Европа
Експерти: Необјасниви постапки на екипажот на урнатиот 4U9525

Авионот „Airbus A320“ на летот од Барселона до Диселдорф се спуштал умерено и летал линеарно, директно во планината, изјавуваа во средата воздухопловни експерти вџашени од необјаснивото за нив однесување на пилотите кои заедно со 144 патници и уште четворица членови на екипажот, во вторникот се урнаа во Алпите во јужна Франција, а теориите за причината за трагедијата се множат од технички дефект, преку грешка на пилотите до можен терористички акт.
Ниедна од хипотезите во овој момент не е исклучена, грешка на пилотот, технички недостиг, терористички чин, изјави францускиот премиер Мануел Валс. Генералната управа за цивилно воздухопловство истакнува дека екипажот не испратил повик „мејдеј“, што е вообичаено во случај на несреќа.
Авионот се спуштал со умерена брзина од 3.000 стапки во минута, според првичните податоци, а тоа не упатува на итно спуштање кога брзината изнесува 5.000 стапки во минута, пишува францускиот портал Le Point. Авионот останал на својата хоризонтална траекторија. Го продолжил својот план на летото, освен што ја променил висината, покажуваат податоците на серверите на порталот Filghtradar24, кој ги бележи податоците за летовите во реално време.
„Значи, да се оди директно на планините нема никаква смисла. Тоа е ненормален потег на професионални пилоти или, пак, изостанување на реакција“, изјави за агенцијата AFP, капетан од една голема воздухопловна европска компанија, кој сакал да остане анонимен. Се поставува, меѓу стручњаците, прашањето зошто пилотите се однесувале во најмала рака невообичаено или зошто не реагирале. „Доколку пилотите не спречиле авионот да се залета во планините, или биле без свест или мртви, или одлучиле да умрат или биле преморени“, смета друг европски воздухопловен експерт.
Една од хипотезите е постепеното опаѓање на притисокот и неефикасноста на маската за кислород. „Во тој случај, пилотите брзо би паднале во состојба на хипоксија (намелено снабдување на мозокот со кислород)“, сметаат неколку пилоти и истражители од француското Биро за истраги и анализи (BEA).
Притоа се потсетува на несреќата на авионот „Boeing 737“ на кипарската компанија „Helios“ на 14-ти август 2005 година, кога загина 121 човек. На денот на несреќата, механичарите го тестирале притисокот и ја заборавиле рачката со која притисокот се враќа во автоматска позиција. Во текот на искачувањето на авионот притисокот не се нормализирала и кислородот почнал да недостига. Пилотите се онесвестиле. Авионот кој бил ставен на автоматски пилот се урнал откако ги потрошил сите резерви на горивото. Пилотите на воените ловци кои го следеле, можеле само немоќно да го гледаат трагичниот крај на овој лет.
Засега не може ниту да се исклучи ниту можноста од самоубиство на пилотот, кој во тој случај морал да го неутрализира својот колега или, пак, можело да интервенира трето лице во кабината. Затоа експертите се неподелени во тврдењето дека клучно е да се прегледаат податоците од ткн „црната кутија“ којашто е пронајдена во вторникот.
Но што може се да открие „црната кутија“?! Податоците од „црната кутија“, којашто ги регистрира разговорите во пилотската кабина (Cockpit voice recorder, CVR), може да даде многу податоци, дури и доколку е оштетена.
„Оштетена не значи и дека е неупотреблива. Мемориската картичка, слична на онаа каква што има на компјутерите, особено е добро заштитена. Таа картичка е корисен дел од CVR. Можно е ‘црната кутија’ да е многу оштетена, меѓутоа картичката е цела. Заштитена е така да издржува крајно екстремни удари“, истакнува Жан-Пол Троадек, поранешен директор на BЕА.
Дури и доколку врските се прекинати, BEA има можност сето тоа повторно да го поврзе. „Може да се дознае кој командувал, дали капетанот бил сам во кабината или не. Дали имало и други лица освен пилотот и копилотот. Можно да се слушне и нивниот разговор“, вели Троедак.
Уредот CVR ги регистрира и другите звуци во пилотската кабина, како отворањето и затворањето на вратата до кабината, па дури и звуци од разни копчиња, рачки лостови. Сите тие звуци и кликови може да им дадат на експертите драгоцени информации да разберат што се случувало. Би можело, исто така, да се слушне и некој аларм, з апожар, за паѓање на притисокот и слично.
Можна е и терористичка трага! Германската влада уште во вторникот објави дека нема конкретни показатели за сомневање во тероризам.
Експертите, повикувајќи се на изјавите на очевидци потврдиле дека авионот при понирањето бил цел, и за AFP рекле дека оттаму нема многу поткрепа хипотезата за терористички напад.
Додека остатоците од авионот се концентрирани во една зона, голема е веројатноста дека несреќата е последица на атентат со експлозија. Доколку, пак, авионот експлодирал во лет, неговите делови се раштркани во опсег од неколку километри, како што беше случај сои авионот на ‘Malaysia Airlines’ кој се урна во Украина“, изјави Хејке Бирленбах, потпретседателка на компанијата „Lufthansа“ за порталот Le Point.
Додава дека не може ниту да се отфрли и тезата за грабнување на авионот, што завршило со падот. „Меѓутоа, засега сметаме дека тоа било несреќа и дека сето друго би претставувало шпекулација“, заклучува Бирленбах./крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Осумнаесет општински службеници во Истанбул завршија во затвор

