Политика
Заев: Оваа власт го урнисала уставниот поредок на земјата без око да и трепне
Лидерот на СДСМ Зоран Заев во четврток објави нова серија аудио снимки, за кои тврди дека се доказ за тоа на кој начин првите луѓе во власта директно ја уништиле правната држава.
Според него, со право реагираат меѓународната заедница и Обединетите нации(ОН) кога забележуваат за упадите во правосудниот систем.
Заев, во таканаречената нова ’бомба’, објави неколку снимени телефонски разговори, кои, како што рече, докажуваат дека Никола Груевски, Сашо Мијалков и Гордана Јанкулоска диригирале со одлуките кој ќе биде назначен за судија, за обвинител, како да се среди некоја пресуда…
Во првиот сет снимени разговори, објавени во четврток, Заев рече дека може да се чуе како се нарачувале судски одлуки.
На една од снимките, наводно Влатко Мијалков, брат на Сашо, зборува со Филимена Маневска за еден предмет во Апелација. Тој бара податок да стапи во контакт со одредена судијка, а Маневска го испраќа кај претседателката на судот Арсениевска, која, според снимката на СДСМ, била од нивната партија. Маневска го упатува Мијалков кај Арсениевска за таа потоа да заврши работа со судијката, извесна Тереза.
Во вториот разговор објавен од СДСМ, Мартин Протуѓер наводно бара од Јанкуловска врски за сопругата на свој другар на која требало да и се поднесе кривична пријава за сообраќајка. Јанкуловска бара податоци за жената и го уверува Протуѓер дека добро е што е поднесена кривична пријава, бидејќи таа ќе била отфрлена во понатамошна постапка.
Во третиот разговор Јанкуловска наводно бара ургенции од Сашо Мијалков да фати врски во Врховен суд за МВР да загуби спор против лице кое им е блиско и кое наводно, учествувало во разбивањето на здружението „Достоинство“.
Во вториот сет разговори што ги објави лидерот на СДСМ, Зоран Заев, беа презентирани три наводни телефонски разговори меѓу Александра Зафировска, првата полицајка Гордана Јанкулоска и шефот на тајната полиција Сашо Мијалков. Во објавените аудио снимки, тие наводно се договараат за местење судии во Основниот суд Скопје 1, Основен суд Скопје 2 и за во Судски совет.
Во третиот сет разговори, поранешниот Јавен обвинител Љупчо Шврговски наводно разговарал со Гордана Јанкулоска за да му помогне при поставување на негов близок човек. Заев презентираше и наводен разговор меѓу Блерим Беџети и Муса Џафери, на кој наводно се пазареле со ВМРО-ДПМНЕ околу позиции во Обвинителството.
Потоа беше презентиран наводен разговор меѓу Никола Тодоров и Гордана Јанкулоска, во врска со ургенција за вработување, како и наводен разговор меѓу Ставрески и Јанкулоска, во кој, како што тврди Заев, Ставрески ја покажал сета нечовечност и барал да му се загорчи животот на вработен во Министерството за финансии кој конкурирал на друга позиција без негово знаење.
Во четвртиот сет разговори, како што тврди Заев, Сашо Мијалков ја презел целосната контрола врз судството, па лично ги информирал судиите што се избрани и од кога стапуваат на новата функција.
„Сега на сите им е јасно зошто некои судии не можеле да делат правда, а сакале, зошто некои граѓани не можеле да добијат правда, гледаме зошто немало достоинствен заштитник на вистината. Гледаме како го урнисале уставниот поредок на земјата без око да им трепне. Ова е монструозен систем. ‘Вистината на Македонија’ покажа во какви ненормални околности сме живееле сите ние. Лажат дека аудиоснимките се монтирани. Не поминуваат вашите лаги, готово е!“, рече на крајот од конференцијата Зоран Заев.
Тој најави дека ќе продолжат со објавување на материјалите, со цел, како што рече, вистината да излезе на виделина. /крај/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски од Чаир: На Македонија ѝ треба обединување и единство, а не поделби, владата на ВМРО-ДПМНЕ ќе вложи 1 милијарда евра за проекти во сите општини
Се чувствува победничка атмосфера и енергија, тоа е важно за сите нас и ни дава мотив да продолжиме посилно да се бориме. Овие денови кои ни преостануваат треба максимално да се мобилизираме, а најновите анкети кои ги добив утрово велат дека ќе биде голема победата и на 24 април и на 8 мај, изјави претседателот на ВМРО-ДПМНЕ, Христијан Мицкоски на митингот во Чаир.
Мицкоски истакна дека сега во Македонија имаме политичка гарнитура која повеќе од две децении е на власт, тоа се ДУИ чија суштина се поделби и грабеж на народот.
– Кога ќе анализирате која е суштината на ДУИ, Али Ахмети и Артан Груби, Бујар Османи, Талат Џафери и останатите, кај нив нема ништо посебно тие само го делат народот по етничка основа и така опстојуваат. Дали некој може да се сети некоја добра работа која Али Ахмети и Артан Груби ја имаат направено, но можам да кажам десетици лоши работи, рече Мицкоски.
Мицкоски нагласи дека сега ДУИ сериозно ќе бидат изненадени на овие избори, а им се познава нервозата затоа што после 8 мај треба да одговараат за сето она што му го направија на народот, за целиот грабеж.
