Скопје
Официјално отворен 7-от Меѓународен женски сатетелит турнир во одбојка 2016
Градоначалникот на Град Скопје, Коце Трајановски, претседателот на Европската одбојкарска конфедерација /CEV/, Александар Боричиќ и претседателот на Одбојкарската федерација на Македонија, Петар Јовановски, цо петокот вечерта официјално го отворија традиционалниот меѓународен турнир во одбојка на песок 2016 CEV Beach volleyball women satellite Skopje.
„Имам чест по седми пат како градоначалник на Град Скопје да се обратам на отворањето на овој исклучително важен и атрактивен настан за Република Македонија, Меѓународниот Сателит турнир во одбојка на плажа во женска конкуренција. Задоволство ми е да кажам дека во соработка со Одбојкарската Федерација на Македонија, Градот Скопје годинава за првпат овозможува во нашиот град да имаме можност да ги видиме мајсториите на најдобрите женски натпреварувачки во одбојка на песок од Европа. Од вчера до недела, домаќини сме на 26 женски двојки од 16 држави: Австрија, Белгија, Бугарија, Чешка, Данска, Финска, Франција, Германија, Грција, Косово, Холандија, Романија, Србија, Турција и Украина, кои ќе се борат за титулата и за наградниот фонд, кој годинава изнесува 8.000 евра“, рече на отворањето на оовј веќе традиционален меѓународниот турнир градоначалникот Трајановски.
Покрај високиот награден фонд, кој годинава е најголем од сите други организатори на еден официјален меѓународен сателит турнир, големиот интерес на најквалитетните одбојкарки и нивните федерации се должи и на извонредно квалитетна организација на турнирите во изминативе години. Добрата организација беше и причината поради која и влеговме во официјалните календари на CEV за организација на квалитетните сателит турнири.
Градоначалникот Трајановски истакна дека минатата година бевме домаќини на машкиот Сателит, годинава на женски, а Градот Скопје се надева дека во иднина ќе ја добиеме и организацијата на Сателит на кој ќе настапат најдобрите и во женска и во машка конкуренција.
„Дозволете ми да подвлечам и дека Градот Скопје, годинава од својот буџет издвои 1.000.000 за организацијата на овој турнир, но и дека нашата поддршка не застанува тука. Оттаму им се заблагодарувам на вработените во сите јавни претпријатија на градот, без чија ангажираност и труд, еден ваков турнир навистина е невозможен. Честитки и за Одбојкарската федерација на Македонија како технички организатор и реализатор на турнирот, со која, како партнер во организацијата ќе стремиме кон уште поголеми успеси во иднина.Ви посакувам спортска среќа, фер-плеј натпревари и добри резултати, но и незаборавен престој, добра дружба и забава во градот на спортот и на солидарноста – Скопје“, додаде Трајановски.
Претседателот на Одбојкарската федерација на Македонија, Петар Јовановски истакна дека е многу среќен што со организирањето на овој меѓународен женски сателит турнир на кејот на реката Вардар повторно овој простор кој порано бил плажа на граѓаните на Скопје им нуди забава.
Годинава првпат на овој турнир присуствуваше првиот човек на европската одбојка, претседателот на Европската одбојкарска конфедерација (CEV), Александар Боричиќ, кој во име на асоцијацијата изрази задоволство што заедно со Градот Скопје и Одбојкарската федерација на Македонија го организирале овој женски турнир и надеж дека следната година ќе организираат и машки и женски турнир во Скопје.
Турнирот почна на 1-ви септември а ќе заврши на 4-ти септември, в недела, кога ќе се одиграат и полуфиналните и финалните натпревари на веќе познатата локација во градскиот парк покрај кејот на реката Вардар. /крај/мф/нц
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Прва фаза од асфалтирањето на улиците „9“ и „532“ во општина Илинден
Општина Илинден интензивно работи на реконструкцијата на улиците „9“ и “532“ во Марино, пришто денеска се изврши првата фаза од поставувањето на асфалт. Во оваа прва фаза асфалтирани се околу 380 метри.
Во рамки на градежните работи се врши целосна реконструкција на улицата во должина од околу 820 метри и широчина 6 метри, реконстукција на тротоар во должина од 450 метри како и зафаќање на атмосферските води од коловозот. Улица е од големо значење бидејќи претставува главна сообраќајница во општината што ги поврзува сите населни места. За време на реализација на градежните работи на улицата е воспоставен времен режим на сообраќај, кој го спроведува фирмата изведувач на активностите на терен Филип инжинеринг Дооел Скопје.
„Во наредниот период Општина Илинден ќе продолжи со инвестиции за подобрување на локалната патна инфраструктура се со цел да им се овозможи подобри и поквалитетни услови за живеење“, велат од Општина Илинден.
Скопје
Ѓорче Петров ќе добие нова катна гаража
Со мнозинство гласови советот на Општина Ѓорче Петров изгласа отпочнување на постапка за измена и дополнување на ДУП за Градска четврт СЗ 15, Блок СЗ 15.03, за обезбедување локација за нова катна гаража. Ова денеска го соопшти градоналникот на општината Александар Стојкоски.
– По години на недостаток на паркинг простор во Реонскиот центар, конечно се преземаат конкретни чекори за решавање на овој проблем кој го мачи секојдневниот живот на жителите, порача тој.
Катната гаража ќе биде лоцирана непосредно до Реонскиот центар, на местото кое сега се користи како паркинг, и ќе обезбеди повеќе паркинг места!
– Ова е само дел од напорите на општината да ги подобри условите за живот и инфраструктурата во нашиот град, додаде Стојковски.
Скопје
Ѓорѓиевски: Салата „Партизан” во Чаир ќе биде темелно реновирана и повторно ќе си го врати својот сјај
Претседателот на ЗЕЛС, Орце Ѓорѓиевски, заедно со градоначалникот на Општина Чаир, Висар Ганиу и Министерот за спорт, Борко Ристовски, денеска ја посетија салата “Партизан” во Чаир. Најавија дека овој спортски објект, кој оставен на забот на времето, се наоѓа во катастрофална состојба, ќе биде темелно реновиран и повторно ќе го врати својот сјај. Претседателот Ѓорѓиевски му се заблагодари на Министерот Борко Ристовски за неговиот ангажман за рамномерното регионално инвестирање во сферата на спортот, што овозможува обнова на спортската инфраструктура во сите општини.
-Особено ме радува фактот што покрај култната сала “Расадник” во Кисела Вода и овој спортски објект ќе биде темелно реконструиран и повторно ќе го врати својот сјај. Реновирањето на салата “Партизан” ќе значи многу за сегашните и идните спортисти. По завршувањето на градежните активности, ќе добиеме репрезентативен објект, што ќе создаде услови за подобро спортување и развој на младите таленти. Сакам да упатам голема благодарност до Министерот Борко Ристовски за посветената работа и за вниманието што го посветува на рамномерното регионално инвестирање во сферата на спортот. Овие инвестиции не само што овозможуваат обнова на спортската инфраструктура во сите општини, туку и создаваат услови за развој на здравa и активнa младина, која е темел на нашата иднина-изјави Претседателот на ЗЕЛС, Орце Ѓорѓиевски.