Шведска и Велика Британија ја отфрлија одлуката на работната група на Обединетите нации за тоа дека основачот на обелоденувачкиот интернет ресурс WikiLeaks, Австралиецот Џулиан Асанж е фактички незаконски притворен во амбасадата на Еквадор во Лондон, соопштија во петокот портпаролите на двете влади.

Шведската влада ја одби одлуката на панелот на ОН објаснувајќи дека 44-годишниот Џулиан Асанж избрал да остане во еквадорската амбасада каде што се наоѓа од 2012 година, откако му беше одобрено барањето за политички азил поради избегнување негова екстрадиција. „Шведските власти немаат контрола над неговата одлука да остане таму. Господин Асанж може да ја напушти амбасадата во секој момент“, соопшти шведската влада во изјавата која е одговор на одлуката на работната група на светската организација.

„Ова ништо не менува. Ние во целост го отфрламе секое тврдење дека Џулиан Асанж е жртва на незаконски притвор. Обединетото Кралство му разјасни на ОН дека службено ќе го оспори мислењето на групата на ОН“, изјави портпаролот на британската влада.

„Тој, всушност, доброволно го избегна законското апсење избирајќи да остане во еквадорската амбасада. Обвинението за силување и натаму не е решено и не сила е европскиот налог за пасење, така што Обединетото Кралство има законска обврска да ѝ го испорача на Шведска“, се истакнува во изјавата на Лондон.

Група независни експерти на ОН соопштија дека Асанж е незаконски притворен во еквадорската амбасада во Лондон и дека би требало да биде ослободен и обештетен.

Шведска во август 2015 година најави дека се надева оти до крајот на годината ќе постигне договор со Еквадор за правно содејство, коишто ќе им овозможи на шведските обвинители да го сослушаат Асанж во врска со двете обвиненија против него подигнати од две жени во врска со сексуално злоставување и силување од 2010 година, за кои тој тврди дека се монтирани случаи поради неговите политички активности. Но кон крајот на јануари Шведското државно обвинителство соопшти дека Еквадор и официјално одбил неговите иследници да го испитаат основачот на разобличувачкиот интернет ресурс WikiLeaks којшто од 2006 година објавува доверливи документи, кој речиси четири години се наоѓа во еквадорската амбасада во Лондон.

Асанж од јуни 2012 година се крие во амбасадата на Еквадор во Лондон, каде што од еквадорските власти побара политички азил поради страв дека шведските власти ќе го екстрадираат во САД каде што би можел да биде суден за објавувањето на стотиците илјади доверливи документи за војните во Ирак и во Авганистан, како и тајните дописи на американската дипломатија со непријатни белешки за многу светски државници.

Против Австралиецот сé уште не е подигнато обвинение, бидејќи досега не е испитан.

Еквадорскиот државен правобранител претходно изјави дека Кито инсистира на реализација на разговор со Асанж, како и дека од Шведска побарал листа со прашањата на коишто се бараат одговори./крај/мф/сн

Извор: Макфакс