Пентагон го објави името на американскиот војник осомничен за масакрот врз авганистанските цивили, пренесува телевизијата Fox News, повикувајќи се на сопствени извори во министерството за одбрана на САД.

Пентагон го објави името на американскиот војник осомничен за масакрот врз авганистанските цивили, пренесува телевизијата Fox News, повикувајќи се на сопствени извори во министерството за одбрана на САД.„Станува збор за наредникот Роберт Бејлс“, тврди телевизијата, истакнувајќи дека претходно обвинетиот за тешкото кривично дело бил префрлен во воената база во Форт Левенуерт во сојузната американска држава Канзас. Претходно, 38-годишниот наредник беше во притвор во американската воена база во Кувајт.Се очекува дека формалното обвинение против осомничениот ќе биде поднесено во рок од неколку седмици. Неговиот адвокат Џон Хенри Браун, изјави дека случајот не е обично кривично дело и ја потврди можноста за смртна казна за неговиот клиент. Браун, исто така, изрази изненадување од фактот што наредникот кој се здобил со повреди на черепот и мозокот и други рани додека служел во Ирак, повторно бил испратен во воено жариште.Адвокатот изрази сомневање дека неговиот клиент го извршил масакрот во авганистанската област Панџваи под дејство на алкохол. Најверојатно, според него, причината за трагедијата е стресната состојба на војникот додека служел во Авганистан.Американскиот војник на 11-ти март, стрелаше врз авганистанските цивили во областа Панџваи во јужната авганистанска покраина Кандахар, влегувајќи во куќи во две села среде ноќ и пукал во нив, притоа убивајќи 16 цивили, од кои девет деца и три жени.Според американски воени извори, војникот го извршил злосторството откако претрпел нервен слом. Наредникот ја напуштил базата во областа Панџваи околу три часот изутрина по локално време и влегол во три приватни куќи каде што отворил оган од своето оружје. По убиствата, војникот сам им се предал на американските воени власти.Кратко време по инцидентот, осомничениот војник беше пренесен од Авганистан во американската воена база во Кувајт. Според медиумите, наредникот (според други извори водник во логистиката), кој служел во Третата бригада „Страјкер“ на копнените војски на САД во рамките на мисијата ИСАФ во Авганистан, трипати претходно бил во мисија во Ирак, каде што во борбите претпрел сериозни повреди на мозокот, откако неговото возило налетало на крајпатна мина.Бејлс стапил во американската армија кусо време по терористичките напади врз САД од 11-ти септември 2001 година, служејќи во три наврата во Ирак пред ланскиот декември да биде прекомандуван во Авганистан./крај/мф/сн