Редакцијата на списанието за уметност „СУМ“ од Штип, годинешната наградата „Ерго СУМ“ му ја додели на македонскиот драмски писател и драматург, Зоран Пејковски, за популаризација и афирмација на театарскиот израз.

Зоран Пејковски наградата ја добива за неговите писмени артикулации во електронските и пишаните медиуми со кои ѝ дава гласност на сценската уметност, поточно на театарскиот израз .

„Редакцијата на списанието СУМ поаѓајќи од фактот дека во последните години сѐ помалку му се приоѓа на театарот од теоретски аспект со наградата сака да ги поттикне познавачите на театарската уметност: драматурзите, театарските критичари и театролозите да дадат свој придонес во афирмацијата и популаризацијата на театарскиот израз, т.е на сценската реалност“, се вели во образложението на редакцијата.

Зоран Пејковски е магистер по драматургија, но е и единствениот натуралист во македонската литература, а покрај тоа што тој е драмски писател и драматург, тој е и поет, прозаист, преведувач и публицист, а е и драматург во Народниот театар од Охрид. Воедно тој е и докторант на Институтот за македонска литература при Универзитетот „Свети Кирил и Методиј“ од Скопје.

Инаку, Зоран Пејковски автор е на повеќе книжевни и драмските дела, и тоа: „Атомско време“ (трагедија, 1987), „Тесно небо“ (поезија, 1993), „Последниот чин на комедијата на смртта“ (трагикомедија, 1994), „Реликвија на светлината“ (поезија, 1996), „Облак во пантолони“ (препев на В.В. Мајаковски, 1997), „Relic of the light“ (поезија, 1998), „Филозофија на смртта“ (поезија, 1999), „Љубов на вересија“, (љубовно-еротска комедија, 2000), „Театарот е ритам и стил“ (публицистика, 2002 година), „За животот, љубовта и смртта“ (монодрама, 2011), одиграна на сцената на Народниот театар од Битола, во театарската сезона 2001-2002 година, „Театарот е фабрика за соништа“ (публицистика, 2012 година), „Сон“ (трагедија, 2013 година), „Сега знам“ (поезија, 2014 година), „Сите наши кодоши“, (македонска национална крвава трагедија, 2014 година), „Самуилово распетие“ (драмата во стих со пролог и епилог, 2014 година). Во 2014 година, го работи и сценско-драмскиот рецитал „Херувимите на Самуиловата круна“, кој беше одигран од актерите на Народниот театар од Битола по повод 1000-годишнината од смртта на царот Самуил, во организација на Министерството за култура на Република Македонија и Општината Демир Хисар, а по повод отворањето на Демирхисарското културно лето – Топол културен бран. Потоа следат и „Градот на јужното море“ (роман, 2015 година), како и сценско-драмскиот рецитал „Со љубов кон Свети Климент Охридски“ (2015 година), а актерите на Народниот театар од Прилеп, го одиграа, по повод отворањето на Демирхисарското културно лето – Летен културен бран во организација на Министерството за култура на Република Македонија и Општината Демир Хисар, кој во 2016 година излегува од печат.

Во 2016 година од печат излегуваат и „Да не ми е сон“ (поезија, 2016 година), „Избор драми – трагедии“ направен од проф. д-р Димитар Пандев кој се осврнува во предговорот на оваа книга, (избор драми-трагедии, 2016 година), како и „Златна прашина“ (поезија, 2016 година). Меѓу другото тој е и автор на драмскиот текст „Мали детски разговори“ (пиеса за деца, 2016 година), а во 2016 година, актерите на Народниот театар од Прилеп, ја одигруваат адаптацијата на драмскиот текст во стих „Апостолска чудотворност“, по повод отворањето на Демирхисарското културно лето – Топол културен бран, во организација на Министерството за култура на Република Македонија и Општината Демир Хисар, а по повод 1.100 години од смртта на свети Климент Охридски. Исто така оваа драмска адаптација е одиграна и на отворањето на шестата по ред Меѓународна книжевна манифестација „Битолски книжевни паметења“ во организација на Министерството за култура на Република Македонија, потоа во Општината Могила, исто така во рамките на Топлиот културен бран во организација на Министерството за култура на Република Македонија и Општината Могила, и итн.

За Зоран Пејковски може да се каже дека од 1995 година е член на Друштвото на писатели на Македонија, потоа, член на Собранискиот одбор на Друштвото на писатели на Македонија, а е претседател на Друштвото на писатели „Битолски книжевен круг“ од Битола. Пејковски е и член на Македонското научно друштво од Битола, и член на Управниот одбор на Македонското научно друштво, а бил и раководител на Центарот за култура, литература, драмска уметност, филм, издаваштво, кој работи во рамките на Македонското научно друштво, потоа тој е и главен и одговорен уредник на регионалниот информативен неделник „Јавност“, а е главен и одговорен уредник на списанието за книжевност, уметност и култура „Раст“, кое излегува во рамките на Друштвото на писатели „Битолскиот книжевен круг“ од Битола. До неодамна тој бил и главен и одговорен уредник на списанието за култура, литература, драмска уметност, филм и издаваштво „Современи дијалози“, кое излегува во рамките на Македонското научно друштво од Битола.

Воедно Зоран Пејковски, е преведуван и препејуван на повеќе странски јазици: англиски, француски, српски, словенечки, хрватски, босански, руски, бугарски, грчки, албански, португалски, шпански, романски, полски, влашки, монголски итн. За својот книжевен и публицистички опус има добиени повеќе награди и признанија, меѓу кои: „За серија информации во популаризација на книгата“ на Културно просветната заедница на Македонија во 1992 година; наградата „Празник на липите“ во 2012 година, која ја доделува Друштвото на писателите на Македонија, на истоимената Меѓународна книжевна манифестација; наградата „Медијала“ на „Македонија презент“ за збирката песни „Сега знам“ во 2014 година, потоа наградата „4-ти Ноември“ на Општината Битола за книжевност и литература за 2014 година, за збирката песни „Сега знам“ и за драмскиот текст „Сите наши кодоши“, па следи наградата „Јован Котевски“ во 2016 година за збирката песни „Златна прашина“, итн./крај/мф/аш

Извор: Макфакс