Политика
СДСМ: Груевски да ги напушти личните интереси и да мисли за државата
Најголемата опозициска партија СДСМ го повика во неделата премиерот Никола Груевски „да престане да мисли само на своите интереси со што нанесува штета на граѓаните и на државата“, како и се охрабри и да прифати разговори за сите пет теми што ги предлага оваа партија за кои сметаат дека се можност за излез од политичката криза.
Реакцијата на СДСМ доаѓа откако премиерот и челник на владејачката партија ВМРО-ДПМНЕ, Никола Груевски во интервју за телевизијата Канал 5 во саботата навечер оцени дека однесувањето на СДСМ е штетно за целата држава, и додаде оти очекува дека во редовите на најголемата опозициска партија ќе „надвладее разумот и поединци од партијата ќе покажат зрелост“ враќајќи се во Собранието.„Се надевам дека на некој начин ќе станат разумни и поодговорни и дека ќе покажат зрелост. Станува збор за интереси на државата, а не на поединци во партијата. Ако сакаат да не ја загубат и онаа доверба којашто ја имаат, мора да покажат грижа. Народот е свесен дека со неодговорното однесување на СДСМ губи државата. Се надевам ќе направат потег кој народот го очекува од нив. Секое нивно посесивно однесување на сите нас, граѓаните, ни прави штета. Секој човек сака да оди напред, да напредуваме. Не може некој поединец да им го загрози тоа“, порача Груевски.„Социјалдемократскиот сојуз укажува дека во интерес на граѓаните и на државата е Никола Груевски и неговата партија да ја прифатат реалноста во Македонија, чии креатори се тие, со двојните криминални избори. Груевски знае дека сите меѓународни извештаи, вклучувајќи го и последниот конечен извештај на ОБСЕ/ОДИХР, ги потврдуваат ставовите на СДСМ: дека во Македонија не се знае што е партија, а што држава, дека нема слободни медиуми, дека е загрозена слободната волја на изразување на граѓаните“, се наведува во писмената реакција на СДСМ.Притоа се дава заклучокот дека „невозможно е бегање од одговорност на најодговорните за овие состојби, Никола Груевски и ВМРО-ДПМНЕ“.Социјалдемократите откако ги загубија предвремените парламентарни избори оваа пролет, се решија да ги вратат освоените пратенички мандати, образложувајќи дека предизборната трка не била фер и проследена со многу пропусти и недоволен пристап до медиумите. Ваквата одлука на раководството на СДСМ не го послушаа две пратенички на партијата, и една од коалициската ЛДП, кои ги заземаа своите пратенички мандати.СДСМ испорача пет услови, без чие исполнување, како што секогаш истакнуваат од партијата, нема да има договор со власта. Прво, формирање техничка влада која ќе спроведе фер и демократски избори. Второ одвојувањето на партискиот од државниот апарат. Третиот услов е регулација на медиумите и правична застапеност на опозицијата во јавниот сервис и другите медиуми, четврто допрецизирање на изборните закони, односно правење прецизен избирачки список, и петто – спроведување на попис на населението./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мециновиќ: На носителите на ЗНАМ, на личните профили им стојат слики со Заев и Пендаровски
– На носителите на ЗНАМ, уште на личните профили им стојат слики за поддршка на Заев и Пендаровски. Тоа се поддршки што јавно им ги дадоа, така што сегашното нивно делување е малку повеќе лицемерно од нивна страна – истакна Носителот на ИЕ2 и портпарол на Левица, Амар Мециновиќ, во дебатата на ,,24 Вести”.
Според Мециновиќ, СДСМ ако ја примеа пораката, немаше Оливер Спасовски да биде носител во ИЕ2, после скандалите со пасошите за белосветски криминалци, за голготата за македонските граѓани со пасошите и за бегството на Груевски:
– Од друга страна, за СДС имам конкретна порака, но СДС не ја прима пораката! Пораката не е примена, затоа што нивниот носител во Двојка имаше страшни резултати. Имаше: од бегството на Груевски до оваа голгота што им се случи со пасошите на граѓаните и во меѓувреме – издавањето на пасоши за белосветски криминалци.
Говорејќи за Францускиот предлог и за ненаситноста кон бизнис – интересите од страна на СДСМ, Мециновиќ рече:
– Исто така, не ја примија ни пораката кога народот го отфрли Францускиот предлог. Не ја примија ни пораката кога Заев го изгуби легитимитетот, така што на сила се одржаа на власт до 2024 год. Практично, за да ги задржат нивните бизнис – интереси.