Турски суд затвори 18 службеници на градската власт во Истанбул поради обвиненија за корупција продолжувајќи ја репресијата против опозицијата поради која беше затворен и градоначалникот Екрем Имамоглу.
Имамоглу, главен политички ривал на претседателот Ердоган и водечки на анкетите, беше затворен во март во очекување судење по обвиненијата за корупција. Тој се соочува и со обвиненија за помагање терористичка група.
Градоначалникот ги негира сите обвиненија, а неговото апсење ги предизвика најголемите протести во Турција во последната деценија, економски превирања и обвинувања за политизирано судство. Владата ги отфрла овие тврдења и вели дека судството е независно.
НТВ објави дека 34 од 52 лица приведени за време на викендот биле ослободени со кауција. Турските медиуми пред четири дена објавија дека властите привеле десетици вработени во општина Истанбул како дел од правните истраги насочени кон Имамоглу проширувајќи ја репресијата против опозицијата, која почна кон крајот на минатата година.
Меѓу приведените се генералниот секретар, началникот на кабинетот на Имамоглу и претседателот и заменик-претседателот на Управата за водоснабдување и канализација.
Европа
Шведската полиција уапси осомничен за пукањето во кое загинаа три лица

Шведската полиција објави дека привела осомничено лице по пукањето во кое загинаа три лица во градот Упсала во вторникот.
Лицето е осомничено за убиство и е едно од неколкуте лица што се испрашуваат како дел од истрагата, изјавија полицајци за новинарите.
Пукањето се случило во фризерски салон во Упсала, додадоа тие.
Полицијата соопшти дека инцидентот се смета за изолиран и не е поврзан со големите прослави на Валпургиската ноќ, што се очекуваат во Упсала в среда.
Европа
Русите ги нападнаа Харков и Днепар со беспилотни летала: едно лице загина, 46 повредени

Роеви руски беспилотни летала ги нападнаа украинските градови Харков и Днепар доцна синоќа, при што загинаа најмалку едно лице, а најмалку 46 беа повредени, соопштија официјални лица.
Харков, кој се наоѓа на североисток, во близина на руската граница и е втор по големина град во Украина, е цел на редовни руски напади со беспилотни летала и ракети откако Москва ја започна својата тотална инвазија пред повеќе од три години. Во нападот врз градот доцна синоќа се повредени најмалку 46 лица, меѓу кои две деца и една бремена жена, соопшти регионалниот гувернер Олех Синехубов.
Нападите се случија откако САД, кои се обидоа да посредуваат во мировен договор меѓу Русија и Украина, изјавија дека ќе се повлечат како посредник доколку Москва и Киев не излезат со конкретни предлози.
Завчера, рускиот претседател Владимир Путин прогласи тридневен прекин на огнот од 8 до 10 мај по повод 80-годишнината од победата на Советскиот Сојуз и неговите сојузници во Втората светска војна, додека украинскиот претседател Володимир Зеленски повика на итен прекин на огнот во траење од најмалку 30 дена.
Градоначалникот на Харков, Игор Терехов, изјави дека вчера биле цел на напади неколку делови од градот, кој бил опустошен од последователни напади. Харков е дом на околу 1,2 милиони луѓе, во споредба со речиси 2 милиони пред почетокот на инвазијата во февруари 2022 година. „Врз Харков беа извршени 16 напади. Беше погодена висока станбена зграда, како и приватни куќи, медицински објект и цивилна инфраструктура“, напиша Терехов на Телеграм.
Во југоисточниот град Днепар, беспилотни летала предизвикаа пожари, при што загина 53-годишен маж, а уште едно лице беше повредено, изјави Серхиј Лисак, гувернер на регионот Днепар.
„Тешка ноќ за Днепар. Приватни куќи беа оштетени“, напиша Лисак на Телеграм. Тој рече дека девет руски беспилотни летала биле уништени над регионот преку ноќ. Целосниот обем на ноќниот напад врз Украина не е познат. Двете страни негираат дека гаѓале цивили. Во масовен руски напад со беспилотни летала врз Днепар минатиот месец загинаа четири лица и предизвика голем пожар во хотелски и ресторански комплекс и други згради.