Џо Кокс, 41-годишна проевропска пратеничка на британската Лабуристичка партија, им подлегна на повредите здобиени во четвртокот во напад со огнено и нож во Бирстал, во близина на Лидс, во северната англиска грофовија Јоркшир, инцидент кој силно ја потресе земјата една седмица пред судбоносниот референдум за останување или излегување од Европската унија.

„Жал ми е што морам да ве известам дека почина од повредите здобиени во нападот“, изјави началничката на локалната полиција Ди Колинс на прес-конференцијата. Смртта била утврдена во 14.48 часот по средноевропско време, додаде.

Потврди дека во нападот вил ранет уште еден 77 годишен маж, но неговиот живот не е во опасност.

Напаѓачот пукал во политичарката најмалку двапати, а потоа ја прободел со нож. Коск останала да лежи и да крвари на тротоарот, а во болница била префрлена со хеликоптер, но лекарите не можеле да ѝ го спасат животот. Трагедијата се случила во близина на градската библиотека каде што Кокс требала да има средба со гласачите, пред очите на десетици случајни минувачи.

Полицијата, којашто го уапси 52-годишниот осомничен за нападот, соопшти дека има „голем број сведоци“. Соседите осомничениот, чии мотиви засега не се познати, го опишуваат како „самотник“. Идентификуван е како Томи Мејр, кој во местото живеел триесетина година.

Во неговиот дом се прави темелен претрес и истрагата е во раната фаза, соопштија од полицијата на Западен Јоркшир.

„Семејството на лабуристите и целата земја се во неверица и тажни поради страшното убиство на Џо Кокс“, реагираше на Twitter претседателот на Лабуристичката партија

„Смртта на Џо Кокс е трагедија. Беше активна и добронамерна. Моите мисли се со нејзиниот сопруг Брендан и нивните две малечки ќеркички“, објави на Twitter, британскиот премиер Дејвид Камерон

Колегите, вклучително и премиерот Камерон, ја сметаа Кокс за една од најперспективните пратеници во парламентот. „Загубивме голема ѕвезда. Имаше голема срце, луѓето ќе бидат многу многу тажни поради ова што се случи“, оцени во соопштението кабинетот на Камерон.

Според очевидец кој зборувал за Sky News, мажот ја нападнал пратеничката со пиштол и нож со повикот „Прво Британија“, додека е во ек кампањата за референдумот за иднината на Обединетото Кралство во ЕУ.

По вестите за нападот врз пратеничката, таборот на приврзаниците на останувањето на земјата во ЕУ објави дека ја прекинува кампањата.

Лабуристичката пратеничка Џо Коск, дипломирана на престижниот универзитет Кембриџ, е од изборната единица Бетли и Спин, во Западен Јоркшир, а беше избрана на последните парламентарни избори во 2015 година./крај/мф/сн

Извор: Макфакс