Надворешна политика
Евроатланските аспирации на Македонија остануваат приоритет за САД
САД продолжува со поддршката за евроатланските аспирации на Македонија, како и на процесот кој се води во рамките на Обединетите нации (ОН) и медијаторот Метју Нимиц за решавањето на спорот за името меѓу Македонија и Грција, порача помошникот државен секретар на САД за европски и евроазиски работи, Викторија Нуланд во понеделникот по средбата со македонскиот премиер Никола Груевски.
Во однос на членството на земјата во НАТО, Нуланд потенцирала дека проширувањето сè уште останува приоритет за Алијансата, а ова особено се однесува на Македонија.
„САД ја поддржува визијата која Македонија ја има од Охрид, како една држава која се движи напред, кон просперитет, кон демократија. Бев многу среќна кога од премиерот слушнав дека реформите се движат напред, а тоа е есенцијално за двете заедници да соработуваат заедно. На САД му е особено драго, што бевме дел и инвестиравме во таа визија за интеграција, политички, економски, како и безбедносно. Ние разговаравме и за тоа како можеме да ја продлабочиме и подобриме соработката, вклучувајќи ги регионите во Македонија во кои живеат Албанци. А тоа сакаме да го направиме со нашите инвеститори, компании и со тоа да ја зајакнеме и економската интеграција во регионот, затоа што тоа ќе донесе сила и просперитет, како и раст за двете заедници. Кога станува збор за безбедноста, ние имаме добра соработка, а сакам да го искористам овој момент и да изразам сочувство за пилотската несреќа“, изјави Нуланд, додавајќи дека евроатланските аспирации на Македонија се приоритет на САД.
Груевски го повторил ставот дека Македонија останува на заложбите за што поскоро зачленување во НАТО и ЕУ.
„Реформите кои Македонија ги спроведе во сите општествени и институционални сфери, како и учеството на припадниците на АРМ во рамките на повеќе мировни мисии, ни даваат потполно право да инсистираме на надминување на сите пречки за нашето зачленување. Со оглед на фактот дека процесот на реформи е процес кој бара континуитет и постојана посветеност, ја изразуваме нашата јасна и недвосмислена определба за продолжување на реформите во сите области каде е тоа потребно“, изјави премиерот Груевски.
Покрај Груевски, Нуланд за време на својата посета на Скопје оствари и средби со шефот на македонската дипломатија Никола Попоски, претседателот Ѓорге Иванов и лидерот на ДУИ, Али Ахмети.
Посетата на Нуланд на Македонија е дел од нејзината регионална турнеја, за време на која таа деновиве ги посети и Црна Гора, Србија и Косово./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.