Политика
СДСМ: Десет причини за нова истрага за смртта на Никола Младенов
Боја од друг автомобил на задната страна на мерцедесот на Никола Младенов, за која не се знае колку е стара, лоциран преку телефон кој никогаш не е најден, најдени сметки од патарини кои не се признати, истражен судија на кој ова му бил прв случај, утврдена траекторија на движење по базни станици на мобилните телефони, се дел од причините заради кои СДСМ смета дека треба да се повтори истрагата за новинарот Никола Младенов кој загина во сообраќајка на влезот од Скопје, пред две години.
„Доказите ќе докажат 10 причини зошто е неопходно да се спроведе нова истрага за смртта на Никола Младенов. Покрај причината за смртта раскин на аортата, беше соопштено дека се отфрла судир со друго возило, дека телото било пронајдено на седум метри од возилото, дека не бил пронајден телефонот… Од доказите од разговорите кои денеска ќе ги објавиме ќе стане јасно дека ниту една од тие клучни работи се точни. Аудио разговорите ќе го отворат прашањето дали случајот на Никола Младенов може да се затвори како сообраќајна несреќа“, рече лидерот на СДСМ Зоран Заев, при објавувањето на 30 ткн `бомба`, од наводно прислушувани разговори на државни функционери.
Во наводен разговор меѓу министерката за внатрешни работи Гордана Јанкулоска и шефот на кабинет на премиерот, Мартин Протугер, лоцирањето на телото на Младенов е преку следење на сигналот на мобилен телефон, иако телефонот во јавноста велеа дека не е пронајден. Сепак, во еден разговор наводно меѓу министерката и нејзиниот помошник Иво Котевски, тој вели дека за да се лоцира не е потребен апарат.
„Последен човек со кој се видел со Младенов е Стевчо Јакимовски… не прашав кај се виделе, телефонот му го проверувале… жена му синоќа се слушнала со него околу 22 саат, и и рекол дека ќе си дојде за саат, два. Дури сабајле некое време не се јавил. Ми се јави Павле Трајанов, ми вели да ти го дадам бројот да го лоцирате. Да не џапнал некоја вотка повеќе, он јака кола има мерцедес, да не згазнал повеќе од што треба. Јас му реков дека мора да има барање за лоцирање, оти лоши се тие, ќе рече после што сте ми го лоцирале телефонот. Жена му одма дојде во полициска, по сигналот на телефонот за два саати го најдовме…“, се слуша во еден разговор женски глас, за кој се тврди дека е на Јанкулоска.
Во одговор на новинарско прашање, Заев подоцна појасни дека не е Јакимовски последниот со кој се видел Младенов, туку дека како „маж за маж“ му се нашол и така и кажал на неговата сопруга за да го прикрие.
За Протугер, според претпоставка дека неговиот глас го вели тоа, Младенов е „корумпиран, хохштаплер, преварант, шо се има пишено за нас. Шо го величаат?“, а на исто мислење се и Мијалков и неговиот соговорник: „Жена му не знаеше каде е … По телефонот го лоциравте. Да. Бог да го прости, ама зол човек беше. Не беше коректен човек. Тропаше глупости. Новинарски рекетар беше. Тие се најлоши. Бил психолошко-финансиски оптоварен…“
Од презентираните разговори на Истражниот судија кој работел на случајот ова му е прв пат да работи на ваков случај. Наводно, Котевски признава дека истражниот судија направил утки, но не треба да се каже во јавноста, и додава дека не знаел каде да го прати автомобилот на Младенов на вештачење.
За фискалните сметки од патарините, што по неколку дена ги најде новинарот Томислав Кежаровски, од презентираните разговори произлегува дека се ирелеантни, а во Извештајот на МВР стои дека тие се најдени, за на завршната прес-конференција, на Јавното обвинителство, кога случајот е затворен како несреќа, обвинителот Марко Зврлевски да рече дека не се најдени.
Во наводен разговор меѓу Јанкулоска и Котески се слуша „Дека на задниот дел од автомобилот на Младенов имало некаква боја, за која вештаците не знаат колку е стара“.
