Митко Андреевски, сегашен советник во кабинетот на премиерот Владо Бучковски, е таинственото лице со иницијали А. М., кое наводно самоиницијативно ги злоупотребило службените телефони на министерството за одбрана за да ја намести анкетата на емисијата „Чуму“, дознава „Време“.

Емил Зафировски

Митко Андреевски, сегашен советник во кабинетот на премиерот Владо Бучковски, е таинственото лице со иницијали А. М., кое наводно самоиницијативно ги злоупотребило службените телефони на министерството за одбрана за да ја намести анкетата на емисијата „Чуму“, дознава „Време“.

Тоа е името што Министерството за одбрана во својот извештај го доставило до антикорупциската комисија, по внатрешната истрага. Претходно беше обелоденето дека анкетата на „Чуму“ за новата територијална организација, во која гостуваше тогаш министерот Бучковски, била наместена во полза на Владата, и тоа од службени телефони на МО. Според истрагата, од два телефони во МО имало 2.605 јавувања во прилог на Законот за територијална поделба.

Министерството пред комисијата доставило документ во кој е подвлечено дека Митко Андреевски е лицето вработено во МО, кое „самоволно злоупотребило два службени фиксни телефони, за што ќе мора да надомести штета од 52.000 денари и ќе биде казнет со 30 отсто од платата за време од 6 месеци“.

Дознаваме дека во времето кога се местела анкетата, Митко Андреевски не бил вработен во МО, како што првично соопшти Министерството кога најави дека против нивниот вработен А. М. ќе следуваат дисциплински казни, туку дека тој работел со договор на дело, и тоа во кабинетот на министерот Владо Бучковски.

Неофицијално дознаваме дека Митко Андреевски ноќта на 20 јули минатата година, додека траела емисијата „Чуму“, во зградата на Генералштабот на АРМ не влегол сам, туку со уште едно машко лице, кое тогаш исто така било вработено во МО со договор на дело. Со нив имало и две девојки. Вратите на канцелариите од каде што се вртело им ги отклучил редовен војник на АРМ, кој таа ноќ бил дежурен во зградата на Генералштабот.

По скандалозното откритие дека анкетата се местела од телефони на МО, Бучковски, тогаш министер за одбрана, изјави дека виновниците ќе бидат откриени и соодветно казнети. Но, освен иницијалите на лицето А. М. и тврдењата дека тоа самоиницијативно ги злоупотребило службените телефони, случајот остана забошотен. Ниту тогашното раководство на МО, ниту сегашното не сакаа да откријат кој се крие зад иницијалите А. М.. И покрај проверените и потврдени информации на „Време“ дека зад иницијалите А. М. се крие името на Митко Андреевски, сегашен советник на премиерот Бучковски, од кабинетот на премиерот и од Министерството за одбрана и вчера одбија да разговараат за тоа.

МО преку портпаролот Билјана Аврамовска одби да одговори дали лицето Митко Андреевски минатата година работело во МО и дали во моментов имаат вработен со исто име и презиме.

– За МО тој случај е затворен. Нови информации немаме – кратко одговори Аврамовска.

И Марјан Ѓуровски, шеф на кабинетот на премиерот Владо Бучковски, не сакаше да ги коментира информациите.

– Не можам ништо да кажам за тој случај. Обратете се во Министерството за одбрана – изјави Ѓуровски.

Антикорупциската комисија утврди дека во анкетата на „Чуму“ биле злоупотребени службени телефони на МО и дека биле потрошени државни пари заради манипулација на јавното мислење во полза на владин предлог. Комисијата заклучи и нагласи дека телефонирањето не било спонтано, туку однапред смислено. Целиот извештај, сработен врз основа на членот 49 од Законот за спречување корупција, комисијата го достави до Јавното обвинителство. Таа од Обвинителството побара кривично да ги гони и да ги казни службените лица во МО и во Агенцијата за спорт и млади за кривично дело злоупотреба на службената положба и овластувањата, според членот 353 од Кривичниот законик.

Во јули лани беше откриено дека од службени телефони на МО и на владината Агенција за спорт и млади биле потрошени околу 106.000 денари, или повеќе од 1.600 евра државни пари, за да се намести анкетата во полза на владиниот предлог за новата територијална поделба. Владо Бучковски и тогашниот премиер Хари Костов беа владините претставници што на таа емисија јавно го бранеа предлогот на Владата додека се одвиваше анкетното прашање дали сте „за“ или „против“ новата територијална организација.

********

Андреевски: „Јас не можам ништо да кажам, прашајте го Ѓуровски“,

„Време“ завчера телефонски го доби Митко Андреевски во неговата советничка канцеларија во кабинетот на премиерот Владо Бучковски.

Еве како се одвиваше разговорот:

Андреевски: Јас не можам ништо да кажам за тоа. Подобро јавете му се на Марјан Ѓуровски

„Време“: Но, Вашето име е посочено кај антикорупциската комисија од страна на МО. Обвинет сте дека самоволно сте злоупотребиле службени телефони.

Андреевски: Сега сум на состанок и имам многу работа. Не можам да разговарам. Јавете се подоцна.

Подоцна тој не беше достапен за разговор.