Регион
Турција одобри градба на црква во Истанбул, прва по 1923-та
Исламско конзервативната влада на Турција дозволи изградба на црква во Истанбул за сириското малцинство, што е првпат од основањето на Република Турција во 1923 година, пренесуваат турските медиуми во саботата повикувајќи се на владини извори.
„Тоа ќе претставува преседан од основањето на Републиката. Црквите се реставрирани или повторно отворани за јавноста, но ниедна нова црква досега не е изградена“, потврдил за AFP неименуван турски фунцкионер.
Христијаните се во големо малцинство и живеат претежно во западниот дел на Турција, која според уставот е секуларна земја со 99 отсто муслимани, а противниците на владејачката Партија на правдата и развојот (АКР) ја обвинуваат власта за „исламистички пресврт“.
Владата во Анкара, којашто ги продолжува долгите преговори за членство во Европската унија, со оваа перспектива ги зголеми правата на верските малцинства, реставрирајќи цркви, манастири и синагоги, како и со враќање на некои од нив во сопственост на заедниците.
Новата црква би требало да биде подигната во квартот Јесилкој, крај брегот на Мраморното Море, на површина којашто ја отстапи општинскиот совет, истакнал функционерот.
Изградбата којашто треба да започне следните месеци, ќе ја финансира фондацијата за заштита на правата на Сиријците, православните и католиците, коишто живеат претежно во југоисточна Турција, а нивната бројност се проценува на околу 20 илјади./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
На таткото на момчето убиец од Србија му е продолжен притворот за уште 60 дена, има сомнение дека може да го повтори делото
Вишиот суд во Белград му го продолжи притворот за уште 60 дена на Владимир Кечмановиќ, таткото на момчето кое на 3 мај уби девет негови врсници и чувар во ОУ „Владислав Рибникар“.
На Владимир Кецмановиќ му е продолжен притворот поради сомнение дека доколку биде пуштен на слобода за краток временски период ќе го повтори кривичното дело, како и поради тоа што постои основано сомнение дека сторил кривично дело за кое е пропишана затворска казна над десет години, а начинот на извршување и сериозноста на последиците од кривичното дело доведоа до вознемиреност кај јавноста што може да го загрози непреченото и правично водење на кривичната постапка, соопштија од тој суд.
Во обвинението за тешко кривично дело против општата безбедност се товари Владимир К., а за сторено кривично дело недозволено изработување, држење, носење и тргување со оружје и распрскувачки материи, мајката на момчето Миљана К.
Регион
„Мислев дека регалот ќе падне врз мене“ – жена од Србија сведочи за силниот земјотрес
Земјотресот беше многу силен. Кратко, но силно, вели вознемирената Мила Петровиќ од Кладово – место кое утрово го погоди силен земјотрес.
Како што опишува преплашената жена, земјотресот ја исплашил и неа, но и останатите жители на Кладово.
„Мислев дека регалот ќе падне врз мене. Немаше време за бегство никаде. Сè се тресеше многу. За среќа, тоа беше кратко. Кога се смири, сите излегоа на улица“, раскажува таа за Телеграф.рс.
Земјотресот бил со јачина од 4,3 степени според Рихтеровата скала, на длабочина од 11 километри.
Колку бил силен, сведочи и фактот што бил почувствуван во Заечар, Неготин, Доњи Милановац, Бор и други градови на истокот на Србија, а некои граѓани го почувствувале и во Ниш.
„Почувствував земјотрес, се тресеше мебелот во куќата“, „Бев во кревет кога почна тресењето“, напишаа граѓаните.
Регион
Земјотрес од 4,3 степени утрово во Србија
Утрово земјотрес со јачина од 4,3 степени според Рихтеровата скала е регистриран во регионот на Кладово, соопшти Републичкиот сеизмолошки завод.
Земјотресите со ваков интензитет можат да предизвикаат помали оштетувања на зградите во епицентралното подрачје, јавуваат српските медиуми.
Засега нема извештаи за евентуална штета.