Мециновиќ постојано става акцент и на неоспорниот факт дека челниците од ЗНАМ го избришаа АСНОМ од Уставот:
,,ЗНАМ го избришаа АСНОМ од Уставот кога го носеа Преспанскиот, со оглед на фактот дека тогаш беа дел од раководството на тогашното СДС. Затоа, целата нивна сегашна реторика е лицемерна”.
Левица е единствена искрена, чесна, неподмитлива опција, која се бори за нулта – корупција, радикални промени во системот и нуди решенија за сите целни групи граѓани во Македонија:
,,На 8 мај, заокружете го број 5! Искористете го своето право на глас и гласајте за Левица! Со повеќе пратеници во Парламентот, борбата ќе биде посилна!”
Македонија
Аваја: Треба да се искористи потенцијалот на ромската заедница
Ромската заедница има најмлада популација во државата и тој потенцијал треба да се искористи, порача Ќемал Сулејманов, носител на листа во Изборна единица 3 на средба со жителите на Криволак.
„Нашата заедница е најмладата популација во државата. И нашите млади бегаат надвор од државата, барајќи решенија, а ние увезуваме работници од азиските држави. Мора да најдеме решение како нашите млади да останат во државата. Заеднички да ги направиме промените иво нашите инситтуции да имаме наши луѓе. Ветуваме дека промените почнуваат со Аваја. Вашиот глас го давате за подобра иднина и соединети да покажеме дека сме тука“ порача Сулејманов.
Според него, доволно е ромската заедница да биде третирана само како чистачи и амалџии „Драги браќа и сестри, ги знам вашите проблеми со кои се соочувате, тие се мои проблеми и мора да засукаме ракави по избори и заедно да ги решаваме. Мора да се сооединиме и да почнеме со промени. Мора да имаме наши луѓе во сите институции и тоа на раководни позиции. Доста не гледаа само како чистачи и нивни амалџии“, рече Сулејманов.
Претседателот на Аваја, Акиф Кариман, рече дека одлучил да ја жртвува индивидуалната кариера за да придонесе кон напредокот на народот. Тој говореше за тоа како другите политичари ги гледаат и вреднуваат Ромите.
„Зошто? Затоа што секогаш не потценуваат. Велат ние знаеме лесно да се справиме со вас. Малку ќе ве преплашиме и вие ќе се повлечете. Ќе ви дадеме под рака и вие ќе бидете на наша страна. Или ако тоа не функционира, ќе почнат со притисоци. И тоа досега функционираше. Но, сега ја имаме Аваја, формирана да биде рамо до рамо со сите нас. Ние сме тука да направиме голема промена и да го предизвикаме статус квото“, порача Кариман.
Македонија
Џафери за Велигден: Обединети да продолжиме и да осигураме благосостојба денес и за идните поколенија
Претседателот на Владата на Република Северна Македонија, Талат Џафери, во име на Владата на Република Северна Македонија и во свое име, испрати телеграма со честитки за најголемиот христијански празник, Воскресение Христово – Велигден, до поглаварот на Македонската православна црква – Охридска архиепископија, архиепископ охридски и македонски, г.г. Стефан, до Светиот архиерејски Синод, свештенството и монаштвото на МПЦ-ОА, до православните верници и до сите граѓани кои денеска го чествуваат празникот.
„Задоволство ми е во име на Владата на Република Северна Македонија и во мое име, да Ви го честитам најголемиот христијански празник, Воскресение Христово – Велигден, Вам, на Светиот архиерејски Синод, на свештенството и монаштвото на Македонската православна црква – Охридска архиепископија, на православните верници и на сите граѓани кои денеска го чествуваат празникот.
Велигденската порака за победата на животот над смртта е порака која влева надеж дека за животот, вреди да се преземе секој чекор на храброст и пожртвуваност, чекор кој води кон светла цел. Заедничкото добро, е благословена човекова определба, и тоа може да се постигне само ако се почитуваат основните постулати на кои упатуваат бројните примери низ историјата. Особено во денешен контекст, кога човештвото и светот секојдневно се соочуваат со најразлични предизвици кои се закана по животот, мирот, здравјето и менталната благосостојба, потребни се повеќе од кога било пораките на надеж, единство и верба во тоа заедничко добро, засновано врз практикувањето на универзалните вредности како што се хуманоста, солидарноста, одговорноста и взаемната почит.
Вашата улога има голема одговорност и јас Ви посакувам мудрост во исполнувањето на благородната мисија. Ви пожелувам празникот да го поминете во добро здравје, спокој во душата и среќа меѓу саканите, а со разбирање, меѓусебна почит и обединети, да продолжиме да ја унапредуваме Република Северна Македонија и да обезбедиме благосостојба денес и за идните поколенија“, стои во честитката од премиерот Џафери до поглаварот на МПЦ – ОА, г.г. Стефан.