Италија во неделата одржа комеморација на 35-годишнината од атентатот во Болоња, најкрвавиот во ткн Оловни години, во кој загинаа 85 луѓе а повеќе од 200 беа ранети, со барање конечно да се дознае целата вистина за овој напад и неговите нарачатели.

„Италија има должноста да не го заборави тој масакр и недолжните жртви коишто сега се дел од колективната национална меморија“, изјави во писмената порака шефот на државата, Серџо Матарела.

За расветлувањето на ова злосторство за да се дознае целата вистина се зазема и претседателот на Сенатот, Пјетро Грасо. „Барањето на вистината секогаш е тежок процес“, рече пред бројните граѓани собрани во Болоња и потсети на „многуте мачни аспекти на овој страшен настан“.

На комеморацијата беа читани имињата на жртвите, а радиото Rai 1 го прекина емитувањето во 10.25 часот, точно кога одекнала експлозијата, и покрај соодветната музичка програма емитуваше сведоштва на преживеаните.

Бомбата којашто експлодирала на 2-ри август 1980 година во чекалницата на железничката станица во Болоња усмрти 85 лица, а рани повеќе од 200 и е најкрвавиот напад извршен во Италија во периодот наречен Оловни години.

Две лица од терористичката група од крајната десница NAR или Вооружени револуционерни ќелии – фашисти, се осудени на доживотни затворски казни, а третото кое тогаш било малолетно на 30 години затвор..На другите, меѓу кои и припадници на воената разузнавачка служба, им се пресудени поблаги казни, од седум до десет години поради попречување на правдата.

Семејствата на жртвите и многу Италијанци сметаат дека осудените терористи биле само случајни извршители на злосторството, додека оние коишто го наредиле сé уше се непознати и неказнети.

Двајцата терористи на NAR, Валерио Фјораванти и Франческа Мамбро, сега се на слобода благодарејќи на италијанскиот правосуден систем. Ланскиот ноември им беше досудено да платата 2,13 милијарди евра отштета на државата.

Кон крајот на април 2014 година, тогаш набрзо именуваниот актуелен италијански премиер Матео Ренци изјави дека одлуката за отстранувањето на ознаката за доверливост од споменатите документи ја смета за „должност кон граѓаните и кон семејствата на жртвите на нападите и на насилствата”, како и дека тие „претставуваат темна дамка во колективната меморија на луѓето”. Тогаш најави дека Италија ќе ја симне ознаката за доверливост од документите за терористичките бомбашки напади извршени во периодот меѓу 1960 и 1980 година, познат како Оловните години.

Додаде и дека документите коишто се однесуваат на нападите на Пјаца Фонтана и во Болоња, како и на мистериозното уривање на авионот „DC-9″ близу Сицилија во 1980 година, како и документите коишто се однесуваат на другите напади во текот на седумдесеттите и осумдесеттите години од минатиот век ќе бидат отворени за јавноста. Сите документи пота ќе бидат пренесени во италијанскиот Централен државен архив.

Припадниците на екстремно левичарската групација Црвените бригади, неофашистичките групи, припадниците на тајните служби и на мафијата биле вмешани во бранот политичко насилство, меѓу кои е и бомбашкиот напад од 1969 година на миланската Пјаца Фонтана, како и на железничката станица во Болоња од 1980 година, во кои имаше десетици жртви.

Голем е бројот на жртвите во бомбашките напади и атентатите, а стотици се ранети, меѓутоа многу од инцидентите кои се случуваа во Италија во периодот на Студената војна и екстремните политички тензии во западна Европа, останаа неразјаснети и покрај долгогодишните истраги./крај/мф/сн

Извор: Макфакс