Во трката за градоначалник на британската престолнина Лондон, води лабуристот Садик Кан, додека партијата на шкотските националисти SNP однесе нова победа на изборите за регионалниот шкотски парламент, во кој сепак го загуби апсолутното мнозинство, покажаа прелиминарните резултати објавени во петокот, откако во четвртокот жителите на Англија, Шкотка, Велс и Северна Ирска излегоа на локалните избори.

Во Лондон, доколку продолжи трендот од досегашното пребројување на гласовите, 45-годишниот Садик Кан би можел да стане првиот муслимански градоначалник на некоја европска метропола.

По околу третина од преброените гласови, Кан води пред својот главен конкурент, конзервативецот и син на милијардер, 41-годишниот Зак Голдсмит, се наведува на официјалната страница на лондонската градска управа посветена на изборите londonelects.org, којашто сепак сé уште нема објавено конкретни бројки.

Конечните резултати се очекуваат кон крајот на денот, во петокот. Доколку победи, Садик Кан ќе го наследи на должноста градоначалник на британската престолнина харизматичниот Борис Џонсон.

Во Шкотска, тамошната владејачка Шкотска национална партија (SNP) добила 63 места од 129-те мандати во парламентот, што е помалку од 69-те коишто ги освои во 2011 година.

Неколку часа пред објавувањето на конечните резултати, челничката на SNP, Никола Старџен, прогласи „историска победа“ бидејќи нејзината партија третпат по ред победи на изборите за парламентот на Шкотска. Меѓутоа, партијата нема да може самата да формира влада и ќе мора да смета на поддршката на помалите партии, како што се Зелените, за да им се спротистави на конзервативците кои добија повеќе места отколку на минатите избори. Во Шкотска лабуристите се потиснати на третото место.

Во другите делови од Велика Британија резултатите за лабуристите, сепак, не се толку лоши како што предвидуваа анкетите. Во Велс, Лабуристичката партија добила 29 места од 60, додека на минатите избори имаше 30 пратеници. Европскептичната десничарска партија UKIP влезе во велшкиот регионален парламент со 7 места. Во 81 од 124 општини за кои се објавени резултатите, лабуристите досега ја задржале власта во 42, а ја загубиле во една.

Резултатите од регионалните британски избори со големо внимание се следат од страна на една од фракциите во Лабуристичката партија, којашто очекува погоден момент да најде оправдување на грешките на Џереми Корбин, бидејќи сé уште го нема преболено неговиот избор ланскиот септември, а смета дека тој е неспособен да го одведе лабуристите до победа на парламентарните избори во 2020 година.

„Ширум Англија предвидувањата беа дека ќе ги загубиме советите. Не загубивме.,.., се држиме и имаме голема поддршка на некои места, бидејќи нештата странка се бори против гротескното ниво на нееднаквоста во Британија. Мораме многу да работиме во Шкотска., но добро се држиме во Англија“, изјави Корбин од Шефилд./крај/мф/сн

Извор: AFP