Мицкоски се осврна на проектите кои ги планира идната влада од ВМРО-ДПМНЕ и посочи дека се планира да се инвестира 250 милиони евра секоја година во општините, 1 милијарда во 4 годишен мандат.
– Во Чаир ќе има висока сума, еден од проектите е проширување на булеварското решение на влезот од Бит Пазар кон Чаир и тоа мора да се направи и го повикувам градоначалникот да се пријави со повеќе проекти. Тоа ќе додаде вредност во квалитетот на живеење. На Македонија и треба обединување и единство не поделба, потенцираше Мицкоски.
Мицкоски додаде дека идната влада на ВМРО-ДПМНЕ планира да отвори нови 55.000 работни места, да функционира со владеење на правото на целата територија и нема да има територии каде ќе владејат шерифи.
Да обезбедиме пристојни услови за поголем инвестициски бран и од странство и од домашни инвеститори за да може децата да останат тука. Мораме и тие кои си отидоа да ги вратиме назад. Да обезбедиме надеж. Ве повикувам на 24 април сите да се обединиме околу број 2 и да гласаме за Гордана Силјановска Давкова, а потоа да се обединиме и заедно на 8 мај да испишеме историја за коалицијата Твоја Македонија предводена од ВМРО-ДПМНЕ, изјави Мицкоски.
Македонија
Доц. д-р Бобан Карапејовски: Ќе обезбедиме вработување на најдобрите 200 студенти, како и стипендии од 500 евра месечно
Носителот на листата на кандидати за пратеници во ИЕ 1, Бобан Карапејовски на денешната прес конференција рече дека во програмата на Движењето ЗНАМ – За наша Македонија за парламентарните избори, наречена „Проглас за достоинствена Македонија“ еден од приоритетите се образованието и науката, кои се суштински за градењето силна и просперитетна држава.
„Во Прогласот за достоинствена Македонија на Движењето ЗНАМ – За наша Македонија, предвидовме два сегменти: зголемување на достоинството на вработените во образованието и во науката и поставување нов систем, со кој овој сектор ќе се врати во фокусот и ќе помогне во создавањето функционално писмен и високообучен кадар, како и продлабочување на
научните истражувања“, рече Карапејовски и додаде: „Во однос на првиот постулат, достоинството на вработените во образовниот сектор, е предвидено платите на наставниците и на професорите да се зголемат до 100 % од актуелните. И, тоа е најмалку што можеме да направиме за да му го вратиме угледот на учителот и да ги привлечеме најдобрите да бидат
даскали на нашите деца“.
Тој потенцира дека за најдобрите студенти ќе се обезбедат стипендии во износ од 500 евра месечно, а за најдобрите двесте студенти вработување во научните и во институциите на системот.
„Партиските вработувања мора да запрат! Не смее партиската книшка да биде услов за вработување. На универзитетите и во државните институции треба да работат најдобрите за најдоброто за сите нас. Ни треба научен подмладок веднаш, како и
ревизија на условите и зголемување на квалитетот на акредитираните универзитети, кои се множат на секој чекор, а не даваат квалитет“, рече тој.
Карапејовски рече дека наставните програми и планови ќе се усогласат со модерните технологии и достигнувања и појасни дека ќе се изгради систем што ќе поттикнува креативно, аналитичко и логичко размислување кај учениците, но и ќе поттикнува креативност во областа на бизнисот и на финансиската едукација. Учебниците ќе бидат усогласени со новите наставни планови и програми и напишани од најдобрите автори, навреме доставени до учениците.
Тој исто така рече дека издвојувањата од буџетот за науката ќе се зголемат, а ќе има и посебни стимулации за оние што успеваат да објавуваат во најпрестижните списанија и да соработуваат со колегите од најдобрите светски универзитети, како и посебни субвенции за таканаречните национални дисциплини.
Македонија
Пендаровски: Ги знам нивните лажни анкети, ги знам и реалните анкети и реално ви кажувам дека на 8 мај победуваме!
На само неколку дена пред првиот круг на гласање, од Скопје кандидатот за претседател Стево Пендаровски искажа верување дека по повеќе од три децении независност, македонските граѓани многу добро знаат да препознаат чија програма е реална, а која е во расчекор со времето во кое живееме.
„Овој претседател и оваа политичка гарнитура никогаш не давале лажни надежи и ветувања за брза реализација на стратешките цели на државата. И денес пред вас, не велам дека Македонија за само неколку години ќе биде најразвиената држава во Европа, не ветувам дека целиот тој процес ќе трае само неколку месеци, но, говорам и повторувам секаде дека најголемиот ризик е ако на изборите им дадеме шанса на оние за кои претходно веќе видовме како владеат со луѓето цели 11 години“, истакна Пендаровски.
Пендаровски денеска повика на масовна излезност на 24 април и на 8 мај, за како што рече, да не се враќаме во режим.
„Ги знам нивните лажни анкети, ги знам и реалните анкети и реално ви кажувам дека победуваме на 8 мај. Со заокружување на бројот 1 продолжуваме кон Европа и кон развиениот свет и дефинитивно не се враќаме назад во режим и заробена држава“, рече Пендаровски.