„Преку СМС пораки Јанкулоска го информирала Груевски: „Има една незгодна работа, на колата има боја“. Зошто оваа инфоромација не е споделена со јавноста?. Котевски и Јанкулоска сметале дека траекторијата на движењето на Младенов не требало да се објави во јавноста. Зошто не е спроведена истрага дали и други лица се нашле на исто место и во исто време кај Младенов? Зошто фискалните сметки од патарините не биле причина за дополителна истрага, со кои луѓе се сретнал Младенов и дали тоа е поврзано со сообраќајката. Јавноста ќе слушне дека не работеле камерите на наплатните станици кај патарините, кои ги обезбедува СГС на Мијалков, и дека Јанкулоска сакала тоа да не се објави“, рече Заев.
Од разговорите се слуша дека не работеле камерите на наплатните станици, ниту на влезот кај Ченто. Објавени беа и наводни разговори во кои Јанкулоска и Котевски се ситат и се изживуваат врз смртта на Младенов…
„Ќе слушнете како се шегуваат велејќи „Кој е следниот?“, како сакале да го прашаат новинарот Героски „Дали ти се напумпани гумите?“, „Дали Геро го испратил Младенов во смрт“., вели Јанкулоска. Овој разговор е важен и поради тоа што Котевски потврдува дека следењето на телефонските разговори се правело без судска наредба“, рече Зоран Заев, лидер на СДСМ, на денешната прес конференција.
Уште еден детал е причина за нова истрага според СДСМ, а тоа е дека телото на Младенов според Извештајот е најдено на оддалеченост од автомобилот од 22,5 местри, додека на прес-конференција е соопштено на седум метри. Исто така, во Извештајот стои дека на ветробранското стакло нема траги од крв, а на облеката на Младенов нема траги од стакло, што, како што рече Заев, е чудно ако излетал низ прозорецот
Заев јавно даде збор, дека по смена на власта ќе биде спроведена целосна, темелна истага за случајот со смртта на новинарот Никола Младенов.
Сообраќајна несреќа, за којашто не постојат индиции дека е кривично дело. Вака истражните органи го затворија случајот, односно сообраќајната несреќа во којашто на 26 март 2013 година загина сопственикот и новинарот во весникот „Фокус“, Никола Младенов.
Досега сè уште не е пронајден неговиот мобилен телефон и јавноста сè уште нема одговор на прашањата каде бил вечерта Младенов, со кого разговарал на телефон и дали се сретнал со некого. /крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски од Чаир: На Македонија ѝ треба обединување и единство, а не поделби, владата на ВМРО-ДПМНЕ ќе вложи 1 милијарда евра за проекти во сите општини
Се чувствува победничка атмосфера и енергија, тоа е важно за сите нас и ни дава мотив да продолжиме посилно да се бориме. Овие денови кои ни преостануваат треба максимално да се мобилизираме, а најновите анкети кои ги добив утрово велат дека ќе биде голема победата и на 24 април и на 8 мај, изјави претседателот на ВМРО-ДПМНЕ, Христијан Мицкоски на митингот во Чаир.
Мицкоски истакна дека сега во Македонија имаме политичка гарнитура која повеќе од две децении е на власт, тоа се ДУИ чија суштина се поделби и грабеж на народот.
– Кога ќе анализирате која е суштината на ДУИ, Али Ахмети и Артан Груби, Бујар Османи, Талат Џафери и останатите, кај нив нема ништо посебно тие само го делат народот по етничка основа и така опстојуваат. Дали некој може да се сети некоја добра работа која Али Ахмети и Артан Груби ја имаат направено, но можам да кажам десетици лоши работи, рече Мицкоски.
Мицкоски нагласи дека сега ДУИ сериозно ќе бидат изненадени на овие избори, а им се познава нервозата затоа што после 8 мај треба да одговараат за сето она што му го направија на народот, за целиот грабеж.
Мицкоски се осврна на проектите кои ги планира идната влада од ВМРО-ДПМНЕ и посочи дека се планира да се инвестира 250 милиони евра секоја година во општините, 1 милијарда во 4 годишен мандат.
– Во Чаир ќе има висока сума, еден од проектите е проширување на булеварското решение на влезот од Бит Пазар кон Чаир и тоа мора да се направи и го повикувам градоначалникот да се пријави со повеќе проекти. Тоа ќе додаде вредност во квалитетот на живеење. На Македонија и треба обединување и единство не поделба, потенцираше Мицкоски.
Мицкоски додаде дека идната влада на ВМРО-ДПМНЕ планира да отвори нови 55.000 работни места, да функционира со владеење на правото на целата територија и нема да има територии каде ќе владејат шерифи.
