Европа
ЕУ бара можност за суспендирање на Шенген на две години, и осигурување на македонско-грчката граница
Министрите за внатрешни работи на Европската унија ја повикаа во понеделникот Европската комисија да подготви правна и политичка основа за можно воспоставување на граничните контроли во рамките на шенгенскиот простор на период до две години, за разлика од вообичаените шест месеци, како и да се испита можноста дали Фронтекс може да помогне во обезбедувањето на границата меѓу Македонија и Грција, истовремено кога европските напори да се контролира мигрантската криза имаат малку ефект.
Министрите за внатрешни работи на 28-те земји членки на Европската унија се собраа во понеделникот на неформална средба во Амстердам, под претседавање на холандскиот министер за миграции Клаас Дијкоф, чијашто земја претседава со Советот на ЕУ во првото полугодие од 2016 година.
Дијкоф по средбата за новинарите изјави дека министрите се согласиле околу барањето до Европската комисија да ја подготви предлошката за користењето на членот 26 од Законикот за шенгенските граници. Тој член ја предвидува можноста за воведување на контролата на внатрешните граници и до две години, доколку постојат сериозни недостатоци на надворешните граници на Шенген просторот.
Под притисокот масовниот прилив на имигрантите во Европската унија досега шест земји воведоа привремени гранични контроли. Граничната контрола на внатрешните шенгенски граници може привремено се воспоставуваат во случај на безбедносни закани и поради вонредни настани, а може да трае до три месеца, со можност да биде продолжена на уште три месеца. Меѓутоа, во сите тие случаи на еднострано дејствување, членките на Шенген мора за тоа да ја известат Европската комисија и другите членки, како и да ги наведат причините кои ги навеле на тој потег.
Германија би сакала да ја продолжи можноста за контролата и до две годни, а за тоа треба да докаже дека постојат трајни недостатоци на надворешните граници на Шенгенскиот простор.
Министрите за внатрешни работи на земјите членки на ЕУ, исто така на ЕК „ѝ дадоа јасен сигнал да испита дали може европската агенција за граници Фронтекс да помогне во осигурувањето на границата меѓу Македонија и Грција“, изјави Дијкоф.
Во ЕУ изминатите денови се зголеми притисокот врз Грција да почне ефикасно да ја контролира својата граница со Турција. Најдалеку во тој притисок отиде Австрија, чијашто министерка за внатрешни работи Јохана Микл-Лајтнер ја предупреди уште еднаш во понеделникот Атина дека надворешната граница на шенгенскиот простор би можело да се премести кон средна Европа, доколку таа не обезбеди ефикасна контрола на својата граница со Турција.
„Доколку не успееме да ја осигуриме надворешната граница на ЕУ, грчко-турската граница, надворешната граница ќе се придвижи кон средна Европа. Мит е дека грчко-турската граница не може да се контролира. Грчката морнарица има доволно капацитети за обезбедување на таа граница“, изјави австриската министерка Лајтнер по доаѓањето на неформалниот состанок на министрите за внатрешни работи на ЕУ во Амстердам.
Лајтнер и минатата сабота преку медиумите ја предупреди Грција дека е можно нејзино „привремено исклучување“ од шенгенскиот простор, доколку не ги отстрани недостатоците во контролата од надворешните граници, но тогаш беше критикувана од шефот на германската дипломатија Франк-Валтер Штајнмаер оценувајќи го како „псевдо решение“.
Споменатиот член 26, кој досега не е користен, дозволува воведување надзор на внатрешните граници до две години во една или повеќе членки, на дел или по должината целата надворешна граница на шенгенскиот простор доколку има сериозни недостатоци на надворешните граници на просторот.
Споменувањето на овој член силно одекна, бидејќи може да се толкува и како можноста за привремено исклучување на Грција од шенгенскиот простор или како можност за создавање таканаречен „мини шенген“.
За да се активира членот 26, прво ЕК мора да даде оцена на земјата членка со проблематична надворешна граница и да ѝ препорача мерки кои треба да ги преземе. Тогаш земјата членка има рок од три месеца да ги спроведе препораките, а во спротивно може да биде активиран членот 26.
Привременото суспендирање на шенгенските прописи кое го воведоа Австрија и Германија истекува во мај, и за да може тоа да биде продолжено на две години потребно е целиот процес да биде започнат три месеца порано, што значи веќе во февруари./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.