман.
Македонија
Џафери за Велигден: Обединети да продолжиме и да осигураме благосостојба денес и за идните поколенија
Претседателот на Владата на Република Северна Македонија, Талат Џафери, во име на Владата на Република Северна Македонија и во свое име, испрати телеграма со честитки за најголемиот христијански празник, Воскресение Христово – Велигден, до поглаварот на Македонската православна црква – Охридска архиепископија, архиепископ охридски и македонски, г.г. Стефан, до Светиот архиерејски Синод, свештенството и монаштвото на МПЦ-ОА, до православните верници и до сите граѓани кои денеска го чествуваат празникот.
„Задоволство ми е во име на Владата на Република Северна Македонија и во мое име, да Ви го честитам најголемиот христијански празник, Воскресение Христово – Велигден, Вам, на Светиот архиерејски Синод, на свештенството и монаштвото на Македонската православна црква – Охридска архиепископија, на православните верници и на сите граѓани кои денеска го чествуваат празникот.
Велигденската порака за победата на животот над смртта е порака која влева надеж дека за животот, вреди да се преземе секој чекор на храброст и пожртвуваност, чекор кој води кон светла цел. Заедничкото добро, е благословена човекова определба, и тоа може да се постигне само ако се почитуваат основните постулати на кои упатуваат бројните примери низ историјата. Особено во денешен контекст, кога човештвото и светот секојдневно се соочуваат со најразлични предизвици кои се закана по животот, мирот, здравјето и менталната благосостојба, потребни се повеќе од кога било пораките на надеж, единство и верба во тоа заедничко добро, засновано врз практикувањето на универзалните вредности како што се хуманоста, солидарноста, одговорноста и взаемната почит.
Вашата улога има голема одговорност и јас Ви посакувам мудрост во исполнувањето на благородната мисија. Ви пожелувам празникот да го поминете во добро здравје, спокој во душата и среќа меѓу саканите, а со разбирање, меѓусебна почит и обединети, да продолжиме да ја унапредуваме Република Северна Македонија и да обезбедиме благосостојба денес и за идните поколенија“, стои во честитката од премиерот Џафери до поглаварот на МПЦ – ОА, г.г. Стефан.