Да обезбедиме пристојни услови за поголем инвестициски бран и од странство и од домашни инвеститори за да може децата да останат тука. Мораме и тие кои си отидоа да ги вратиме назад. Да обезбедиме надеж. Ве повикувам на 24 април сите да се обединиме околу број 2 и да гласаме за Гордана Силјановска Давкова, а потоа да се обединиме и заедно на 8 мај да испишеме историја за коалицијата Твоја Македонија предводена од ВМРО-ДПМНЕ, изјави Мицкоски.
Македонија
Доц. д-р Бобан Карапејовски: Ќе обезбедиме вработување на најдобрите 200 студенти, како и стипендии од 500 евра месечно
Носителот на листата на кандидати за пратеници во ИЕ 1, Бобан Карапејовски на денешната прес конференција рече дека во програмата на Движењето ЗНАМ – За наша Македонија за парламентарните избори, наречена „Проглас за достоинствена Македонија“ еден од приоритетите се образованието и науката, кои се суштински за градењето силна и просперитетна држава.
„Во Прогласот за достоинствена Македонија на Движењето ЗНАМ – За наша Македонија, предвидовме два сегменти: зголемување на достоинството на вработените во образованието и во науката и поставување нов систем, со кој овој сектор ќе се врати во фокусот и ќе помогне во создавањето функционално писмен и високообучен кадар, како и продлабочување на
научните истражувања“, рече Карапејовски и додаде: „Во однос на првиот постулат, достоинството на вработените во образовниот сектор, е предвидено платите на наставниците и на професорите да се зголемат до 100 % од актуелните. И, тоа е најмалку што можеме да направиме за да му го вратиме угледот на учителот и да ги привлечеме најдобрите да бидат
даскали на нашите деца“.
Тој потенцира дека за најдобрите студенти ќе се обезбедат стипендии во износ од 500 евра месечно, а за најдобрите двесте студенти вработување во научните и во институциите на системот.
„Партиските вработувања мора да запрат! Не смее партиската книшка да биде услов за вработување. На универзитетите и во државните институции треба да работат најдобрите за најдоброто за сите нас. Ни треба научен подмладок веднаш, како и
ревизија на условите и зголемување на квалитетот на акредитираните универзитети, кои се множат на секој чекор, а не даваат квалитет“, рече тој.
Карапејовски рече дека наставните програми и планови ќе се усогласат со модерните технологии и достигнувања и појасни дека ќе се изгради систем што ќе поттикнува креативно, аналитичко и логичко размислување кај учениците, но и ќе поттикнува креативност во областа на бизнисот и на финансиската едукација. Учебниците ќе бидат усогласени со новите наставни планови и програми и напишани од најдобрите автори, навреме доставени до учениците.
Тој исто така рече дека издвојувањата од буџетот за науката ќе се зголемат, а ќе има и посебни стимулации за оние што успеваат да објавуваат во најпрестижните списанија и да соработуваат со колегите од најдобрите светски универзитети, како и посебни субвенции за таканаречните национални дисциплини.
Македонија
Пендаровски: Ги знам нивните лажни анкети, ги знам и реалните анкети и реално ви кажувам дека на 8 мај победуваме!
На само неколку дена пред првиот круг на гласање, од Скопје кандидатот за претседател Стево Пендаровски искажа верување дека по повеќе од три децении независност, македонските граѓани многу добро знаат да препознаат чија програма е реална, а која е во расчекор со времето во кое живееме.
„Овој претседател и оваа политичка гарнитура никогаш не давале лажни надежи и ветувања за брза реализација на стратешките цели на државата. И денес пред вас, не велам дека Македонија за само неколку години ќе биде најразвиената држава во Европа, не ветувам дека целиот тој процес ќе трае само неколку месеци, но, говорам и повторувам секаде дека најголемиот ризик е ако на изборите им дадеме шанса на оние за кои претходно веќе видовме како владеат со луѓето цели 11 години“, истакна Пендаровски.
Пендаровски денеска повика на масовна излезност на 24 април и на 8 мај, за како што рече, да не се враќаме во режим.
„Ги знам нивните лажни анкети, ги знам и реалните анкети и реално ви кажувам дека победуваме на 8 мај. Со заокружување на бројот 1 продолжуваме кон Европа и кон развиениот свет и дефинитивно не се враќаме назад во режим и заробена држава“, рече Пендаровски.