Европа
Москва: Руските контролори на летање не се одговорни за падот на авионот на Качински
Руските контролори на летање не се одговорни за воздухопловната несреќа во која на подрачјето на Русија во 2010 година загина полскиот претседател Лех Качински, соопштија во четврток руските истражни органи.
Информацијата е објавена по само две недели откако Варшава најави обвиненија против двајцата руски контролори.
Во несреќата што се случи на 10 април 2010 година загинаа претседателот Качински, неговата сопруга и уште 94 лица, меѓу кои високи воени и политички функционери.
„Истражната комисија нема никакви причини да зборува за одговорност, ниту минимална, на контролорите за летање за несреќата. Тие во целост ги почитувале инструкциите и правилата на цивилниот воздушен сообраќај“, се вели во соопштението од Комисијата.
Пред две недели полското воено обвинителство информираше дека, според нивна оценка, главни виновници за несреќата се пилотите, а најавија и покренување на обвинение против двајцата руски контролори на летот кои придонеле за несреќата.
Полскиот претседател на 10 април 2010 година патуваше на комеморација по повод масакрот кај Катин, каде што тајната полиција на Советскиот сојуз во 1940 година уби илјадници полски офицери што во Втората светска војна ги зароби Црвената армија.
Остатоците од авионот Тупољев 154 сè уште се наоѓаат во Смоленск, а Москва одбива да ги врати со објаснување дека истрагата сè уште не е завршена. /крај/хн/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Ги убил двајцата внуци, па си пресудил самиот на себе: пензионер се забарикадирал во куќа во Шпанија
Трагедија се случи во мал шпански град кога пензионер ги уби своите двајца внуци на возраст од 10 и 13 години пред да се самоубие – два месеца откако сопруга и ќерката му загинаа во сообраќајна несреќа додека тој возел.
Полицијата ја опколила куќата на 72-годишниот маж откако тој синоќа се забарикадирал во имотот со момчињата.
Нивните три тела беа пронајдени околу 8.30 часот утринава во разни простории од куќата во Хуетор Тајар – град со околу 10.000 жители, во близина на градот Гранада во јужна Шпанија – кога насилно влегле вооружени полицајци.
Едното дете е убиено со огнено оружје, а другото се удавило.
Извори блиски до истрагата велат дека едно од децата имало прострелни рани, а другото се верува дека се удавило.
Истражителите на Цивилната гарда велат дека пензионерот се застрелал со истото огнено оружје што го користел за да го убие својот внук.
Неговата сопруга и ќерката, мајка на две деца, ја загубија борбата за живот кога беа исечени од остатоците од автомобилот што го управуваше 72-годишникот.
Европа
Се огласи болницата во Банска Бистрица: Ова се последните информации за состојбата на Роберт Фицо
Состојбата на словачкиот премиер Роберт Фицо, кој беше ранет во обид за атентат минатата недела, е стабилна, соопштија од болницата во Банска Бистрица.
„Клинички се подобрува, комуницира, воспалителните параметри полека се намалуваат. Премиерот останува под наша грижа“, соопштија од болницата во Банска Бистрица по денешната седница на советот.
Фицо беше тешко ранет минатата среда по состанокот на кабинетот кога се приближи до насобраните луѓе.
Тој со хеликоптер беше префрлен во болницата во Банска Бистрица, каде што итно беше опериран и оттогаш е таму.
Претходните денови се зборуваше за префрлање на премиерот во друга институција, но како што може да се заклучи од денешното соопштение на болницата, тој засега останува во Банска Бистрица.
Европа
Украина со дронови нападна руска рафинерија: „Има штета, престана да работи“
Руска нафтена рафинерија во Славјанск, во Краснодарската област, беше оштетена по напад со беспилотно летало кон крајот на минатата недела, објави денеска државната новинска агенција „Тасс“ цитирајќи претставник на компанијата за безбедност.
Шест беспилотни летала погодија област на нафтена рафинерија во Славјанск во јужниот дел на Русија Краснодар во раните утрински часови, според локалните власти.
Новинската агенција „Интерфакс“ објави дека рафинеријата престанала да работи по нападот.
„Причинета е штета. Ќе се утврдат нејзината големина и опсегот“, ја цитира „Тасс“ изјавата на безбедносниот претставник Едуард Труднев во понеделникот.
Рафинеријата во Славјанск е приватна постројка со капацитет од речиси 100.000 барели дневно. Произведува гориво за домашни потреби и за извоз.