Претседателот на Република Македонија, Ѓорге Иванов во својот новогодишен говор истакна дека државата минатата година се соочувала со три кризи и тоа политичката, безбедносната и мигрантската. Порача дека е добро од мерките и начинот на кој Македонија се справи со бегалската криза да извлечат поука политичарите и да ја решат политичката криза.
 

Претседателот на Република Македонија, Ѓорге Иванов во својот новогодишен говор истакна дека државата минатата година се соочувала со три кризи и тоа политичката, безбедносната и мигрантската. Порача дека е добро од мерките и начинот на кој Македонија се справи со бегалската криза да извлечат поука политичарите и да ја решат политичката криза.

„Како претседател на Република Македонија, но и како врховен командант на вооружените сили, годинава, на надворешно-политички план имав активна година во исклучително тешки услови. И внатрешни, и регионални, и глобални“, изјави Иванов.

Претседателот рече дека бил целосно посветен на прашањата од областа на безбедноста и одбраната. 

„Бев целосно посветен на прашањата од областа на безбедноста и одбраната. Во сè што правев ги чував интересите и достоинството на државата и на граѓаните. А тоа беше повеќе од неопходно бидејќи достоинството на државата беше доведено во прашање“, рече тој.

Иванов забележува дека во последните шест години имавме три политички кризи за што некои забележуваат дека кризата ни станала секојдневие.

„Поради политичка неодговорност го добивме „Договорот од Пржино“. Добивме договор меѓу политичките лидери на кои уставниот поредок не им беше доволен за да се сретнат, да седнат и да се договорат. Наместо во институциите на државата, отидоа да се среќаваат на други места и во други формати. Ќе се воздржам од натамошен коментар, но ќе го кажам само ова: нивна беше одлуката, нивна е и одговорноста за Пржино. Оние кои си презеле обврска треба и да си ја исполнат“, рече Иванов.

Претседателот смета дека напразно се зборувало дека него го нема во јавноста, напротив при секоја криза тој ги собирал лидерите на политичките партии во неговиот кабинет, сè додека не најдат решение.

„Граѓаните треба да знаат дека моите напори во решавањето на кризата не секогаш ги истакнував јавно во интерес на дијалогот меѓу лидерите. Сакав да им оставам доволно време и доволно простор тие самите да дојдат до решение“, изјави Иванов.

Тој ги потсети политичките партии дека нивното неодговорно однесување неповолно се одразило и врз евроинтегративниот процес.

„Наместо извештај за напредок, добивме извештај за стагнирање. По седум години наместо датум за членство добивме условна препорака. Се разбира, главна причина зошто Македонија е блокирана е грчкото вето. Тоа никој не може да го оспори. Но, кога знаеме дека е тоа така, тогаш зошто, покрај овој постоечки, да создаваме и нов, внатрешен проблем? Пречка за интеграциите веќе не е само наметнатиот проблем со името, туку и проблемот што го имаме со самите себе. За жал, и овој пат, оставивме тој проблем да ни го решаваат други“, рече Иванов.

Сепак, им забележа и на ЕУ и НАТО дека треба да го сменат нивниот пристап кон Македонија, да не одолговлекуваат и да не бараат изговори за нови блокади. Иванов смета политичката криза ја отворила вратата за безбедносни закани кои доаѓаат од повеќе места како тероризам, радикализам, организиран криминал и друго. Потсети дека на 9-ти мај мирниот живот на Куманово бил загрозен од насилни екстремисти и терористи кои дошле да ја дестабилизираат државата.

„Но, граѓаните треба да знаат дека со акцијата во Куманово спречивме извршување на координирани терористички напади низ повеќе градови во Македонија. Спречивме масакри и крвопролевања какви што неодамна видовме во Париз“, рече Иванов, кој смета дека Куманово е школски пример како не треба да се однесуваат државите и службите во постигнување на регионална безбедност.

Иванов се осврна и на бегалската криза и потсети дека Македонија беше првата држава во Европа која не е членка на ЕУ а прогласи кризна состојба за закана од илегална миграција која доаѓа од територијата на ЕУ. Како претседател ја повика Армијата на РМ за поддршка на граничната полиција а пред европските власти остро се спротивстави на идејата за поставување бегалски камп во кој би се сместиле 30 илјади луѓе, со што смета дека би се зголемиле безбедносните ризици за Македонија. Задоволен е од одлуката Фронтекс да се распореди на јужната македонско-грчка граница.

„Наспроти забелешките за нефункционалност на институциите, по прогласувањето кризна состојба, Македонија е редок пример за успешно справување со мигрантската криза. Македонските институции, иако се оставени без речиси никаква директна билатерална помош од Европските институции, успешно се справуваат со секојдневниот прилив на бегалци“, рече Иванов.

Иванов е свесен дека бегалската криза ги отвори и вратите за терористи и криминалци, па затоа забележува дека блокадата за членство во НАТО се одразува и на ефикасноста на нашиот систем за одбрана и безбедност.

„Затоа, како претседател и како врховен командант, постојано потенцирам на неопходноста од зголемување на буџетот за Армијата на Република Македонија, ревизија на законите и спроведување на неопходните реформи. Потенцирам на неопходноста од техничка надградба, кадровски капацитети и оправдана финансиска потреба за субјектите кои учествуваат во превенцијата и во справувањето со заканите“, рече тој.

Повика да и помогнеме на Исламската верска заедница во нејзината борба против екстремните поединци и за спречување на радикализацијата.

„Затоа, од сите овие кризи и закани неопходно е да излеземе како држава во која институциите не создаваат, туку ги решаваат проблемите на граѓаните“, рече македонскиот претседател.

Иванов смета дека крајно време е да го надминеме погубниот синдром на сервилност и следната година, кога прославуваме четврт век независност, да не дозволиме некој друг да ни го моделира политичкиот и правниот систем. Осврнувајќи се на состојбата во медиумите рече дека треба сами новинарите да се изборат за најдобрите решенија кои ќе овозможат медиумите да го вратат достоинството и угледот. Повика по изборите во април да се постигне обединување околку клучните стратегиски цели на државата.

„И притоа, не е само важно кој ќе биде избран во ова Собрание, и кој ќе ја избере Владата, туку и како тоа ќе се спроведе. Бидејќи, граѓаните на избори не кажуваат само кој да владее, туку и како да се владее“, рече тој.

Македонија, смета претседателот, минувајќи низ трите кризи има три можности да излезе посилна и посплотена и обединета./крај/мф/бб

Извор: Фото/МИА